ក្រុមហ៊ុនដឹកអ្នកដំណើររបស់វៀតណាម ចាប់ផ្ដើមបន្ថែមជើងហោះហើរ១៤ទៀត ដើម្បីដឹកអ្នកដំណើររបស់ខ្លួនពីបណ្ដាខេត្ត ក្រុងនានា ដើម្បីមកលើកទឹកចិត្តកីឡាករលេងវគ្គផ្ដាច់ព្រ័ត្រ AFF Suzuki Cup 2018 ទល់ក្រុមម៉ាឡេស៊ី។
ការធ្វើបែបនេះ គឺដើម្បីសម្រួលដល់អ្នកគាំទ្រទាំងអស់ដែលមានចិត្តចង់ទស្សនាការប្រកួតដ៏សំខាន់មួយនេះនៅក្រុងហាណូយ។ ក្រុមវៀតណាម រំពឹងថាអ្នកគាំទ្រនឹងជួយពួកគេឱ្យបានច្រើនបំផុត ក៏ដូចជាផ្ដល់កម្លាំងចិត្តខ្លាំង ដើម្បីយកឈ្នះក្រុមម៉ាឡេស៊ីឱ្យបាន ត្បិតអីនេះជាការប្រកួតផ្ដាច់ព្រ័ត្រមួយដែលវៀតណាមមានទំនុកចិត្តខ្លាំង។
រំលឹកថានៅជើងទី១កន្លងទៅ ទឹកដីម៉ាឡេស៊ី មានអ្នកគាំទ្រ៨ម៉ឺននាក់ចូលទស្សនាផ្ទាល់នៅកីឡដ្ឋាន Bukit Jahil ។ ខណៈដែលលទ្ធផលវិញ គឺបានត្រឹមស្មើគ្នា ២-២ ប៉ុណ្ណោះ។ ដោយឡែកជើងទី២វិញ នឹងលេងនាថ្ងៃស្អែកនេះ វេលាម៉ោង៧:៣០នាទីយប់ នៅកីឡដ្ឋាន My Dinh ដែលផ្ទុកអ្នកទស្សនាបានជាង៤ម៉ឺននាក់៕ប្រភពFoxsportsasia
