និមិត្តសញ្ញាឬ Logo នៃបណ្តាក្លិបបាល់ទាត់នីមួយៗ គឺសុទ្ធសឹងមានបង្កប់អត្ថន័យជ្រាលជ្រៅយ៉ាងច្បាស់លាស់ ពោលវារមែងសបង្ហាញអំពីអត្តសញ្ញាណពិសេសណាមួយ ដែលមនុស្សជាច្រើនមិនធ្លាប់បានដឹង។
ថ្មីថ្មោងមានរឿងគួរឲ្យចាប់អារម្មណ៍ទាក់ទងនឹងអនាគត Logo ក្លិបបាល់ទាត់អ៊ីតាលី Inter Milan ដែលកន្លងមកធ្លាប់ប្រទះមានផ្កាយត្រឹមមួយប៉ុណ្ណោះ ដល់តែឥឡូវមានការចុះផ្សាយថានៅរដូវកាលបន្ទាប់ ២០២៤/២៥ នឹងដាំផ្កាយចំនួន ២ ទៅលើឈុតនៃអាវរបស់ពួកគេគ្រប់ការប្រកួតទាំងអស់។ តើនៅពីក្រោយនោះ មានមូលហេតុឬអត្ថន័យពិសេសយ៉ាងណាដែរ?
ជាការពិត បើនិយាយឲ្យងាយយល់ងាយស្តាប់ ផ្កាយ ១ គឺតំណាងឲ្យការឈ្នះពានលីគកំពូល Serie A ចំនួន ១០ សម័យកាល។ នេះក្លឹបក្រោមការដឹកនាំដោយអ្នកចាត់ការលោក Simone Inzaghi ទើបតែបំបាក់ក្លឹបដឹកនាំដោយលោក Stefano Pioli នៅជំនួប Milan Derby ដោយលទ្ធផល ២-១ កាលពីទៀបភ្លឺថ្ងៃអង្គារ សម្រេចឲ្យពួកគេនាំមុខដាច់ពិន្ទុ ក្លាយជាម្ចាស់ជើងឯកលីគកំពូលអ៊ីតាលី ទាំងសេសសល់ ៥ ប្រកួតទៀតក្នុងដៃ។
វាជាការឈ្នះពានរង្វាន់លើកទី ២០ ហើយសម្រាប់ពួកគេ ដោយការកត់ត្រាលើកដំបូងនៅរដូវកាល ១៩០៩/១០ ទើបជាហេតុផលសម្រេចឲ្យ Inter អាចមានសិទ្ធដាំផ្កាយចំនួន ២ ពីលើ Logo របស់ពួកគេ សម្រាប់ឈុតនៅរដូវកាលបន្តបន្ទាប់។ មានតែក្លឹប ២ ផ្សេងទៀតប៉ុណ្ណោះ ដែលមានសិទ្ធដាំផ្កាយដូចជា Inter មួយគឺ AC Milan ឈ្នះ ១៩ សម័យ ទើបមានផ្កាយ ១ ខណៈមួយទៀតគឺ Juventus ឈ្នះ ៣៦ សម័យ មានដល់ផ្កាយ ៣។ អ៊ីចឹងមានន័យថា សេះបង្កង់អាចឈានដល់ការដាំផ្កាយ ៤ ប្រសិនឈានដល់ការលើកពាន Serie A ទី ៤០។
យ៉ាងណាបើងាកទៅក្របខ័ណ្ឌបាល់ទាត់ក្នុងប្រទេសដទៃ វាមិនសុទ្ធតែដូចគ្នាទាំងអស់ទេ ជាក់ស្ដែងដូចក្លឹបនៅអង់គ្លេស ករណីរបស់ Aston Villa និង Nottingham Forest ដែលមានបំពាក់ផ្កាយពីលើ Logo ដែរនោះ គឺក្រោមហេតុផលពិសេសផ្សេងពី Serie A ទៅទៀត។
សម្រាប់ពួកគេវាកាន់តែពិបាក ត្រង់ថា ១ ផ្កាយ តំណាងឲ្យការឈ្នះពានអឺរ៉ុប ១ សម័យ។ ជាការពិតយើងបកថយក្រោយទៅ Aston Villa ធ្លាប់បានសាងប្រវត្តិសាស្រ្តកាន់ពាន Champions League នៅរដូវកាល ១៩៨១/៨២ តាំងគ្រាពាននោះ នៅប្រើឈ្មោះ European Cup។ ពួកគេបានបំបាក់ Bayern Munich ១-០ នៅពីមុខអ្នកទស្សនារាប់មុឺននាក់នៅឯកីឡដ្ឋាន Rotterdam ប្រទេសហូឡង់។
បន្តទៅក្លឹប Nottingham Forest ឯណេះវិញ ក៏ដូចជា Villa Park ដែរ គ្រាន់តែព្រៃកំណាចធ្លាប់បានឈ្នះពានអឺរ៉ុប European Cup ដល់ទៅ ២ លើកជាប់ៗគ្នានៅឆ្នាំ ១៩៧៩ និង ១៩៨០ កាលនោះវាថ្មីថ្មោងបន្ទាប់តែអ្នកចាត់ការលោក Brian Clough ដឹកនាំក្លឹបឡើងមកកាន់លីគកំពូលបានពីររដូវកាល។
ចុងក្រោយច្បិចលើករឿង Huddersfield Town មកចែកជូនបងប្អូនបន្ថែមបន្តិច ចំពោះអត្ថន័យផ្កាយចំនួន ៣ លើ Logo របស់ពួកគេ គឺតំណាងឲ្យសមិទ្ធផលកម្រកើតមានកាល ៩០ ឆ្នាំមុន គឺការឈ្នះពានលីគកំពូល First Division នៅឆ្នាំ ១៩២៤, ១៩២៥ និង ១៩២៦ ជាការសាងកំណត់ត្រាឈ្នះ ៣ សម័យជាប់មុនគេបង្អស់៕
ប្រភព៖ បរទេស