Sergio Ramos បដិសេធមិនប្រៀបធៀបសមត្ថភាពរវាងខ្សែប្រយុទ្ធ Salah ជាមួយកីឡាករ Cristiano Ronaldo និង Lionel Messi ទេ ព្រោះវាខុសគ្នាឆ្ងាយពេក។
Salah ដែលរកបាន៤៤គ្រាប់គ្រប់ការប្រកួតទាំងអស់នារដូវកាលនេះ ត្រូវបានអ្នកគាំទ្រមួយចំនួនកំពុងតែប្រៀបធៀបរូបគេទៅនឹង Ronaldo ឬ Messi ហើយ។ យ៉ាងណាមិញ លេងល្អទើបបាន១រដូវកាល ធ្វើឱ្យកីឡាករមួយចំនួន ដូចជា Ramos ជាដើម បដិសេធចំពោះការប្រៀបធៀបធំពេករបស់អ្នកគាំទ្រ។ ដោយ Ramos គិតថាខ្សែប្រយុទ្ធអេហ្ស៊ីបរូបនេះល្អណាស់រដូវកាលនេះ ប៉ុន្តែមិនទាន់អាចយកទៅប្រៀបជាមួយកីឡាករកំពូល២នាក់ទៀតបានទេ។
“ប្រៀបធៀបកីឡាករជាមួយ Ronaldo និង Messi គឺជារឿងមួយដែលអ្នកមិនគួរធ្វើនោះទេ។ Salah ជាកីឡាករល្អ ច្បាស់ណាស់។ គាត់បានបង្ហាញនៅឆ្នាំនេះ ហើយគាត់ទទួលបានពានរង្វាន់ជាច្រើន។ ប៉ុន្តែគាត់ត្រូវបង្ហាញវាឱ្យល្អច្រើនឆ្នាំទៀត ទើបអាចប្រៀបធៀបគ្នាបាន”។ សម្ដី Ramos ។
ប្រធានក្រុម Real Madrid នឹងត្រូវនាំក្រុមរបស់ខ្លួនលេងតទល់ជាមួយក្រុម Liverpool ដែលមាន Salah ជាខ្សែប្រយុទ្ធនៅរាត្រីម៉ោង១:៤៥នាទីនេះ៕ប្រភព៖ DailyMail
