ការធ្លាក់ចុះទម្រង់វាយរបស់ ធឿន ធារ៉ា ដែលជាកំពូលអ្នកប្រដាល់គុនខ្មែរលំដាប់ជួរមុខរបស់ប្រទេសកម្ពុជា គឺជាប្រធានបទដែលមហាជន និងអ្នកគាំទ្រកំពុងជជែកវែកញែកយ៉ាងខ្លាំង។ បើទោះបីជាធារ៉ានៅតែអាចរក្សាជ័យជម្នះបានខ្លះក៏ដោយ ប៉ុន្តែការប្រកួតក្រោយៗរបស់គាត់ហាក់បីដូចជាមានភាពតានតឹង និងពិបាកជាងមុនឆ្ងាយណាស់។

កត្តាសំខាន់ៗចំនួន ៥ ដែលអាចជាមូលហេតុបណ្ដាលឱ្យទម្រង់លេងរបស់អ្នកលេងគុនខ្មែររហ័សនាមអ្នកលេងពូថៅដៃមានការប្រែប្រួលខ្លាំងមិនគួរឱ្យជឿ ៖

១. បញ្ហារបួសរ៉ាំរ៉ៃ របួសដៃ និងស្មងជើង
នេះគឺជាកត្តាដ៏ធំបំផុតមួយ។ ធឿន ធារ៉ា បានឆ្លងកាត់ការប្រកួតធំៗជាច្រើនក្នុងរយៈពេលដ៏ខ្លី ដែលធ្វើឱ្យរាងកាយរបស់គាត់មិនមានពេលវេលាគ្រប់គ្រាន់ក្នុងការសម្រាកព្យាបាលរបួសឱ្យជាសះស្បើយ ១០០%។ ព្រោះបញ្ហានេះវាអាចពាក់ព័ន្ធនឹងកម្លាំងវាយចេញ នៅពេលមានរបួសដៃ វាមិនត្រឹមតែធ្វើឱ្យកម្លាំងវាយចេញថយចុះនោះទេ តែវាក៏ធ្វើឱ្យកីឡាករមានការរារែក ស្ទាក់ស្ទើរ ក្នុងការប្រើប្រាស់ក្បាច់សម្លាប់របស់ខ្លួនផងដែរ។

២. ការមមាញឹកជាមួយនឹងការងារសង្គម និងការផ្សព្វផ្សាយ
ក្នុងនាមជាតារាកីឡាដ៏ល្បីល្បាញប្រចាំប្រទេស ធារ៉ា ត្រូវបានអញ្ជើញឱ្យចូលរួមក្នុងកម្មវិធីសម្ពោធ កិច្ចការសប្បុរសធម៌ និងការថតស្ប៉តពាណិជ្ជកម្មផ្សេងៗជាច្រើន។ កត្ដាពេលវេលាហ្វឹកហាត់ជារឿងចំបងសម្រាប់អ្នកកីឡាគ្រប់រូប ការមមាញឹកនេះអាចធ្វើឱ្យពេលវេលាក្នុងការហ្វឹកហាត់ដុតដៃដុតជើងមានការថយចុះ។ ក្នុងកីឡាប្រដាល់ បើខកខានហ្វឹកហាត់តែបន្តិច កម្លាំងសួត និងបច្ចេកទេសនឹងធ្លាក់ចុះភ្លាមៗ។

៣. គូប្រកួតចាប់ក្បាច់បាន និងការសិក្សាពីចំណុចខ្សោយ
កាលពីការប្រកួតមុនៗរបស់គាត់។ ធារ៉ា ត្រូវបានគេស្គាល់ថាជា “ស្តេចកែង អ្នកលេងពូថៅដៃ” ដែលពិបាកទប់ទល់បំផុតក្នុងពិភពគុនខ្មែរ។ ប៉ុន្តែបច្ចុប្បន្ន គូប្រកួត ជាពិសេសកីឡាករបរទេសលំដាប់ខ្ពស់ បានសិក្សាពីរបៀបវាយរបស់គាត់យ៉ាងច្បាស់។ ពួកគេព្យាយាមបិទកែង និងរក្សាចម្ងាយមិនឱ្យ ធារ៉ា ចូលកៀកបាន។ ការវាយបកទៅលើជើងក្រោមរបស់ ធារ៉ា ក៏ជាយុទ្ធសាស្ត្រដែលគូប្រកួតយកមកប្រើដើម្បីកាត់បន្ថយល្បឿនរបស់គាត់ផងដែរ។

៤. សម្ពាធផ្លូវចិត្ត និងការរំពឹងទុកខ្ពស់ពីមហាជន
រាល់ពេលដែល ធឿន ធារ៉ា ឡើងសង្វៀន អ្នកគាំទ្រតែងតែចង់ឃើញការផ្ដួលគូប្រកួតឱ្យសន្លប់ ឬឈ្នះដាច់តែម្ដង។ សម្ពាធនេះអាចធ្វើឱ្យ ធារ៉ា មានអារម្មណ៍តានតឹងខ្លាំងពេក រហូតដល់បាត់បង់ភាពវៃឆ្លាតក្នុងប្រកួត ឬព្យាយាមវាយសម្រុកខ្លាំងពេក រហូតដល់បាត់បង់ម្ចាស់ការ ក្នុងការការពារខ្លួន។

៥. កម្រិតគូប្រកួតកាន់តែខ្លាំង
បច្ចុប្បន្ន កម្មវិធីប្រកួតនានាតែងតែផ្ដល់គូប្រកួតដែលជាជើងខ្លាំងលំដាប់ពិភពលោកមកឱ្យគាត់។ ការជួបជាមួយអ្នកដែលមានបច្ចេកទេសខ្ពស់ និងកាយសម្បទារឹងមាំ មិនមែនជារឿងងាយស្រួលឡើយ ទោះបីជាស្ថិតក្នុងទម្រង់វាយដែលល្អបំផុតក៏ដោយ ឧទាហរណ៍ដូចជាកីឡាករ អាហ្សេបៃហ្សង់ រូស្លាន ណាហ្គីយ៉ាវ កាលពីយប់មិញស្រាប់ ទាំងមាឌធំខ្ពស់ បច្ចេកទេសក៏ល្អ ទើបគេអាចផ្ដួលធារ៉ាបានត្រឹមទឹកទី ១។

សរុបជារួមមកវិញ ការធ្លាក់ចុះនេះមិនមែនមកពីសមត្ថភាពរបស់ ធឿន ធារ៉ា បាត់បង់ទាំងស្រុងនោះទេ ប៉ុន្តែវាអាចបណ្ដាលមកពីលទ្ធផលក្នុងការនឿយហត់រាងកាយខ្លាំងពេក និងការខ្វះចន្លោះក្នុងការហ្វឹកហាត់ដោយសារតែភារកិច្ចផ្សេងៗទៀតរបស់គាត់។ ដើម្បីវិលត្រឡប់មកភាពខ្លាំងក្លាវិញ ធារ៉ាប្រហែលជាត្រូវការពេលវេលាសម្រាកព្យាបាលរបួសឱ្យជាសះស្បើយ និងផ្ដោតលើការហ្វឹកហាត់បច្ចេកទេសថ្មីៗបន្ថែមទៀត។

ទោះជាយ៉ាងណាក៏ដោយ នេះគ្រាន់តែជាការសន្និដ្ឋានរបស់ទំព័រ CTS Sports ប៉ុណ្ណោះ ចុះប្រិយមិត្តយល់យ៉ាងណាដែរ សូមបញ្ចេញមតិយោបល់ខាងក្រោមទាំងអស់គ្នា ៕