France Football ជាស្ថាប័នសារព័ត៌មានបារាំង ដែលបង្កើតឡើងតាំងឆ្នាំ ១៩៤៦ ពោលមានអាយុកាល ៧៨ ឆ្នាំមកហើយ ដោយក្រោយនោះមួយទសវត្សពួកគេក៏ប្រកាសបង្ហាញនូវពានឯកត្តជនបាល់មាសឲ្យឈ្មោះ Ballon d’Or តំណាងការផ្តល់ជូនកីឡាករល្អបំផុតប្រចាំឆ្នាំនីមួយៗ។
ទន្ទឹមការផ្តល់ជូន ៦៧ សម័យ ក៏មានសម័យកាលមួយត្រូវបានរំលង ប្រកាសរំសាយចោលមិនបោះឆ្នោតយកអ្នកឈ្នះ នោះគឺកាលឆ្នាំ ២០២០ គ្រាផ្ទុះជំងឺរាតត្បាតទូទាំងសកលលោក COVID-19។ វាជាពេលវេលាដែលបុគ្គលមួយចំនួន មានការសោកស្តាយ ជាពិសេសចំពេលដែលពួកគេបង្ហាញទម្រង់លេងល្អ ធំបំផុតនោះគឺ Robert Lewandowski។
នារដូវកាល ២០១៩/២០ ខ្សែប្រយុទ្ធសញ្ជាតិប៉ូឡូញ បានជួយក្លឹបយក្ស Bayern Munich កាន់ពាន ៣ នារដូវកាលទោលមាន Champions League, Bundesliga និង DFB-Pokal ហើយសរុប ៤៧ ប្រកួតហែលកាត់ គេរកបានដល់ទៅ ៥៥ គ្រាប់។ បើធៀបបេក្ខភាពដទៃក្នុងល្បាក់ពេលវេលាដូចបង្ហាញ គឺគ្មាននរណាអាចសម្រេចសមិទ្ធផលបានខ្ពស់ដូច Lewandowski ឡើយ ជាការសន្មតសឹង ៩៩,៩៩ ភាគរយ គេត្រូវក្លាយជាម្ចាស់ពាន Ballon d’Or ២០២០ ទៅហើយ តែស្តាយគ្រប់យ៉ាង France Football បានរំសាយចោល។
លុះតែរំលងទៅកាន់ឆ្នាំបន្ទាប់ ២០២១ ដែលស្ថាប័នខាងលើប្រកាសអ្នកឈ្នះ នៅក្នុងខែវិច្ឆិកា គឺប្រកាសឲ្យទៅ Lionel Messi ហើយ Lewandowski ឈរនៅលេខរៀងទី ២ មាន ៥៨០ ពិន្ទុ ចាញ់តារាឆ្នើមអាហ្សង់ទីនមាន ៦១៣ ពិន្ទុ។ ក្នុងពេលវេលានោះ បានផ្ទុះការជជែកវែកញែកឥតឈប់ ក៏អ្នកគាំទ្រខ្លះមិនអស់ចិត្ត ដល់បោះពាក្យថា “France Football ចាក់ខ្សែ” ហើយវាអយុត្តិធម៌បំផុតសម្រាប់អតីតខ្សែប្រយុទ្ធរបស់ក្លឹប Bayern។
រហូតមកទល់ឆ្នាំ ២០២៤ នាកំឡុងបួនឆ្នាំបន្ទាប់ ចាប់តាំងដើមឆ្នាំបានមានការស៊ើបអង្កេតដ៏ធំមួយពាក់ព័ន្ធនឹងការស្វែងរកភាពយុត្តិធម៌ជូនកីឡាករកំពុងឈរជើងឲ្យក្លឹប Barcelona ហើយមកទល់ល្បាក់ពាក់កណ្តាលឆ្នាំ ក៏ស្រាប់មានរបាយការណ៍ថា France Football កំពុងពិចារណាលម្អិតម្តងហើយម្តងទៀត ពោលនឹងមានភាគរយខ្ពស់ អាចផ្តល់ជូនពាន Ballon d’Or 2020 ដែលពួកគេបានឆាចោលនោះ មករកម្ចាស់ផ្លូវការតែម្តង នៅឆ្នាំតែមួយ នៃការប្រកាសអ្នកឈ្នះ Ballon d’Or 2024។
ក៏មានន័យថា Lewandowski គេអាចនឹងកាន់ពាន Ballon d’Or 2020 នៅក្នុងឆ្នាំនេះ ហើយក៏ត្រូវបានគ្រប់គ្នាទទួលស្គាល់ជាផ្លូវការ ស្របពេលអ្នកឈ្នះប្រចាំឆ្នាំ ២០២៤ មួយគ្រឿងផ្សេងទៀត អាចជារវាងចំណោមកីឡាករ Real Madrid/Borussia Dortmund ឬសមាសភាពបង្ហាញទម្រង់ល្អឥតខ្ចោះណាមួយក្នុងព្រឹត្តិការណ៍ EURO ឬ Copa America ខាងមុខ។
ពាក់ព័ន្ធនឹងរឿងរ៉ាវខាងលើនេះដែរ កីឡាករវ័យ ៣៥ ឆ្នាំក៏បានបង្ហាញចំណាប់អារម្មណ៍យ៉ាងដូច្នោះ៖ “នៅឆ្នាំ ២០២០ និង ២០២១ វាជាពេលវេលាដ៏ល្អបំផុតក្នុងអាជីពរបស់ខ្ញុំ កន្លងទៅក៏មានទាំងមិត្តភក្តិម្នាក់គេបានផ្ញើស្ថិតិឲ្យខ្ញុំមើលថាចន្លោះពេលនោះ ៨៥ ប្រកួត ខ្ញុំរកបានដល់ទៅ ១០០ គ្រាប់ នេះជាការពិតខ្ញុំ នឹងនៅតែព្រមទទួលយក Ballon d’Or នៅថ្ងៃណាមួយ ព្រោះដោយសារខ្ញុំអត់ទាន់ធ្លាប់មានវាសោះ អ៊ីចឹងអារម្មណ៍ពេលនេះ ទោះ ៤ ឆ្នាំហួសហើយក៏ដោយ ក៏នៅតែរីករាយ និងមានកិត្តិយសជាពន់ពេកក្នុងការកាន់វាជាផ្លូវការដែរ”៕
ប្រភព៖ បរទេស
