បើអ្នកមិនធ្លាប់បានឮឈ្មោះក្លឹប Kairat (ដែលឈ្មោះផ្លូវការគឺ Football Club Kairat មិនមែន Kairat Almaty ទេ) រហូតមកដល់ពេលថ្មីៗនេះទេ គឺមានមូលហេតុច្បាស់លាស់។ ទោះបីជាពួកគេបានគ្រងជើងឯកលីកប្រទេសកាហ្សាក់ស្ថានជាលើកទីបួនក្នុងប្រវត្តិសាស្ត្រ ៧១ ឆ្នាំរបស់ពួកគេក្នុងរដូវកាល ២០២៤/២៥ ក៏ដោយ ក៏នេះគឺជាលើកទីមួយហើយដែលពួកគេបានប្រឈមមុខជាមួយក្រុមខ្លាំងៗរបស់អឺរ៉ុប។ ដំណើរកាលពីមុនដែលល្អបំផុតរបស់ពួកគេក្នុង Champions League គឺកាលពីឆ្នាំ ២០២១/២២ នៅពេលពួកគេឡើងដល់វគ្គជម្រុះជុំទីពីរ។

នៅក្នុងរដូវកាលនេះ បន្ទាប់ពីយកឈ្នះលើក្រុម Olimpija Ljubljana របស់ស្លូវេនី, KuPS របស់ហ្វាំងឡង់, និង Slovan Bratislava របស់ស្លូវ៉ាគី ពួកគេត្រូវបានគេរំពឹងថានឹងធ្លាក់ក្រោមស្នាដៃរបស់ជើងឯកស្កុតឡេន Celtic ក្នុងវគ្គ Playoff ។ ផ្ទុយទៅវិញ Kairat បានឡើងទៅកាន់វគ្គ League Phase ដោយការស៊ុតបាល់ប៉េណាល់ទីកាត់សេចក្តី បន្ទាប់ពីការប្រកួតទាំងពីរជើងបញ្ចប់ដោយលទ្ធផលស្មើ ០-០។
ដំណើរដ៏វែងឆ្ងាយរបស់ Kairat សម្រាប់ការប្រកួតជាប្រវត្តិសាស្ត្រក្នុង  ការប្រកួតក្នុងផ្ទះនៅថ្ងៃអង្គារនេះទល់នឹង Real Madrid នឹងក្លាយជាការប្រកួតដែលមានកម្រិតខ្ពស់បំផុតក្នុងប្រវត្តិសាស្ត្ររបស់ក្លឹប និងជាការប្រកួតដ៏ធំបំផុតរបស់ពួកគេក្នុងវគ្គ League Phase ។ ក្លឹប Kairat ក៏នឹងត្រូវទទួលក្រុមដែលទើបឡើងមកដូចគ្នា Pafos, ក្រុមក្រិក Olympiacos និង Club Brugge របស់បែលហ្សិកផងដែរ ខណៈដែលពួកគេត្រូវធ្វើដំណើរទៅជួប Inter Milan, Copenhagen, និង Arsenal។

ចំពោះក្រុម Real Madrid វិញ ការធ្វើដំណើរទៅកាន់ទីក្រុង Almaty គឺជាដំណើរក្រៅដីដ៏វែងឆ្ងាយបំផុតរបស់ពួកគេ។ ចម្ងាយផ្លូវអាកាសរវាងទីក្រុងកាហ្សាក់ស្ថាន និងរដ្ឋធានីអេស្ប៉ាញគឺជិត ៤,០០០ ម៉ាយល៍ ដែលវែងជាងចម្ងាយពីទីក្រុង New York ទៅ Los Angeles ជាងមួយដងកន្លះ។ កីឡាករល្អៗ និងល្បីៗ ដូចជា Kylian Mbappé, Vinicius Jr., Jude Bellingham និងមិត្តរួមក្រុមរបស់ពួកគេ នឹងត្រូវជាន់កីឡដ្ឋាន Central Stadium របស់ Kairat ជាលើកដំបូងដែលអាចផ្ទុកអ្នកគាំទ្របានជិត ២៤,០០០ នាក់ បន្ទាប់ពីការហោះហើររយៈពេល ១៣ ម៉ោង។

មូលហេតុដែលកាហ្សាក់ស្ថានលេងក្នុងពានរង្វាន់អឺរ៉ុប
កាហ្សាក់ស្ថានគឺជាប្រទេសធំជាងគេទី ៩ របស់ពិភពលោកតាមទំហំផ្ទៃដី ប៉ុន្តែមានតែប្រហែល ១៥ ភាគរយនៃទឹកដីរបស់ខ្លួនប៉ុណ្ណោះ ដែលស្ថិតនៅអឺរ៉ុបខាងកើត (ភាគខាងលិចនៃទន្លេ Ural)។ ទោះជាយ៉ាងណាក៏ដោយ សហព័ន្ធបាល់ទាត់កាហ្សាក់ស្ថានបានក្លាយជាសមាជិក UEFA តាំងពីឆ្នាំ ២០០២ មកម្ល៉េះ ដែលអនុញ្ញាតឱ្យក្រុមបាល់ទាត់កាហ្សាក់ស្ថានប្រកួតប្រជែងនៅក្នុងពានរង្វាន់អឺរ៉ុបដោយមិនគិតពីទីតាំងភូមិសាស្ត្រ។
ទីក្រុង Almaty ដែលស្ថិតនៅចុងភាគអាគ្នេយ៍នៃប្រទេសគឺនៅឆ្ងាយពីព្រំដែនជាមួយប្រទេសចិនមិនដល់ ២០០ ម៉ាយល៍ផង។ រាល់ការប្រកួតក្នុងផ្ទះរបស់ Kairat នឹងចាប់ផ្តើមនៅម៉ោង Champions League ៩:៤៥ យប់ ដែលត្រូវនឹងម៉ោង ១១:៤៥ យប់ ម៉ោងនៅកម្ពុជា។

តើនរណាខ្លះលេងឱ្យ Kairat Almaty?
ទោះបីជាមានលក្ខណៈសម្បត្តិគ្រប់គ្រាន់សម្រាប់ Champions League ក៏ដោយ ក៏ Kairat មិនទាន់បានបន្ថែមឈ្មោះកីឡាករល្បីៗណាមួយទៅក្នុងក្រុមរបស់ពួកគេនៅឡើយទេ។ ក្រុមនេះភាគច្រើនត្រូវបានបង្កើតឡើងដោយកីឡាករកាហ្សាក់ស្ថាន ជាមួយនឹងកីឡាករនាំចូលមួយចំនួនមកពីព័រទុយហ្គាល់ និងប្រេស៊ីល។ គ្មាននរណាម្នាក់ក្នុងចំណោមពួកគេធ្លាប់លេងក្នុងពានរង្វាន់កំពូលរបស់អឺរ៉ុបពីមុនមកទេ។
មានតែកីឡាករខ្សែបម្រើអ៊ីស្រាអែល Ofri Arad និង Dan Glazer ប៉ុណ្ណោះ ដែលនាំមកនូវបទពិសោធន៍អន្តរជាតិច្រើនជាងគេ ដោយធ្លាប់លេងឱ្យក្រុមជម្រើសជាតិរបស់ពួកគេជាច្រើនដង ៕

ប្រភព ៖ បរទេស