លោក Unai Emery អ្នកចាត់ការថ្មីរបស់ក្រុម Arsenal បានប្រកាសថាវាដល់ពេលដែលក្រុមកាំភ្លើងធំ ចាប់ផ្ដើម ប្រជែងយកពាន English Premier League ហើយ។
បុរសសញ្ជាតិអេស្ប៉ាញ ត្រូវបាន Arsenal តែងតាំងជាគ្រូបង្វឹកកាលពីថ្ងៃពុធម្សិលមិញនេះ ដោយមានកុងត្រារយៈពេល៣ឆ្នាំ។ ក្រោយពីចុះកុងត្រាដឹកនាំភ្លាម អតីតអ្នកចាត់ការក្រុម PSG រូបនេះ បានប្រកាសភ្លាមៗថា ដល់ពេលដែលត្រូវប្រជែងយកពានពីក្រុម Manchester City ហើយ។
Emery ចូលដឹកនាំក្រុម Arsenal នេះ អាចនឹងមានវិបត្តិបន្តិចចំពោះការចាយវាយ ត្បិតអីក្លឹបអាចផ្ដល់ថវិកាត្រឹម៥០លានផោនប៉ុណ្ណោះ ដើម្បីទិញកីឡាករថ្មី។ តែទោះជាយ៉ាងនេះក្ដី ទំហំទឹកប្រាក់ប៉ុណ្ណឹងក៏លោកគិតថាអាចកសាង Arsenal ឱ្យរឹងមាំវិញបានដែរ។
“គោលដៅខ្ញុំគឺប្រជែងពានជាមួយ Man City ។ Arsenal ជាក្លឹបមានឆន្ទៈ ហើយយើងនឹងសម្រេចវាជាមួយគ្នានៅរដូវកាលក្រោយ។ វាជាពេលដែលយើងត្រូវបង្ហាញពីការលេងបាល់ទាត់សម័យថ្មី អ្វីដែលយើងត្រូវធ្វើគឺមិនត្រូវខ្លាចក្រុមណានោះទេ ត្រូវតែគិតក្នុងចិត្តថាយើងមានសមត្ថភាពឈ្នះពួកគេបាន”។ សម្ដីរបស់អតីតគ្រូបង្វឹក Sevilla ដែលធ្លាប់ដឹកនាំក្រុមនេះលើកពាន Europa League ៣ឆ្នាំជាប់គ្នា៕ប្រភព៖ dailymail
