ក្រុមបាល់ទាត់ Cambodia Football Super Stars បានរៀបចំព្រឹត្តិការណ៍បាល់ទាត់សប្បុរធម៌ជាថ្មីម្ដងទៀតក្រោមមូលបទ ” យើងរួមគ្នាលើកស្ទួយជួយគុនខ្មែរ” ត្រូវបានធ្វើឡើងនៅកីឡដ្ឋាន ស្តាតចាស់ កាលពីថ្ងៃទី ២៩ ខែតុលា ឆ្នាំ ២០២៤ ។

នេះមិនមែនជាលើកទី១ ឡើយសម្រាប់ក្រុមបាល់ទាត់ Cambodia Football Super Stars ដែលជានិច្ចកាលក្រុមបាល់ទាត់មួយនេះដែលមានសុទ្ធសឹងតែជាតារា សិល្បៈករ ប្រចាំប្រទេសកម្ពុជា តែងតែបង្កើតកម្មវីធីប្រកួតបាល់ទាត់សប្បុរសធម៌ជាច្រើនហូហែរកន្លងមក ។

ការប្រកួតកីឡាបាល់ទាត់មិត្តភាពសប្បុរសធម៌ ដែលធ្វើឡើងនាថ្ងៃទី ២៩ ខែតុលា ឆ្នាំ២០២៤ នេះ ប្រកួតជាពីរក្រុម គឺ Cambodia Football Super Stars B ជាមួយនឹងក្រុម MC គុនខ្មែរ និងមួយក្រុមទៀត Cambodia Football Super Stars A ប្រកួតជាមួយក្រុម កីឡាករគុនខ្មែរ ។

ឯកឧត្តម ខូវឆាយ ប្រធានសហព័ន្ធប្រដាល់គុនខ្មែរ បានលើកឡើងថាការប្រកួតបាល់ទាត់មិត្តភាពសប្បុរសធម៌
ក្រោមមូលបទ ” យើងរួមគ្នាលើកស្ទួយជួយគុនខ្មែរ” បានប្រព្រឹត្តឡើងក្រោម គំនិតផ្ដួចផ្ដើមដ៏ខ្ពង់ខ្ពស់ប្រកបដោយចក្ខុវិស័យវែងឆ្ងាយ របស់សម្ដេចអគ្គមហសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមព្រឹក្សាផ្ទាល់ព្រះមហាក្សត្រ និងទទួលបានការគាំទ្រដ៏ខ្ពង់ខ្ពស់របស់សម្ដេច មហាបវរធិបតី ហ៊ុន ម៉ាណែត ក្នុងគោលបំណងស្វែងរកសប្បុរសជនរួមគ្នា ក្នុងធ្លុងមហាសាមគ្គីជាតិខ្មែរ ដើម្បីជួយគាំទ្រក្នុងវិស័យគុនខ្មែរ ដែលកំពុងមានការគាំទ្រយ៉ាងផុលផុសពីសំណាក់បងប្អូនប្រជាពលរដ្ឋខ្មែរ និងនាំគ្នាលើកស្ទួយអភិវឌ្ឍឱ្យកាន់តែល្បីល្បាញលើឆាកអន្ដរជាតិនាពេលខាងមុខ ។

ប្រធានសហព័ន្ធបានបន្ថែមទៀតថា នេះជាការបោះជំហ៊ានថ្មីមួយទៀតរបស់សហព័ន្ធប្រដាល់គុនខ្មែរ ដែលអាចមានមូលនិធិគាំទ្រដល់ក្លឹបប្រដាល់មួយចំនួនដែលកំពុងជួបបញ្ហា និងការខ្វះខាត ហេដ្ឋារចនាសម្ព័ន្ធ ឧបករណ៍ សំភារៈហ្វឹកហាត់ប្រចាំថ្ងៃ និងការបញ្ជូនកីឡាករទៅចូលរួមប្រកួតប្រជែងក្នុងព្រឹត្តិការណ៍ធំៗទាំងក្នុងស្រុក និងក្រៅប្រទេស ដែលជាយុទ្ធនាការ ក្នុងការកសាងធនធានមនុស្សកម្រិតមូលដ្ឋាន ដើម្បីបន្ដនិរន្តរភាព និងរក្សាបាននូវគុណផលកីឡា សំដៅធ្វើឲ្យប្រដាល់គុនខ្មែរនៅតែជាកីឡាដែលមានសក្ដានុពលឈានមុខគេនៅក្នុងប្រទេស ក៏ដូចជាទៅចូលរួមប្រកួតលក្ខណៈអន្ដរជាតិផងដែរ។

ព្រឹត្តិការណ៍នាពេលនេះក៏មានការចូលរួមពី ឯកឧត្តម បណ្ឌិត ថោង ខុន ទេសរដ្ឋមន្រ្តី ទទួលបន្ទុកបេសកកម្មពិសេស និងជាប្រធានគណៈកម្មការជាតិអូឡាំពិកកម្ពុជា តំណាងដ៏ខ្ពង់ខ្ពស់ សម្ដេច មហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ។

កម្មវីធីសប្បុរសធម៌ខាងលើនេះក៏មានការចូលរួមពី MC និងក្រុមការងាររបស់ CTS Sport ផងដែរ។ សូមរង់ចាំមើលថា ក្រុមបាល់ទាត់ Cambodia Football Super Stars នឹងរៀបចំកម្មវីធី សប្បុរសធម៌អ្វីបន្ដទៀតនាពេលខាងមុខឆាប់ៗនេះ ។

អត្ថបទ ៖ CTS Sport