គិតត្រឹមម៉ោងនេះវេលានេះ កីឡាកររកបានគ្រាប់បាល់ច្រើនបំផុតប្រចាំក្របខ័ណ្ឌ Premier League គឺជាខ្សែបម្រើកំពុងឈរជើងឲ្យក្លឹបក្រៅចំណាត់ថ្នាក់ Top 6 ជា Cole Palmer ឆ្លងកាត់ ២៨ ប្រកួត គេអាចរកបានដល់ទៅ ២០ គ្រាប់និង Assist ៩ លើកឯណោះ។
នេះយើងរាប់តែក្នុងលីគ ដោយឡែកបកទៅស្ថិតិជារួម គេរកបាន ២៥ គ្រាប់និង Assist ១៣ លើកហើយ ថ្មីថ្មោងទើបបង្កើតភាពភ្ញាក់ផ្អើលជាមួយការរកបាន ៤ គ្រាប់ទល់ក្លឹបស្ករគ្រាប់ខៀវ Everton។ ទន្ទឹមនឹងភាពល្បីល្បាញដែលកំពុងស្ទុះឡើងត្រឹមមួយពព្រិចភ្នែក ចុះអ្នកមានដឹងទេថា កីឡាករកម្ពស់បាន ១,៨៩ ម៉ែត្រ អាចរកបានប្រាក់ឈ្នួលប៉ុន្មានក្នុងមួយសប្តាហ៍ពីក្លឹបម្ចាស់ដី Stamford Bridge។
តាមកិច្ចព្រមព្រៀងចុងក្រោយជាមួយសុពលភាពកុងត្រាសេសសល់ដល់ចុងខែមិថុនា ឆ្នាំ ២០៣០ Palmer អាចរកបានត្រឹម ៨០ ០០០ ផោន/សប្តាហ៍ប៉ុណ្ណោះ។ នេះបើតាមសារព័ត៌មាន Daily Star បានចុះផ្សាយ។
វាជាតួលេខស្តួចស្តើងខ្លាំង បើធៀបនឹងកំពូលកីឡាករឯទៀត ក៏សូម្បីតែមិត្តរួមទ្រនំ Raheem Sterling ក៏មួយអាទិត្យលុយធ្លាក់ចូលហោប៉ៅ ៣២៥ ០០០ ផោនដែរ បែបនេះវាខុសគ្នាសឹងជិត ១ ជា ៤។ តែបើយើងវិភាគឲ្យស៊ីជម្រៅទៅ វាក៏មិនជារឿងចម្លែកអីខ្លាំងដែរ ព្រោះគ្រាផ្ទេរមកថ្មីថ្មោង Palmer ក៏មិនទាន់ជាកីឡាករលំដាប់ Superstar ពោលត្រឹមជាយុវជនថ្នាលមួយរូបដែល Man City បោះបង់។
តួលេខខាងលើ Palmer រាប់ថារកបានតិចជាងកីឡាករក្នុងក្រុមដល់ទៅ ១៣ រូប ជាក់ស្តែងដូចការទាបជាង Mykhailo Mudryk រកបានត្រឹម ១០ មុឺនផោន, Malang Sarr រកបាន ១២ មុឺនផោន និង Reece James រកបាន ២៥ មុឺនផោនជាដើម។
ក៏ប៉ុន្តែសម្រាប់ឱកាសទទួលបានការដំឡើងថ្មី វានៅតែអាចទៅរួចសម្រាប់យុវជនវ័យ ២១ ឆ្នាំ ពោលយូរបំផុតគឺនៅបិទរដូវកាលខាងមុខនេះឯង ឬម្យ៉ាងទៀតបើគេចង់ទទួលបានប្រាក់ឈ្នួលក្រាស់ក្រែល មើលតាមគុណភាព កត្តាអាយុ និងកេរ្តិ៍ឈ្មោះ ជម្រើសការផ្ទេរទៅក្លឹបដទៃនៅខាងក្រៅ យ៉ាងហោចក៏អាចរកបាន ១៥ មុឺនផោន/សប្តាហ៍ទាបបំផុត។
ចប់ពីរឿងនេះ CTS SPORTS ចង់ចែករំលែកព័ត៌មានចចាមអារ៉ាមលើទីផ្សារដោះដូរមួយផ្សេងទៀត អំពីអ្នកមានបុណ្យ Barcelona ដែលពីមុនធ្លាប់ក្រសោបជាប់ជើងក្រោម Ronald Araujo ឥឡូវល្ហៀងៗចង់លក់គេចេញហើយនៅរដូវក្តៅខាងមុខ។
ពីដំបូងឡើយក្លឹបដឹកនាំដោយលោក Xavi Hernandez បានដាក់ឈ្មោះកីឡាករអ៊ុយរុយហ្គាយក្នុងបញ្ជីកីឡាករខាងណាក៏ប៉ះមិនបាន ពោលដាច់ខាតមិនចង់លក់ចេញ ស្រាប់តែមួយរយៈក្រោយបន្ទាប់ការធ្លាក់ទម្រង់បន្តិច បូកផ្សំសមិទ្ធផលក្លឹបជារួមសម្រេចមិនចេញផ្លែផ្កាផង ក៏នាំឲ្យ Barca ឈានដល់ផែនការណ៍ចង់លក់ Araujo ចេញ ដើម្បីកើបលុយមួយដុំធំពីភាគីចង់បាន។
បញ្ហាហិរញ្ញវត្ថុក៏អាចជាកត្តាជំរុញឲ្យការគិតនេះរំលេចឡើងមក ត្រង់មានដំណឹង Manchester United, Bayern Munich និង Atletico Madrid មានការចាប់ចិត្តមកលើកីឡាករវ័យ ២៥ ឆ្នាំខាងលើ ហើយតាមហាងឆេងតម្លៃខ្លួនក្លឹបម្ចាស់ដី Camp Nou រំពឹងកើបប្រាក់ ១០០ លានអឺរ៉ូ ឬ ៨៥ លានផោន ពីដំណើរចែកផ្លូវរបស់គេ៕
ប្រភព៖ បរទេស