កក្រើកកីឡដ្ឋាននៅឯប្រទេសអារ៉ាប៊ីសាអ៊ូឌីតកាលពីយប់មិញ បន្ទាប់ក្លឹបសំពៅមាស Manchester City ផ្តល់មេរៀនមួយចាស់ដៃ ៤-០ ក្នុងវគ្គផ្តាច់ព្រ័ត្រ យកឈ្នះទៅលើក្លឹបប្រេស៊ីល Fluminense សម្រេចក្លាយជាម្ចាស់ជើងឯក FIFA Club World Cup ជាលើកដំបូងក្នុងប្រវត្តិសាស្រ្តរបស់ពួកគេ។
មានរឿងរ៉ាវច្រើនដែលត្រូវជជែក ជាពិសេសតួលេខកំណត់ត្រាហូហែរសម្រេចបានទាំងសម្រាប់កីឡាករ អ្នកចាត់ការ រួមក្លឹបទាំងមូលផងដែរ បន្ទាប់ City ត្រៀមដាំស្លាកមាស តំណែងជើងឯកនៅលើអាវ ជាមួយប្រាក់រង្វាន់ ៤ លានផោន។
ដំបូងបំផុតសូមនិយាយពី Manchester City ដែលពួកគេបានក្លាយជាក្លឹបអង់គ្លេសទី ១ ត្រូវកត់ត្រាទុក នាមជាម្ចាស់ជើងឯក ៥ ពានរង្វាន់ផ្សេងគ្នា ក្នុងកំឡុងឆ្នាំតែមួយ។ ជាការពិត ២០២៣ នេះ ក្លឹបម្ចាស់ដី Etihad បានឈ្នះពាន Premier League, Champions League, FA Cup, UEFA Super Cup និង FIFA Club World Cup។
មួយទៀតសោតក៏បានក្លឹបខាងលើ ចូលរួមបង្គ្រប់កំណត់ត្រាថ្មីរុញឲ្យ Premier League ជាក្របខ័ណ្ឌតែមួយគត់ក្នុងលោក អាចមានក្លឹបតំណាងដល់ទៅ ៤ ឈ្នះជើងឯកពានលំដាប់ពិភពលោក ដោយអតីតកាល Man United ឈោងបាននៅ ឆ្នាំ ២០០៨ Liverpool ឆ្នាំ ២០១៩ Chelsea ឆ្នាំ ២០២១ និង Man City ឆ្នាំ ២០២៣។
ឥឡូវចូលទៅកំណត់ត្រាអ្នកចាត់ការលោក Pep Guardiola វិញ ត្រង់គ្រូសញ្ជាតិអេស្ប៉ាញរាប់ថាជោគជ័យមិនគួរឲ្យជឿ នៅល្បាក់ពេលវេលាចុងក្រោយនៃសុពលភាពកុងត្រាត្រៀមផុតនៅ ១៨ ខែបន្ទាប់។ Guardiola អាចកត់ឈ្មោះខ្លួន ទៅក្នុងកំណត់ត្រាអ្នកចាត់ការដំបូង ដឹកនាំក្លឹបឈ្នះជើងឯក CWC ៤ សម័យផ្សេងគ្នា នេះលោកធ្លាប់ធ្វើបាន កាលនៅអ្នកមានបុណ្យ Barcelona ២០០៩&២០១១ នៅក្លឹបយក្សអាល្លឺម៉ង់ Bayern Munich ២០១៣ និងចុងក្រោយថ្មីថ្មោងជាមួយ City។
មុនចូលទៅដល់កូនពីងពាងតូចអាហ្សង់ទីន CTS SPORTS សូមច្បិចរឿង Rodri មកចែករំលែកបន្តិច ត្រង់គេក៏បានចារកំណត់ត្រាធំមួយដែរ នៅឆ្នាំ ២០២៣ ពោលក្លាយខ្លួនជាបុគ្គលតែមួយគត់ អាចឈ្នះនាមកីឡាករល្អបំផុតប្រចាំព្រឹត្តិការណ៍ នៅ Champions League Player of the Season, UEFA Nations League និង Club World Cup Player of the Tournament។ បន្តពីនេះដែរ គេក៏ជាកីឡាករទី ៣ ក្នុងប្រវត្តិសាស្ត្របាល់ទាត់ ឈ្នះ UCL Final MOTM និង CWC Player of the Tournament នៅឆ្នាំតែមួយ បន្ទាប់តែពី Lionel Messi ធ្វើបានក្នុងឆ្នាំ ២០១១ និង Gareth Bale នៅឆ្នាំ ២០១៨។
ចុងក្រោយគឺតួឯក Alvarez មិនធ្លាប់មានទេក្នុងលោកយើង ទើបតែអាយុ ២៣ ឆ្នាំ នេះគេអាចឈ្នះគ្រប់ពានរង្វាន់ទាំងអស់បាត់ទៅហើយជាមួយក្លឹបនិងជម្រើសជាតិ ពោលបើយើងមិនរាប់ពានឯកត្តជនធំៗ។ តួយ៉ាងគឺ FIFA World Cup, Copa America, Finalissima, Champions League, UEFA Super Cup, Club World Cup, Premier League, FA Cup, Copa Libertadores, Argentina Primera Division, Copa Argentina, Supercopa Argentina, Trofeo de Campeones និង Recopa Sudamericana។
ពិសេសមួយទៀតសោត ខ្សែប្រយុទ្ធអាហ្សង់ទីនខាងលើ ក៏ជាកីឡាករ Premier League តែមួយគត់ អាចរកបានគ្រាប់បាល់នៅក្របខ័ណ្ឌ ៦ ផ្សេងគ្នា ដូចមាននៅ PL, FA Cup, League Cup, Champions League, Community Shield និង Club World Cup នោះឯង៕
ប្រភព៖ បរទេស