នៅសម័យកាលដឹកនាំជាង ៥ ឆ្នាំ របស់លោក Roberto Mancini ជម្រើសជាតិអ៊ីតាលីស្គាល់តែជ័យជម្នះក្នុងពានរង្វាន់ UEFA European Championship មួយគត់ រួចរយៈពេលចុងក្រោយមុនអស់តំណែងក្រុមនៅអឺរ៉ុបមួយនេះ មិនអាចឈោងបានទាំងកៅអីទៅចូលរួមនៅ World Cup 2022 ថែមទៀត។
ជាការសម្រេចនៅថ្ងៃទី ១៣ សីហា ឆ្នាំ ២០២៣ សហព័ន្ធបាល់ទាត់អ៊ីតាលីក៏ប្រកាសបញ្ចប់តំណែង Mancini ហើយមួយខែបន្ទាប់ ជំនួសចូលដោយគ្រូរួមសញ្ជាតិតែមួយគឺ Luciano Spalletti។ ហែលកាត់ការដឹកនាំ ៦ ប្រកួតកន្លងមក ឃើញថាលទ្ធផលបែរល្អប្រសើរឡើង ត្រង់ការឈ្នះ ៣ ស្មើ ២ ចាញ់តែ ១ គត់ ខណៈកៅអីនៅ EURO 2024 ពាក់កណ្តាលឆ្នាំ ក៏បានធានារួចរាល់ ស្ថិតក្នុងពូល B មានប៉ះអេស្ប៉ាញ ក្រូអាត និងអាល់បានី។
យ៉ាងណាងាកទៅការយល់ឃើញរបស់អ្នកចាត់ការថ្មី Spalletti បានសង្កត់ធ្ងន់ថា លោកបានចូលមកកែប្រែទម្លាប់អាក្រក់មួយចំនួនរបស់ក្រុមនៅពេលវេលាដឹកនាំដំបូង ហើយលោកចង់សង្កត់ធ្ងន់ឆ្លើយតបទៅកាន់សាធារណៈជនទាំងអស់ ថាមនុស្សដូចជាលោកនេះ បើនិយាយគឺធ្វើ មិនមែនមានមាត់ចេះតែហានោះទេ។
ច្បាប់ទម្លាប់ថ្មីមួយ ដែលគ្រប់គ្នាឥតអាចប្រកែកបាន គឺសម្រេចហាមរាល់កីឡាករទាំងអស់ មិនឲ្យយកម៉ាស៊ីនលេងហ្គេម PlayStation ឬម៉ាស៊ីនកម្សាន្តដទៃមកតាមជាមួយឡើយ រាល់ពេលជាប់ភារកិច្ចនៅជម្រើសជាតិ មិនថានៅជំរំហ្វឹកហាត់ ក៏ជាពិសេសពេលវេលាមុនការប្រកួតកៀកចូលមកដល់។
ប្រាប់ទៅសារព័ត៌មាន La Gazzetta dello Sport គ្រូវ័យ ៦៤ ឆ្នាំរៀបរាប់៖ “អ្នកខ្លះថាខ្ញុំបានតែនិយាយ រួចធ្វើមិនកើត ពួកគេគិតខុសហើយ ពីពេលនេះទៅ ខ្ញុំដាក់ច្បាប់កំណត់រួចរាល់ ពួកគេត្រូវតែទុកម៉ាស៊ីនហ្គេម PlayStation នៅឯផ្ទះ ផ្ទុយទៅវិញ ខ្ញុំនឹងបង្កើតការលេងហ្គេមកម្សាន្តជួបជុំគ្នា ដើម្បីកុំឲ្យពួកគេនឹកនាដល់ការលេងម៉ាស៊ីនអស់នោះនៅពេលយប់ ត្រូវចាំពាក្យខ្ញុំទុក នៅកាតព្វកិច្ចជួយជម្រើសជាតិគឺម្នាក់ៗត្រូវតែផ្តោតខ្លាំងបំផុត មិនមែនឲ្យមកលេងសើចតែតាមចិត្តទេ”។
លោកបន្ត៖ “ខ្ញុំចង់ឲ្យគ្រប់គ្នាមានទម្លាប់និងបរិយាកាសល្អ សាមញ្ញទៅ Gigi Buffon គេនឹងជួយខ្ញុំលើរឿងនេះ សម័យកាលកាន់តែទំនើបបើម្នាក់ៗសំកុកមិនព្រមសម្រាកហើយលេង PlayStation ដល់ម៉ោង ០៤ ទៀបភ្លឺ ទាំងដែលប្រកួតនៅស្អែកបន្ទាប់ចូលមកដល់ តើឲ្យលទ្ធផលវាទៅជាល្អបានដោយរបៀបណា ក្មេងៗសម័យនេះ ខ្លះសុខចិត្តបង្ហោះរូបភាពលើ Instagram ឲ្យតែសក់ស្អាតរៀបចំខ្លួនរួចរាល់ ទាំងនឹងការងារគរនៅពីក្រោយមិនខ្ចីធ្វើ”។
“នេះវាសបង្ហាញពីការមិនឲ្យតម្លៃ ម្ល៉េះជម្រើសជាតិអ៊ីតាលីត្រូវតែមានការផ្លាស់ប្តូរ អ្នកមកទីនេះដើម្បីឈ្នះ European Championship រួចបន្ទាប់មកឈ្នះ World Cup មិនមែនមកដើម្បីឈ្នះការប្រជែងក្នុងហ្គេម Call of Duty នោះទេ”។
ស្តាប់ទៅជាយោបល់ណែនាំល្អ តែនេះវាខុសស្រឡះពីការយល់ឃើញរបស់អតីតជើងចាស់អ៊ីតាលីដូចគ្នាគឺ Andrea Pirlo កាលពី ១៨ ឆ្នាំមុន ធ្លាប់និយាយ៖ “ខ្ញុំបានចំណាយពេលគេងពេញមួយរសៀល ហើយកម្សាន្តអារម្មណ៍ លេងហ្គេមលើ PlayStation រួចដល់ល្ងាចថ្ងៃដដែលនោះ ខ្ញុំទៅចូលរួមវគ្គផ្តាច់ព្រ័ត្រ រួចឈ្នះពាន World Cup ក្នុងទីក្រុងប៊ែរឡាំង ឆ្នាំ ២០០៦”៕
ប្រភព៖ បរទេស