មិនអន់ទេ បម្រើ ការពារ ហើយអ្នកចាំទីក៏ត្រឹមភ្លាត់ម្តងម្កាល មិនបានធ្លាក់ទម្រង់គ្រប់ការប្រកួតនោះដែរ តែអ្វីជាបញ្ហាដូចប្រិយមិត្តបានឃើញសព្វថ្ងៃ Man United គឺស្ទើរតំបន់ប្រយុទ្ធ វិលក្បុងមិនដឹងអីជាអី ប្រកួតខ្លះរកតែមួយគ្រាប់គ្មាន។
ខ្វះអីបំពេញហ្នឹង ជាផែនការណ៍ដែល United ដើរយូរមកហើយ គ្រាន់ខ្លះជាការបំពេញត្រូវ ខ្លះទៅក៏ចោលលុយឥតអំពើមួយឆ្នាំៗចាយដល់រយលាន។ ឥឡូវដាក់គោលដៅផ្សេងយកចំណូលថ្មីមួយរូបទៀត តែសារនេះ ប្រុងលេងកញ្ចប់ធំ វិនិយោគលើកីឡាករជប៉ុន ដែលកំពុងបម្រើអាជីពឲ្យក្លឹប Real Sociedad នៅឯក្របខ័ណ្ឌកំពូលអេស្ប៉ាញ La Liga។
នោះគឺ Takefusa Kubo ដែលកីឡាករវ័យ ២២ ឆ្នាំសព្វថ្ងៃ លេងតំណែងប្រយុទ្ធស្លាបស្តាំ និងសេសសល់កុងត្រាដល់ចុងខែមិថុនា ឆ្នាំ ២០២៧ ឲ្យក្លឹប Sociedad។ គេរាប់បានជាចំណែកសកម្មក្រោមការដឹកនាំរបស់អ្នកចាត់ការលោក Imanol Alguacil ត្រង់ស្ថិតិសរុប ២៤ ប្រកួត ក៏រកបាន ៦ គ្រាប់ និង Assist ៤ លើក ខណៈចំណាត់ថ្នាក់ក្លឹប ឈរលេខ ៦ នៅតារាង La Liga ហើយភារកិច្ចធំនៅពានអឺរ៉ុប បន្តមកដល់វគ្គ ១៦ ក្រុម UCL ត្រូវប៉ះ Paris Saint-Germain នាពាក់កណ្តាលខែកុម្ភៈ។
Kubo ធ្លាប់ជាអតីតយុវជនថ្នាលឆ្លងកាត់ការហ្វឹកហាត់នៅក្លឹបអ្នកមានបុណ្យ Barcelona តែចុងក្រោយជ្រើសយកស្តេចស Real Madrid ជាទ្រនំជ្រកកោនបាន ៣ ឆ្នាំ ដល់តែមិនជោគជ័យ មិនទទួលបានឱកាស គេក៏ជ្រើសសាកល្បងវិវត្តខ្លួនពេញថ្លៃមក Sociedad ក្នុងតម្លៃខ្លួន ៦,៥០ លានអឺរ៉ូ។
តែខណៈនេះ ខណៈដែល United កំពុងចាប់អារម្មណ៍ចង់បានគេទៅចូលរួមនៅ Old Trafford ក្រឡេកមើលហាងឆេងតម្លៃខ្លួន គឺឡើងក្បែរគុណជា ១០ ចូល ៦០ លានអឺរ៉ូ ឬអាចឡើងខ្ពស់ជាងនេះ នៅល្បាក់ដើមឆ្នាំថ្មីខាងមុខ។ បើសួរថា តើក្លឹបអាណាព្យាបាលអេស្ប៉ាញ នឹងព្រមលក់គេចេញឬអត់? ចម្លើយវាស៊ីសងលើឆន្ទៈរបស់ក្លឹប បើដាក់ចិត្តសម្លឹងធំលើពាន UCL នោះជាការពិត ប្រាកដមិនអាចបាត់បង់ Kubo កើតឡើយនៅទីផ្សារដោះដូរខាងមុខ ផ្ទុយទៅវិញ បើសម្លឹងមើលឱកាសកើបផលចំណេញ ម្ល៉េះការលក់ចេញនៅខែមករា តាមបំណងបិសាចក្រហមចង់បាន គឺពិតជាអាចទៅរួច។
ថាការសម្រេចរបស់ក្លឹប ៥០-៥០ ឥឡូវងាកមកវិធីអូសទាញរបស់ក្លឹបដឹកនាំដោយអ្នកចាត់ការលោក Erik ten Hag ទៅលើស្លាបប្រយុទ្ធជប៉ុនវិញម្តង គឺបានដាក់សំណើសន្យានឹងផ្តល់ជូនប្រាក់ឈ្នួលឡើងគុណជា ៧ ធៀបនឹងប្រាក់ទទួលបានសព្វថ្ងៃនៅ Sociedad។
នេះមានន័យថា បច្ចុប្បន្នភាពដែលទទួលបានត្រឹម ៣៣ ២០០ ផោន/សប្តាហ៍ ក៏នឹងដំឡើងដល់ ២៣០ ០០០ ផោន/សប្តាហ៍។ ហ្នឹងហើយមិនខុសទេ ត្រឹមអាយុ ២២ ឆ្នាំ គិតតែប្រាក់លើទីលានមួយអាទិត្យរកបានជិត ៣០ មុឺនដុល្លារអាមេរិក។
ឥឡូវយើងនឹងរង់ចាំមើលការសម្រេចចិត្តរបស់ Kubo ផ្ទាល់ ថាគេនឹងរំអុកក្លឹបចាកចេញ ដើម្បីចាប់ឱកាសតួឯកធំនៅ Old Trafford ឬបែបណា? រំឭកឲ្យបងប្អូនដឹង កីឡាករជប៉ុនចុងក្រោយបង្អស់ឈរជើងឲ្យក្លឹបស្ថិតក្នុងទីក្រុង Manchester ខាងលើ គឺជា Shinji Kagawa ចន្លោះរដូវកាល ២០១២ ដល់ ២០១៤៕
ប្រភព៖ បរទេស