គ្រប់ការសម្រេចចិត្តក្នុងការនាំចូលនរណាម្នាក់ បន្ទាប់តែឆ្លងការមើលយ៉ាងជាក់លាក់ពីសំណាក់អ្នកចាត់ការ ជំហានបន្ទាប់គឺត្រូវទទួលបានការយល់ព្រមពីសំណាក់ថ្នាក់លើ ឬជាប្រធានក្លឹប។ ចំណុចនេះ ធ្លាប់មានរឿងហេតុខ្លះ ចម្រូងចម្រាសគ្នាឈានដល់ការដកតំណែង ឬគ្រូសុំប្រកាសលាឈប់ក៏មាន តែកន្លងមកនៅ Real Madrid វាហាក់ដូចជាមិនប៉ះអីខ្លាំងនោះទេ បើទោះបីការចង់បានរបស់ Carlo Ancelotti និង Florentino Perez ផ្ទុយស្រឡះពីគ្នាក៏ពិតមែន។
ថយក្រោយទៅរដូវក្តៅ ឆ្នាំ ២០២៣ គ្រាទីផ្សារដោះដូរបើកទ្វារថ្មីថ្មោង ពេលនោះគ្រូសញ្ជាតិអ៊ីតាលី ពិតជាចាប់អារម្មណ៍ចង់បាន Harry Kane ដែលកំពុងឈរជើងនៅ Tottenham Hotspur ជាខ្លាំងពន់ពេក ពោលដាក់ឈ្មោះរបស់ប្រធានក្រុមអង់គ្លេសរូបនេះ ពីលើទាំង Jude Bellingham ជាខ្សែបម្រើកំពុងលេចធ្លោសព្វថ្ងៃទៀតផង។
យ៉ាងណាសំណើពី Ancelotti មិនបានរង្គើចិត្ត Perez ដែលជាប្រធាននោះទេ ក៏ព្រោះត្រង់ថា ស្តេចវិនិយោគពូកែកើបផលចំណេញវ័យ ៧៧ ឆ្នាំ លោកនៅតែរក្សាជំហរ ឆន្ទៈ ស្មោះស្ម័គ្រតែជាមួយបេក្ខភាពចាស់ Kylian Mbappe ម្នាក់គត់។ ជាហេតុបដិសេធការចង់បានរបស់គ្រូ បើទោះបី នៅប្រយុទ្ធប្រអប់ខាងលើពេលនោះ មិនទាន់រកបាននរណាមកជំនួសកន្លែង Karim Benzema ដ៏សក្ដិសម។
ជំនួសមកវិញ Perez បើកភ្លើងខៀវ តែសម្រាប់ការនាំចូលខ្សែបម្រើខាងក្រោមមួយគត់ ទើបជាហេតុ Ancelotti ត្រូវបង្ខំចិត្ត ងាកមកមើលកីឡាកររួមសញ្ជាតិតែមួយរបស់ Kane គឺ Bellingham និងចរចាសម្រេចក្លាយជាកីឡាករមកទល់បច្ចុប្បន្ន។ នេះបើតាមសារព័ត៌មាន Relevo ចុះផ្សាយ។
បកមកស្ថានភាពពេលឥឡូវ បើសួរថា តើការសម្រេចចិត្តរបស់ Perez ខុសឬត្រូវ ដែលបិទផ្លូវ Ancelotti មិនឲ្យយក Kane? ចម្លើយសម្រាប់ពួកយើងគឺ ៥០/៥០ ព្រោះត្រង់ Bellingham ដែល Real យកបាន គេក៏កំពុងពេញល្អ ដល់ហើយទៅមើល Mbappe នៅ PSG ក៏មិនធ្លាក់ទម្រង់ធ្លាក់ជើងអ្វីថែមទៀត ដូចគ្នានឹង Kane នៅ Bayern ក៏កំពុងជក់ស៊ុតឥតប្រណី កើនគ្រាប់បាល់ម្នាក់ៗសុទ្ធជាលំដាប់ Top Scorer។ ពេលទៅមុខ Perez ដែលជាមេជាកើយ ក៏នៅតែរក្សាកូនចិត្តចង់យក Mbappe ដដែល ហើយត្រៀមថ្ពក់ក្នុងលក្ខខណ្ឌឥតតម្លៃខ្លួននាពេលវេលាដ៏ខ្លីខាងមុខ តែបែរបរាជ័យហើយចង់បកទៅ Kane នោះគឺឡើងហើយ ឡើងពីជាង ៩០ មកទល់ ១១០ លានអឺរ៉ូបតូចបំផុត។
ចុងក្រោយទៅមើលចចាមអារ៉ាមពាក់ព័ន្ធមួយផ្សេងទៀតរវាងក្លឹបអាល្លឺម៉ង់ និងអេស្ប៉ាញខាងលើ គឺ Bayern កំពុងពិចារណាចង់បាន Ferland Mendy ដោយព្រមដោះដូរស្មើរវាង Alphonso Davies។ គ្រប់យ៉ាងគឺចង់ឲ្យកើតឡើងត្រឹមរដូវក្តៅ គ្រោងបិទរដូវកាលខាងមុខ ជាជាងបន្តទុកកីឡាករកាណាដា ជើងល្បឿនតំបន់ស្លាប ដល់អស់តម្លៃខ្លួននាឆ្នាំបន្ទាប់។ នេះបើតាមសារព័ត៌មាន L’Equipe ចុះផ្សាយ។
ងាកទៅ Mendy ចំពោះគុណភាព ទេពកោសល្យកីឡាករបារាំង ក៏បានអូសទាញចិត្តក្លឹបដទៃផ្សេងទៀត ឲ្យចាប់អារម្មណ៍ចង់បានគេ តួយ៉ាងគឺ Liverpool, Arsenal, Newcastle United និង Napoli ដែលគេអាចមានហាងឆេងតម្លៃខ្លួន ក្រោម ៤០ លានអឺរ៉ូ។
ស្ថិតិរដូវកាលនេះ Davies ៣៧ ប្រកួត គេរកបាន ១ គ្រាប់ Assist ៤ ខណៈ Mendy ៣២ ប្រកួត រកបាន ១ គ្រាប់ Assist ០។ អ្នកទាំងពីរប្រុងជួបគ្នា នៅវគ្គ ៤ ក្រុមចុងក្រោយ ពានរង្វាន់ UEFA Champions League ក៏នឹងមានផ្សាយបន្តផ្ទាល់លើទំព័រ CTS SPORTS នាវេលាម៉ោង ០២:០០ នាទីទៀបភ្លឺ ឈានចូលថ្ងៃពុធទី ០១ ឧសភាខាងមុខផងដែរ៕
ប្រភព៖ បរទេស