ខ្សែប្រយុទ្ធ Robert Lewandowski បានបញ្ជាក់ថាគាត់នឹងចាកចេញពី Barcelona នៅពេលដែលកិច្ចសន្យារបស់គាត់ផុតកំណត់នៅចុងបញ្ចប់រដូវកាលនេះ។ Lewandowski បានចូលរួមជាមួយ Barcelona ក្នុងឆ្នាំ ២០២២ ហើយបានបង្ហាញខ្លួនចំនួន ១៩១ ប្រកួតនៅគ្រប់ការប្រកួតទាំងអស់ ដោយស៊ុតបញ្ចូលទីបាន ១១៩ គ្រាប់។

ក្នុងរយៈពេលបួនរដូវកាលរបស់គាត់នៅ LaLiga កីឡាករប៉ូឡូញរូបនេះបានឈ្នះពានរង្វាន់ LaLiga ចំនួន ៣លើក រួមទាំងរដូវកាលនេះ ក៏ដូចជា Copa del Rey និង Supercopa de Espana ចំនួន ៣ពាន ទៀតផងដែរ។

កីឡាករ Lewandowski បានចាប់ផ្តើមជម្រើស១១នាក់ដំបូងត្រឹមតែ ១៥ លើកក្នុងចំណោម ២៩ ប្រកួតរបស់គាត់នៅ LaLiga រដូវកាលនេះ ប៉ុន្តែនៅតែជាអ្នករកគ្រាប់បាល់បានច្រើនជាងគេលំដាប់ទីពីររបស់ Barcelona ក្នុងការប្រកួតនៅរដូវកាលនេះ ដោយស៊ុតបញ្ចូលទីបាន ១៣ គ្រាប់។

ខ្សែប្រយុទ្ធជម្រើសជាតិប៉ូឡូញរូបនេះ បាននិយាយនៅក្នុងវីដេអូមួយដែលបានបង្ហោះទៅកាន់ Instagram ថា ៖

“បន្ទាប់ពីបួនឆ្នាំពោរពេញដោយបញ្ហាប្រឈម និងការខិតខំប្រឹងប្រែង វាដល់ពេលដែលត្រូវបន្តទៅមុខហើយ”។

“ខ្ញុំចាកចេញដោយមានអារម្មណ៍ថាបេសកកម្មបានបញ្ចប់។ បួនរដូវកាល ជាមួយនឹងជើងឯកបីលើក។ ខ្ញុំនឹងមិនភ្លេចសេចក្ដីស្រឡាញ់ដែលខ្ញុំបានទទួលពីអ្នកគាំទ្រតាំងពីថ្ងៃដំបូងរបស់ខ្ញុំឡើយ។ តំបន់ Catalonia គឺជាកន្លែងរបស់ខ្ញុំនៅលើផែនដីនេះ។ សូមអរគុណដល់អ្នករាល់គ្នាដែលខ្ញុំបានជួបតាមផ្លូវក្នុងរយៈពេលបួនឆ្នាំដ៏ស្រស់ស្អាតនេះ។ សូមថ្លែងអំណរគុណយ៉ាងជ្រាលជ្រៅចំពោះលោកប្រធាន Laporta ដែលបានផ្តល់ឱកាសឱ្យខ្ញុំរស់នៅក្នុងជំពូកដ៏អស្ចារ្យបំផុតនៃអាជីពរបស់ខ្ញុំ”។

“Barca បានត្រលប់មកវិញហើយ”។

ក្នុងរដូវកាលបីដំបូងរបស់គាត់នៅ Barcelona Lewandowski បានបញ្ចប់ជាអ្នករកគ្រាប់បាល់បានច្រើនជាងគេរបស់ក្លឹប និងបានឈ្នះពានរង្វាន់ស្បែកជើងមាសក្នុងឆ្នាំ ២០២២-២០២៣ ដោយរកបាន ២៣ គ្រាប់។

រដូវកាលដែលគាត់រកបានគ្រាប់បាល់ច្រើនបំផុតនៅ LaLiga គឺរដូវកាលមុន នៅពេលដែលគាត់រកបាន ២៧ គ្រាប់។  Lewandowski នឹងលេងការប្រកួតចុងក្រោយរបស់គាត់នៅ Camp Nou នៅថ្ងៃអាទិត្យនេះ នៅពេលដែល Barcelona ប្រកួតជាមួយ Real Betis ខណៈដែលការប្រកួតចុងក្រោយរបស់គាត់សម្រាប់ក្លឹបនឹងធ្វើឡើងនៅ Valencia នៅថ្ងៃទី ២៣ ខែឧសភា។

គោលដៅបន្ទាប់របស់កីឡាករវ័យ ៣៧ ឆ្នាំរូបនេះមិនទាន់ច្បាស់លាស់នៅឡើយទេនៅដំណាក់កាលនេះ។ គាត់ត្រូវបានផ្សារភ្ជាប់ទៅនឹងក្លឹបនៅក្នុង Saudi Pro League និង MLS ផងដែរ៕

ប្រភព បរទេស