២-២ លទ្ធផលស្មើយកបានមួយពិន្ទុ អាចជាអ្វីដែលម្ចាស់ផ្ទះ Valencia ប្រាថ្នាចង់បាន នៅប្រកួតទល់ Real Madrid ដល់ងាកទៅអធិរាជស នាមជាក្លឹបកំពុងនាំមុខចំណាត់ថ្នាក់កំពូលតារាង ពួកគេមានមហិច្ឆតាខ្ពស់ ផ្តោតយក ៣ ពិន្ទុ តែគ្រប់យ៉ាងវាមិនអាចកើតឡើង ក៏ដោយសារដំណើររាំងស្ទះចុងម៉ោងតែប៉ុន្មានវិនាទី ចេញពីសម្លេងកញ្ចែរបស់អាជ្ញាកណ្ដាល។
ជំនួបក្នុងកីឡដ្ឋាន Mestalla ដែលក្លឹបភ្ញៀវ Madrid សឹងបត់តារាងលេង ជាមួយស្ថិតិគ្រប់គ្រងបាល់ ៧២ ភាគរយ ពួកគេរកបាន ២ គ្រាប់ចេញពី Vinicius Jr ហើយខាងម្ចាស់ដីធ្វើបានដោយ Hugo Duro និង Roman Yaremchuk។ ដំណើរដ៏ក្តៅគគុកបានឆេះឡើងនៅកៀកបញ្ចប់តង់ទីពីរ ដែលអាជ្ញាកណ្តាលលោក Jesus Gil Manzano សញ្ជាតិអេស្ប៉ាញ ហាក់មមាញឹកខ្លាំងក្នុងការត្រួតពិនិត្យ VAR ផង និងរកការតវ៉ាឥតសំចៃមាត់ពីកីឡាករសងខាងផង។
ការប្រកួតទទួលបានម៉ោងបន្ថែម ៧ នាទី តែដល់នាទី ៩២ មានការពិនិត្យ VAR អំពីលទ្ធភាពផ្តល់បាល់ពិន័យ ១១ ម៉ែត្រជូនខាង Valencia វាទាមទារពេលវេលាដល់ ២ នាទី និង ១៣ វិនាទីក្នុងការសម្រេច ហើយក្រោយមកដល់នាទី ៩៨ ដែលបាល់កំពុងរត់មិនទាន់ឈប់ផងនោះ ជាមួយការក្រុសក្បែរប្រអប់ចេញពីជើង Brahim Diaz មកធ្លាក់ពេញជំហរ Jude Bellingham តែតបញ្ចប់ទីយ៉ាងស្អាត ក៏ស្រាប់តែអាជ្ញាកណ្ដាល Manzano មិនផ្តល់បាល់នោះឲ្យ រួចផ្លុំកញ្ចែកាត់ចង្វាក់បាល់ ជាការសម្រេចថា ការប្រកួតបានបញ្ចប់ហើយ អ៊ីចឹងបាល់ចូលទីរបស់ Bellingham រាប់ជាអាសាបង់។
មានការតវ៉ាខ្លាំង ក្រោមហេតុផល ២ ចំណុច ទី ១) គឺអាជ្ញាកណ្តាលមិនបានផ្តល់ពេលវេលាសងគ្រប់គ្រាន់វិញ ក្នុងការបង្រ្គប់នាទី នេះសងត្រឹម ១ នាទី និង ៣៩ វិនាទី ខណៈគ្រាចាយពេលលើការពិនិត្យ VAR មុននោះបន្តិច គឺការប្រកួតបានផ្អាកដល់ជាង ២ នាទី។ ចំណុចទី ២ ) គ្រប់គ្នាមិនអស់ចិត្ត ត្រង់ថាបាល់ទាត់តាំងពីដើមមក ដរាបណាបាល់កំពុងប្រជែងនៅក្បែរប្រអប់គ្រោះថ្នាក់ គឺអាជ្ញាកណ្តាលតែងតែអនុញ្ញាតឲ្យបន្តលេង ទោះហួសនាទីកំណត់ក៏ដោយ និយាយងាយយល់សូម្បីតែក្នុងហ្គេម FIFA ហ្គេម PES គ្រប់ជំនាន់ ក៏មិនដែលអនុវត្តខុសគោលការណ៍ខាងលើដែរ។
តែចំណាត់ការរបស់អាជ្ញាកណ្តាលធំវ័យ ៤០ ឆ្នាំយប់មិញ គ្រប់គ្នាហាក់មិនយល់អំពីចេតនារបស់លោកឡើយ។ មិនត្រឹមតែប៉ុណ្ណោះទេ លោកថែមទាំងលើកកាតលឿងពិន័យ Joselu និងកាតក្រហមពិន័យ Jude Bellingham ដែលមកទាមទារការតវ៉ានោះទៀត។ ការប៉ាន់ស្មានជាមុន ប្រសិនការតវ៉ាផ្សេងៗរបស់ Madrid មិនបានជោគជ័យ ម្ល៉េះកីឡាករអង់គ្លេសអាចត្រូវសហព័ន្ធព្យួរឈ្មោះ ២-៣ ប្រកួតបន្ទាប់។
ទោះយ៉ាងណា ការខឹងសម្បា អារម្មណ៍មួរម៉ៅកើតភាពស្អប់ទាំងអំបាលម៉ានរបស់យុវជនឆ្នើម Madrid វាកើតត្រឹមរយៈពេលខ្លីលើទីលានប៉ុណ្ណោះឯង តែចំពោះមុខអ្នកគាំទ្រ ជាពិសេសក្មេងៗដែលស្រលាញ់ចូលចិត្តខ្លួន គឺ Bellingham នៅរក្សាស្នាមញញឹម ឆ្លៀតផ្តល់ពេលវេលាចុះហត្ថលេខាជូនពួកគេដដែល មុនធ្វើដំណើរចាកចេញពីកីឡដ្ឋានរបស់ Valencia។
ទស្សនាវីដេអូខាងក្រោម៖
Jude Bellingham after one of the biggest scandals in football history, getting sent off incorrectly yet still making time for fans to sign autographs and take pictures with a smile. He is such a good guy. pic.twitter.com/rEvdgZ3xV1
— WolfRMFC (@WolfRMFC) March 2, 2024
កាយវិការនេះ ខ្សែបម្រើជំនាញបញ្ចប់ទីវ័យ ២០ ឆ្នាំ ដែលកន្លងមករងពាក្យរិះគន់មិនចេះតិចករណីប៉ះមាត់នឹង Mason Greenwood ក៏ប្រែមកជាតួឯកក្នុងបេះដូងអ្នកគាំទ្រមួយរំពេចភ្លែត។ ជារួមត្រឹមចន្លោះពេលមិនដល់មួយសប្តាហ៍ Bellingham គេប្រែជា Zero មកក្លាយជា Hero ទទួលបានការស្រលាញ់អាណិត បត់ជីវិត ១៨០ ដឺក្រេ៕
ប្រភព៖ បរទេស