បើក្រឡេកភ្នែកមួយភ្លែតដោយមិនបានអានអក្សរ យើងនឹងច្រឡំស្មានតែជារថយន្តធ្វើដំណើររបស់ក្លឹបបាល់ទាត់អាជីពមួយទៅហើយ។ ប៉ុន្ដែមិនមែនទេ នេះជារថយន្តធ្វើដំណើររបស់ ក្រុមកីឡាបាល់ទាត់តារាកម្ពុជាដែលប្រមូលផ្ដុំដោយសិល្បៈករល្បីៗ មកពីជំនាញផ្សេងៗគ្នាក្នុងព្រះរាជាណាចក្រកម្ពុជាដែលមានឈ្មោះជាភាសាអង់គ្លេសថា Cambodia Football Super Stars ( CFSS ) ។

ជាការពិត កាលពីពេលថ្មីៗនេះ ត្រូវបានសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ដ្រីនៃព្រះរាជាណាចក្រកម្ពុជា និងជាគ្រូបង្វឹកកិត្តិយសក្រុមបាល់ទាត់​តារា​កម្ពុជា បានឧបត្ថម្ភរថយន្តក្រុងដ៏ទំនើបថ្មីសន្លាងមួយគ្រឿង ដើម្បីងាយស្រួលឱ្យក្រុមកីឡាករធ្វើដំណើរទៅប្រកួតបាល់ទាត់សប្បុរសធម៌តាមបណ្ដាខេត្តក្រុងនានា​ ក្នុងន័យបំផុសគំនិតយុវជន “នាំគ្នាលេងកីឡា ជៀសឆ្ងាយពីគ្រឿងញៀន”។

រថយន្ដដ៏ទំនើបមួយនេះ បានធ្វើការឌីហ្សាញដ៏ទាក់ទាញ ជាមួយនឹងពណ៌ខ្មៅដ៏អំណាច អមជាមួយទង់ជាតិព្រះរាជាណាចក្រកម្ពុជា ទៀតនោះ ធ្វើអោយមហាជន ជាពិសេសអ្នកគាំទ្របាល់ទាត់នៅកម្ពុជា លាន់មាត់សរសើរគ្រប់ៗគ្នាថា ពិតជាស្រស់ស្អាតខ្លាំងណាស់ ដែលស័ក្ដិសម ឈ្មោះជាក្រុមតារាកម្ពុជាពិតៗ ។

គួរបញ្ជាក់ផងដែរ រថយន្ដក្រុងធ្វើដំណើរដ៏ស្រស់ស្អាតនិងទំនើបមួយនេះមានតម្លៃប្រហែល ៨ម៉ឺនដុល្លា ដែលបានបើកសម្ភោធ លើកទី១ទៅកាន់ខេត្តកំពតកាលពីពេលថ្មីៗនេះ ក្នុងកម្មវីធី “អបអរសាទរ ព្រែកជីហ្វូណន” ដែលជាការជួបគ្នារវាងក្រុមតារាកម្ពុជា និង រដ្ឋបាលខេត្តកំពត ក្នុងនោះក៏មានការចូលរួមពីក្រុម MC CTS Sport ពួកយើងចូលរួមផងដែរ ។