តើនរណាជាកីឡាករកំពុងបង្ហាញទម្រង់លេងល្អបំផុតនៅ Premier League សព្វថ្ងៃ? បើសំណួរនេះធ្លាក់ទៅដល់ដៃអ្នក ចុះចម្លើយនឹងផ្តល់មកវិញបែបណា។ អ្នកប្រហែលកំពុងគិត តែ Pep Guardiola ជាកំពូលអ្នកចាត់ការបទពិសោធន៍កាន់ឆ្នាំមួយរូប ឥតគិតយូរឡើយ ផ្ទុយទៅវិញបានចុចឈ្មោះសមាជិកក្នុងក្រុមបច្ចុប្បន្នគឺ យុវជនឆ្នើម Phil Foden។
នេះបន្ទាប់តែការបង្ហាញគុណភាពដ៏ល្អលើទីលានប្រកួត នៅឯ Etihad Stadium រាប់ជាចំណែកធំជួយរុញក្លឹបសំពៅមាស Manchester City យកឈ្នះទៅលើក្លឹបបិសាចក្រហម Manchester United កាលពីយប់មិញ ដោយលទ្ធផល ៣-១។ តឲ្យ Marcus Rashford ស៊ុតពីចម្ងាយបើកឆាកមុន លុះចូលដល់តង់ទីពីរ City លេងខូច លេងបត់តារាង អត់ឲ្យខាងភ្ញៀវមានបាល់លេងសោះ នេះជារួមគ្រប់គ្រង Possession ៧៣ ភាគរយ ខណៈចែកបាល់ឲ្យ United លេងតែ ២៧ ភាគរយត្រឹម។
ក្នុងចំណោមការស៊ុត ២៧ លើក ចេញច្រើនលើកច្រើនសារពីថ្វីជើងរបស់ Foden រហូតសម្រេចបាន ២ គ្រាប់ម្នាក់ឯង ផ្ទុះការស្ងើចសរសើរ សម្លេងហ៊ោរសាទរពេញកីឡដ្ឋាន ដល់ថ្នាក់ Guardiola ហ៊ានទាំងហៅឈ្មោះ អតីតក្មេងរើសបាល់ម្នាក់នេះ ជាកីឡាករល្អដាច់គេបង្អស់នៅលីគកំពូលទៀតផង ដ្បិតបើ Top Scorer បណ្តោះអាសន្ន ជាមនុស្សយន្ត Erling Haaland។
និយាយប្រាប់នៅកម្មវិធី Match of the Day របស់ BBC ក្រោយសម្រេចយកបាន ៣ ពិន្ទុ គ្រូសញ្ជាតិអេស្ប៉ាញ រៀបរាប់អំពីកីឡាករឆ្នើមអង់គ្លេសយ៉ាងដូច្នោះ៖ “Foden គេតែងតែជាកីឡាករមានទេពកោសល្យ របៀបដែលគេលេងមើលទៅកាន់តែធម្មជាតិ គេហាក់យល់អំពីការប្រកួតច្រើន ជាពិសេសវិធីការពារ”។
លោកបន្តថា៖ “នេះគេអាចលេងបានទាំងតំបន់កណ្ដាល ស្តាំ កាត់បាល់ចូលខាងក្នុង ក៏អាចរត់ចូលពីខាងឆ្វេង ហើយលេងមួយឆ្ងាញ់តាមរយៈការស៊ុតជំនាញជើងនោះ ឥឡូវតើខ្ញុំអាចរៀបរាប់អ្វីពីគេបន្ថែមទៀត Foden គេជាកីឡាករល្អបំផុតនៅ Premier League ពេលនេះហើយ បើមើលលើសមិទ្ធផលគេសម្រេចបាន វាពិតជាអស្ចារ្យខ្លាំងណាស់”។
“កីឡាករម្នាក់នេះ គេពិតជាស្រលាញ់បាល់ទាត់ ជីវិតគេរស់នៅដើម្បីតែបាល់ទាត់ គេរីករាយជាមួយវា ឆន្ទៈនៃការខិតខំរបស់គេស្ថិតនៅកម្រិតដ៏ខ្ពស់ឥតអាចកាត់ថ្លៃបាន”។ គួរឲ្យដឹងដែរថា កីឡាករវ័យ ២៣ ឆ្នាំ នៅស្ថិតិរដូវកាល ២០២៣/២៤ សរុបបង្ហាញខ្លួន ៤០ ប្រកួត រកបាន ១៨ គ្រាប់និង Assist ១០ លើក។
ចុងក្រោយសារទៅពាក្យពេជន៍ Guardiola ធ្លាប់និយាយសរសើរ Foden តាំងឆ្នាំ ២០១៩ បន្ទាប់គេបង្ហាញខ្លួនឲ្យឈុតធំបានពីរឆ្នាំម្ល៉េះ។ គ្រានោះ មានដំណឹងអាចលក់ចេញកីឡាករខាងលើ តែអតីតអ្នកចាត់ការ Barcelona ចេញមកអះអាងច្បាស់ៗថា ទោះស្ថិតក្នុងតម្លៃចរចាខ្ពស់ប៉ុណ្ណាក៏ដោយ ទោះក្លឹបខាងក្រៅឲ្យដល់ ៥០០ លានអឺរ៉ូ ក៏ City អត់លក់ចេញជាដាច់ខាត។ ឥឡូវ Foden ជាប់កុងត្រាដល់ចុងខែមិថុនា ឆ្នាំ ២០២៧ ជាមួយហាងឆេងល្បាក់ ១១០ លានអឺរ៉ូ៕
ប្រភព៖ បរទេស