ចចាមអារ៉ាមតាំងពីច្បាស់ដល់លែងជឿ ឥឡូវបែររឿងមិនគួរឲ្យជឿ កើតឡើងទៅជាភាពច្បាស់លាស់វិញ បន្ទាប់មានសារព័ត៌មានធំៗជាច្រើនចុះផ្សាយបន្តកន្ទុយគ្នា តាំងពី ESPN, CNN និងសូម្បីតែ Fabrizio Romano ក៏ហាក់បង្ហាញសញ្ញាវិជ្ជមាន ក្នុងដំណើរផ្ទេរ Kylian Mbappe ទៅកាន់ក្លឹបយក្ស Real Madrid។
ទន្ទឹមកុងត្រាត្រូវផុតនៅចុងខែមិថុនា ឆ្នាំ ២០២៤ សម្រាប់តារាឆ្នើមវ័យ ២៥ ឆ្នាំ ក៏មិនមានការបន្តថ្មីនោះដែរ ហើយកូនចិត្តធ្លាប់គិតចែចូវរវាងម្ចាស់ដី Bernabeu តាំងឆ្នាំ ២០២២ បានត្រលប់មកកើតម្តងទៀត ខណៈសារនេះ មើលឃើញភាគរយច្រើនជាងសារណាៗទាំងអស់។
ពេលវេលារង់ចាំដល់បញ្ចប់កុងត្រា ដែលនឹងត្រូវចូលមកដល់ ក៏នឹងកំណត់ដំណើរផ្ទេរទៅអធិរាជស សម្រាប់ Mbappe ហើយគេគ្រោងទទួលបានប្រាក់ឈ្នួលល្បាក់ ១០០ លានអឺរ៉ូ វាជាតួលេខខ្ពស់ជាងកៀកគុណជា ២ ធៀបនឹងប្រាក់ទទួលបានសព្វថ្ងៃពីក្លឹបក្នុងទីក្រុងប៉ារីស។
បច្ចុប្បន្នភាពនៃការអាប់ដែតដំណឹងចុងក្រោយ គឺក្លឹបដឹកនាំដោយប្រធានលោក Nasser Al-Khelaifi បានទទួលចម្លើយការសម្រេចចិត្តជាក់លាក់ហើយ ពី Mbappe ថានឹងចាកចេញនៅបិទបញ្ចប់រដូវកាល ស្របពេលប្រធានក្លឹប Madrid លោក Florentino Perez ក៏ព្រមដាក់ចិត្ត ជឿលើកូនអណ្តើកតូចខាងលើជាថ្មី ថាគេនឹងព្រមមក សម្រាប់ការបើករដូវកាលបន្ទាប់ ២០២៤/២៥។
វាកាន់តែគួរឲ្យចាប់អារម្មណ៍ ដោយសូម្បីការបង្ហោះព័ត៌មានថា Mbappe នឹងទៅចុះចូលជាមួយ Vinicius Jr នៅ Real Madrid ក៏ត្រូវបានសាមីខ្លួនតំបន់ប្រយុទ្ធសញ្ជាតិប្រេស៊ីល ចុចដាក់បេះដូង ចូលចិត្តលើ Instagram ទៀតផង។ ឥតខុសការស្រមៃទុកជាមុន Trio តំបន់ប្រយុទ្ធ Madrid រជ្ជកាលថ្មី យើងហៅកាត់បាន BMV ដោយមានបម្រើប្រយុទ្ធ Jude Bellingham បូកប្រយុទ្ធខាងលើពីរ Mbappe និង Vinicius នោះឯង។
រំឭកឲ្យដឹង មុនឈានដល់ផ្លូវបែកក្រោយរួមរស់ជាមួយ PSG ៦ ឆ្នាំ កីឡាករកម្ពស់ ១,៧៨ ម៉ែត្រ បានបន្សល់ទុកកំណត់ត្រានាមអ្នករកបានគ្រាប់បាល់ច្រើនបង្អស់ប្រចាំប្រវត្តិសាស្ត្រក្លឹប ពោលមានដល់ ២៤១ គ្រាប់ និងកាន់ពាន ១៣ គ្រឿងជាមួយក្លឹបបារាំង តែអវត្តមានចន្លោះធំគឺ UEFA Champions League។
បន្តមកស្ថានភាព PSG ចុងក្រោយបន្តិច អំពីអ្នកជំនួសប្រយុទ្ធប្រអប់ ស្នងម្ចាស់អាវលេខ ៧ ថ្មី គឺក្លឹបបានមើលឃើញកីឡាករព័រទុយហ្គាល់ Rafael Leao ដែលសព្វថ្ងៃបម្រើអាជីពឲ្យក្លឹប AC Milan សល់កុងត្រាដល់ចុងខែមិថុនា ឆ្នាំ ២០២៨។ យ៉ាងណាគេមានកិច្ចព្រមព្រៀងទិញផ្តាច់ Release Clause តែថ្លៃដល់ ១៧៥ លានអឺរ៉ូ។
ស្ថិតក្នុងវ័យ ២៤ ឆ្នាំ ប្អូន Mbappe ១ ឆ្នាំ កីឡាករជំនាញជើងស្តាំ ល្អខ្លាំងត្រង់ផ្នែកល្បឿន ត្រង់បច្ចេកទេសបណ្តើរបាល់ គ្រាន់នៅស្ទើរការបញ្ចប់ទី។ ស្ថិតិរដូវកាលនេះ ជាមួយ Milan ឈរជើងសរុប ២៧ ប្រកួត រកបាន ៦ គ្រាប់និង Assist ៧ លើក៕
ប្រភព៖ បរទេស