ទៅបាត់គឺបាត់ហើយ មែនវិលល្ងាចទេណា Speed នេះនៅដំណើរមកចូលរួមព្រឹត្តិការណ៍ប្រជុំរថយន្តប្រណិត Gumball 3000 ដែលត្រូវឆ្លងកាត់ ៥ ប្រទេសនៅអាស៊ាន មានវៀតណាម កម្ពុជា ថៃ ម៉ាឡេស៊ី និងសិង្ហបុរី ក្មេងខិលជា YouTuber កំពូលកូរមួយរូប គឺ IshowSpeed បានចាប់ផ្តើមបញ្ចេញសកម្មភាពចម្លែកៗរបស់ខ្លួនជាបណ្តើរៗហើយ នេះក៏កំពុងផ្ទុះការចាប់អារម្មណ៍ ជាពិសេសបងប្អូននៅកម្ពុជាយើងដែលត្រៀមបានឃើញវត្តមានក្មេងប្រុសវ័យ ១៩ ឆ្នាំ ហាក់បានលាន់មាត់នូវការយល់ឃើញបែបអស់សំណើចខុសៗគ្នា។
ដូចប្រិយមិត្តបានដឹង គម្រោងក្បួនរថយន្ត Gumball 3000 ដែលឆ្លងកាត់ប្រទេសកម្ពុជា រយៈពេល ៣ ថ្ងៃ ចាប់ពីថ្ងៃទី ១៥ ១៦ និង ១៧ ហើយចំថ្ងៃទី ១៦ គឺមានរៀបចំនៅឯខេត្តសៀមរាប ទឹកដីអច្ឆរិយនៃប្រាសាទអង្គរវត្ត។ ជ្រៀតមកក្នុងវិស័យកីឡា ក៏ជឿបងប្អូនយើងចាប់អារម្មណ៍បុគ្គល ២ រូប ដែលពួកគេពិតជាចង់ឃើញចង់ជួបផ្ទាល់ រួមមាន IshowSpeed និង Patrice Evra ត្រង់មួយជា YouTuber តែងភ្ជាប់ខ្លួនទៅក្នុងការប្រកួតបាល់ទាត់ធំៗ ក៏រាប់ជាអ្នកគាំទ្រមួយទំហឹងរបស់ Cristiano Ronaldo នេះសូម្បីរថយន្ត Lamborghini របស់គេ ក៏តុបតែងបិទស្កុត CR7 & ព័រទុយហ្គាល់ តាំងពីបាតដល់ដំបូលឡាន អ្នកទីពីរគឺ Evra រាប់ជាមិត្តជិតដិតនឹង Ronaldo ដូចគ្នា ហើយក៏ជាអតីត Legend របស់ Man United ធ្លាប់ជាចំណែកធំជួយក្លឹបកាន់ពាន UEFA Champions League ឆ្នាំ ២០០៨។
ចំពោះ Evra តាមរយៈការអាប់ដែតសកម្មភាពរបស់លោកលើបណ្តាញសង្គម ហាក់មិនទាន់ឃើញបង្ហាញតម្រុយថាមកដល់ទឹកដីអាស៊ីអាគ្នេយ៍នៅឡើយ តែបកមក Speed គឺបានធ្វើដំណើរមកដល់ប្រទេសថៃហើយ បន្ទាប់តែការបញ្ចេញវីដេអូមុននេះលើ Channel YouTube ផ្ទុះ View ចូលខ្ទង់រាប់សិបមុឺននាក់។
គេបានបង្ហាញត្រួសៗអំពីសកម្មភាពនៅឯប្រទេសថៃ គ្រាន់បើកក្បាលវីដេអូភ្លាមៗ ចេញសកម្មភាពប្លែកៗភ្លែត ផ្ទុះការចាប់អារម្មណ៍ចែករំលែកពាសពេញបណ្តាញសង្គមនានា។ Speed គេបានទៅសុំពូម្នាក់ រៀនបើកម៉ូតូកង់បី ហើយគេដាក់ត្រចៀកផ្ទៀងស្តាប់ពីរបៀបក្នុងការបើកបរ មើលទៅទំនងណាស់ ដល់តែបានប៉ុន្មានវិនាទី ក៏ស្រាប់តែមូលហ្គ៊ែរជ្រុល រកហ្រ្វាំងចាប់មិនឃើញ ជ្រុលមួយទំហឹងទៅបុកនឹងរបងវត្ត ប៊ិះតែនឹងខូចខាតរថយន្តមួយគ្រឿងក្បែរនោះទៀតផង។ ភ្លាមៗមិត្តភក្តិដែលនៅជិះពីក្រោយ ស្រែកផងអីផង រកលោតចុះផង តែទីបញ្ចប់ Speed ជាអ្នកបើកបរទេ ហាក់រងរបួសមួយរំពេច ក្រោយគេបានផ្លោងលោតចេញពីម៉ូតូកង់បី។
បន្តបន្ទាប់ពីនោះ ចាប់អារម្មណ៍ត្រង់ប្លង់គេស្រែកសម្លេង SIUUU នៅចំពោះមុខអ្នកគាំទ្រដែលដេញតាមគេសុំថតសុំចុះហត្ថលេខា ហើយអត្តចរិតខូចខិលជាមួយកញ្ញាៗនៅតែមានដដែល ដោយត្រង់កំពុងជិះរថយន្តគេបានលេបខាយសម្តី ជាមួយកញ្ញាម្នាក់ មុនចុះទៅភ្លក់អាហារនៅតាមដងផ្លូវ។ កាយវិការចម្លែកៗរបស់ Speed ទទួលបានមតិអស់សំណើចជាច្រើនពីអ្នកគាំទ្រ ខ្លះទៅថា Speed ប្រហែលច្រឡំម៉ូតូកង់បីអត់មាន ABS ដូច Lamborghini ខ្លះទៀតថា Speed ប្រហែលទំនេរជ្រុល បានប្រសព្វគិតឃើញរឿងអីប្លែកៗ។
យ៉ាងណាជារួមមក យើងជឿថាវត្តមានរបស់ Speed មកដល់កម្ពុជាថ្ងៃខាងមុខនេះ ក៏នឹងពិតជាបានចូលរួមចំណែកក្នុងការផ្សព្វផ្សាយ លើកកម្ពស់វិស័យទេសចរណ៍កម្ពុជាទៅកាន់ពិភពលោក តាមរយៈវីដេអូផ្សព្វផ្សាយរបស់គេជាក់ជាមិនខាន។ ចុះបងប្អូនយើងវិញ បើបានជួប Speed តើនឹងធ្វើអីមុនគេ?
ប្រភព៖ បរទេស
