បើសួរថា តើជំនួបគូណាមួយពិសេសជាងគេក្នុងវគ្គ ៨ ក្រុមចុងក្រោយ UEFA Champions League? សម្រាប់ការយល់ឃើញរបស់ខ្ញុំ គឺសុំចុចយក Arsenal ទល់ Bayern Munich ជាជាងគូផ្សេងឯទៀត ត្រង់គូនេះខកខានជួបគ្នាច្រើនឆ្នាំមកហើយ រួចអ្វីដែលកាន់តែពិសេស គឺកំណត់ត្រាគ្រាប់បាល់ពីរជើង ១០-២ ក្លឹបអាល្លឺម៉ង់ធ្លាប់បានបំបាក់ទៅលើក្លឹបអង់គ្លេស។
កាលបរិច្ឆេទប្រកួតជើងទី ១ ធ្វើឡើងនៅទឹកដី Emirate Stadium ក្នុងទីក្រុងឡុង វេលាម៉ោង ០២:០០ នាទីទៀបភ្លឺ ឈានចូលថ្ងៃពុធ ទី ១០ មេសា ខណៈជើងទី ២ នៅម៉ោងដដែលនោះ ឈានចូលថ្ងៃព្រហស្បតិ៍ ទី ១៨ មេសា ក៏សុទ្ធសឹងនឹងមានផ្សាយបន្តផ្ទាល់លើទំព័រ CTS SPORTS។
ក៏ប៉ុន្តែមានចម្ងល់មួយ ដែលកំពុងផ្ទុះការជជែកពាសពេញបណ្តាញសង្គម ដោយត្រង់ថា អ្នកគាំទ្រ Arsenal អាចចូលដី Bayern តែអ្នកគាំទ្រ Bayern បែរមិនអាចចូលដី Arsenal ទៅវិញ។ តើនោះមកពីកត្តាអ្វី ជាទង្វើឬកាយវិការនៃការរើសអើងដោយប្រការណាមួយ ឬបែបណា?
ចម្លើយយ៉ាងខ្លី៖ វាគឺជាការដាក់ពិន័យរបស់ UEFA មកលើភាគីខាងក្លឹបនៅក្របខ័ណ្ឌ Bundesliga។ ដើមហេតុនៃដំណើរដើមទង បានកើតឡើងនៅថ្ងៃទី ០៦ មិនាកន្លងទៅថ្មីថ្មោង គ្រា Bayern ប្រកួតយកឈ្នះ ៣-០ ទៅលើ Lazio ក្នុងកីឡដ្ឋាន Allianz Arena ដែលអ្នកគាំទ្រក្លឹបម្ចាស់ផ្ទះមួយផ្នែកតូច បានបង្កភាពចលាចល ជុំវិញការគប់ភ្លើងនិងកាំជ្រួចទៅលើទីលាន។ ពាក់ព័ន្ធនឹងកាយវិការមិនសមរម្យនេះ សមាគមបាល់ទាត់អឺរ៉ុប UEFA បានសម្រេចដាក់ពិន័យ ហាមមិនឲ្យអ្នកគាំទ្រ Bayern ទាំងអស់ ចូលរួមទស្សនាប្រកួតក្រៅដីបន្ទាប់ទៀត ចំនួន ១ ប្រកួត។
ដោយឡែកងាកទៅភាគីខាងក្លឹប Bayern ក៏ព្រមទទួលយកការដាក់ពិន័យ ហើយសម្រេចនឹងមិនធ្វើការតវ៉ាអ្វីទាំងអស់។ ចំណុចនេះមានន័យថា ប្រកួតបន្ទាប់ក្រៅទឹកដី ដូចការប៉ះ Arsenal នេះសោត គឺហាមផ្តាច់មិនឲ្យអ្នកគាំទ្រ Bayern Munich ចូលរួមជាដាច់ខាត កុំថាឡើយអ្នកមានលុយរាប់មុឺនរាប់សែនទិញសំបុត្រលំដាប់ VIP បែបណាក៏ដោយ។
តែច្បាប់នេះ វានឹងត្រូវបានលើកលែងវិញ នៅប្រកួតក្រៅដីបន្ទាប់មួយផ្សេងទៀត ក្នុងករណី Bayern អាចឆ្លងផុតថ្វីជើង Arsenal ហើយបោះជំហានទៅជួបក្លឹបការពារជើងឯក Manchester City ឬស្តេចពាន UCL ១៤ សម័យ Real Madrid មិនថាតែនៅ Etihad ឬ Santiago Bernabeu។
បន្ទាប់ UEFA ចេញសេចក្តីប្រកាសសម្រេចការពិន័យខាងលើ ងាកទៅនាយកប្រតិបត្តិក្លឹប Bayern លោក Jan-Christian Dreesen បានលើកឡើង៖ “យើងត្រូវតែទទួលយកការដាក់ទណ្ឌកម្មសារនេះ ព្រោះមិនត្រឹមតែមានការដុតភ្លើងប៉ុណ្ណោះទេ តែថែមទាំងមានបាញ់តម្រង់ទៅលើទីលានទៀត វាពិតជាបង្កគ្រោះថ្នាក់ដល់អ្នកទស្សនាផ្ទាល់នៅទីតាំង វារាប់ជាការបំពានច្បាប់យ៉ាងច្បាស់”។
“នេះដោយសារតែទង្វើរបស់បុគ្គលមួយផ្នែកតូច បានធ្វើឲ្យប៉ះពាល់ដល់អ្នកគាំទ្រ និងក្លឹបទាំងមូលរបស់យើង”។ រំឭកថា វាមិនមែនជាលើកដំបូងឡើយ ដ្បិតអីកន្លងមកនៅដើមរដូវកាល ក៏មានអ្នកគាំទ្រ Bayern ធ្វើទង្វើស្រដៀងគ្នានេះ នាវគ្គចែកពូល ទល់ក្លឹប Copenhagen ហើយសារនោះ ក៏ UEFA ពិន័យប្រាក់ ៤០ ០០០ អឺរ៉ូ និងហាមឃាត់អ្នកគាំទ្រនៅប្រកួតក្រៅទឹកដីមួយលើកអ៊ីចឹងដែរ៕
ប្រភព៖ បរទេស