កាលពីថ្ងៃទី ០៦ កុម្ភៈ ក្រុមជម្រើសជាតិកូរ៉េខាងត្បូង បានទទួលរងបរាជ័យ ០-២ ក្រោមថ្វីជើងហ្សកដានី ជាលទ្ធផលសម្រេចឲ្យពួកគេធ្លាក់ត្រឹមវគ្គពាក់កណ្តាលផ្ដាច់ព្រ័ត្រ ហើយខាងក្រុមឈ្នះបន្តទៅវគ្គបញ្ចប់ តែបានចាញ់កាតារ នាមជាម្ចាស់ផ្ទះ ដែលឈ្នះជើងឯក។
មកទល់ថ្ងៃនេះ ទើបតែមានការបញ្ជាក់និងទទួលស្គាល់ពីសហព័ន្ធបាល់ទាត់កូរ៉េខាងត្បូង ថាមុនការប្រកួតចុងក្រោយចាប់ផ្តើម ជម្រើសជាតិខ្លួនពិតជាមានបញ្ហាប៉ះទង្គិចពាក្យសម្តី ដល់កើតកាយវិការច្រងេងច្រងាងដាក់គ្នា រហូតបណ្តាលឲ្យប្រធានក្រុម Son Heung-min មានរបួសត្រង់ផ្នែកម្រាមដៃ។
ដូចអ្នកបានឃើញក្នុងរូបភាពនៃការប្រកួត ផ្នែកម្រាមដៃកណ្តាលនិងដៃចង្អុលរបស់សមាជិកក្លឹប Spurs ត្រូវបានរុំដោយបង់ ហើយទើបតែថ្ងៃនេះ យើងទទួលបានការបកស្រាយអំពីដំណើរដើមទងច្បាស់លាស់។
វាកើតឡើងនៅតុអាហារជួបជុំមុនការប្រកួត ហើយដើមចមនៃជម្លោះគឺដោយសារកីឡាករក្មេងៗមិនស្តាប់ពាក្យកីឡាករចាស់ៗ ពោលមានភាពចចេសរឹងរូស លែងស្តាប់សូម្បីតែប្រធានក្រុម។ មួយក្នុងចំណោមកីឡាករវ័យក្មេងឯទៀត គឺ Lee Kang-in ដែលមានអាយុ ២២ ឆ្នាំ គេបានស្រូតទទួលទានអាហារពេលល្ងាចយ៉ាងលឿន រួចចង់ដើរសំដៅទៅលេងកីឡាវាយកូនឃ្លីលើតុជាការកម្សាន្ត។
ភ្លាមៗ Son ដែលជារៀមច្បង ក៏ជាប្រធានក្រុមរបស់ពួកគេ បានក្រោកឈរឡើងនិងនិយាយចំៗ ឥតលាក់ទុក ថាគ្រប់គ្នាមិនត្រូវធ្វើបែបហ្នឹងទេ ជារួមចង់ឲ្យជុំគ្នានៅតុអាហារ ក៏ជឿថា វាជាពេលវេលាល្អក្នុងការបង្កើនសាមគ្គីភាព និងចំណងយល់ចិត្តគ្នា ជាជាងការញែកខ្លួនទៅធ្វើសកម្មភាពឥតចាំបាច់ផ្សេងឆ្ងាយពីគ្នា។
ដល់ហើយម្នាក់ៗក៏ក្រោកឈរ និយាយដាក់គ្នាចុះឡើង ប្រកាន់ជំហរត្រូវរៀងខ្លួន រហូតដល់បុរសវ័យ ៣១ ឆ្នាំ ស្រែកប្រាប់ឲ្យអង្គុយចុះ ហើយប្រកែកចុះឡើងដោយប៉ះទង្គិចទៅជាថ្លោះផ្នែកម្រាមដៃ។ មានរបាយការណ៍មកថា កីឡាករក្មេងៗមួយភាគធំ មិនបានបង្ហាញការគោរព ទៅកាន់ Son ក្នុងនាមជារៀមច្បងពួកគេឡើយ។
រំឭកថា ពាក់ព័ន្ធនឹងហេតុការណ៍ខាងលើ ក៏សហព័ន្ធមានការបន្ទោសចំពោះអ្នកចាត់ការលោក Jurgen Klinsmann មួយផ្នែកដែរ ត្រង់ថា ខ្វះភាពជាអ្នកដឹកនាំ។ ដ្បិតបើកុងត្រាសេសសល់ដល់ចុងខែមិថុនា ឆ្នាំ ២០២៦ តែខាងសហព័ន្ធនឹងកោះប្រជុំ ដើម្បីសម្រេចក្នុងពេលដ៏ខ្លីខាងមុខ ថាគួរតែដកតំណែងរបស់គ្រូសញ្ជាតិអាល្លឺម៉ង់ចេញ ឬគិតគូរបែបណា។
ចុងក្រោយទៅមើល Son បន្តិច ក្រោយធ្លាក់ពីពានរង្វាន់អាស៊ី AFC Asian Cup ភ្លាមៗ គេក៏មិនបង្អង់ខ្លួនឲ្យសម្រាកយូរនោះដែរ ពោលបានត្រលប់មកជួយក្លឹបមាន់ខ្នាយមាស Spurs ភ្លែត ក៏ជាចំណែកកីឡាករបម្រុងចូលរួមជួយម្ចាស់ផ្ទះ យកឈ្នះ ២-១ ទៅលើ Brighton។
ប្រភព៖ បរទេស