របស់ខ្លះវាមិនមានតម្លៃក្នុងក្រសែភ្នែកមនុស្សមួយចំនួន តែធាតុពិតយើងអាចកែច្នៃរបស់នោះ ទៅជាវត្ថុទិព្វ មានតម្លៃរាប់សិបមុឺន ហើយក៏អាចជាចំណែកសង្គ្រោះជីវិតមនុស្សលោកយើងផងដែរ។ ជាក់ស្តែងដូចស្លាកដៃប្រធានក្រុមដែល Cristiano Ronaldo បានគប់គ្រវែងវាចោលទៅលើវាលស្មៅ នៅការប្រកួតវគ្គជម្រុះបឋម FIFA World Cup ២០២២ រយៈពេលជាងពីរឆ្នាំមុន ឥឡូវពេលនេះ បានសម្រេចកើតជារបស់មានគុណជួយដល់ជីវិតក្មេងប្រុសតូច។
ដំណើរដើមទងគឺកើតឡើងនៅការប្រកួតស្មើ ២-២ រវាងជម្រើសជាតិស៊ែប៊ី ទល់ព័រទុយហ្គាល់ កាលវគ្គជម្រុះបឋមជុំទី ២ ក្នុងពូល A នៅចុងខែមិនា ឆ្នាំ ២០២១។ ត្រង់ប្រកួតនោះ ដែលមិនប្រើប្រាស់បច្ចេកវិទ្យា Goal line technology គ្រាប់បាល់របស់ Ronaldo ដែលត្រូវបានគេសារចុះឡើងម្តងហើយម្តងទៀត ឃើញថាពិតជាបានចូលទីឆ្លងផុតគំនូសខ្សែបន្ទាត់ មុនខ្សែការពារ Stefan Mitrovic មក Clear ចេញ។
យ៉ាងណាចំណាត់ការរបស់អាជ្ញាកណ្តាលបែរជាមិនផ្តល់ឲ្យ នាំឲ្យ CR7 កើតការខឹងសម្បាជាខ្លាំង ព្រោះប្រកួតនោះក្រុមត្រូវយកបាន ៣ ពិន្ទុ បែរជាមិនអាចទៅវិញ។ ចប់ការប្រកួត Ronaldo ដើរចេញទាំងកាយវិការមិនពេញចិត្ត រួចក៏គ្រវែងស្លាកដៃ Captain ចោលទៀតផង។
របស់អត់តម្លៃចោលដោយភាពខឹងសម្បាចេញពីដៃ Ronaldo បានប្រែក្លាយជារបស់ទិព្វ បន្ទាប់ជនសាមញ្ញជាអ្នកពន្លត់អគ្គិភ័យក្នុងតំបន់ម្នាក់រើសយកវាឡើង និងប្រកាសដាក់ដេញថ្លៃនៅលើ Online លក់បានដល់តម្លៃ ៧៥ ០០០ ដុល្លារ។
ហ្នឹងហើយបងប្អូនយើងស្តាប់អត់ច្រឡំទេ គឺ ៧៥ ០០០ ដុល្លារ ជាការចំណាយរបស់អ្នកដែលចង់បានស្លាកប្រធានក្រុម Ronaldo គ្រវាត់ចោលលើវាលស្មៅ។ ប្រាក់ទាំងអំបាលម៉ាន ត្រូវបានផ្តល់ជូនទៅកាន់ក្រុមគ្រួសារនៃក្មេងតូចអាយុ ៦ ខែ ជនជាតិស៊ែប៊ី ឈ្មោះ Gavrilo Djurdjevic កើតជំងឺឆ្អឹងខ្នងពីកំណើត ទាមទារការវះកាត់បន្ទាន់។
មិនត្រឹមតែប៉ុណ្ណោះទេ បន្ទាប់សារព័ត៌មានធំៗទូទាំងសកលលោកចុះផ្សាយពាក់ព័ន្ធដំណើររឿងដ៏គួរឲ្យគោរព ក៏មានសប្បុរសជនជាច្រើនផ្សេងទៀត ចូលរួមជាថវិកាជួយបន្តបន្ទាប់ដល់ក្មេងកម្សត់ខាងលើ បានប្រាក់ដល់ ៥៨៧ ៩០០ ដុល្លារ។ វាគ្រប់គ្រាន់ក្នុងការចំណាយលើថ្លៃវះកាត់ និងសម្រាលបន្ទុកមួយចំនួន ដល់ទីបំផុត Gavrilo ទទួលបានជោគជ័យក្នុងការសង្គ្រោះ និងអាចរស់រានមានជីវិតជាមួយកាយសម្បទាពេញលក្ខណៈដូចជាក្មេងដទៃ។
រឿងរ៉ាវនេះ ត្រូវបានពិភពលោក និងអ្នកប្រើប្រាស់បណ្តាញសង្គមមួយភាគធំ បានមានការសាទរជាពន់ពេក ដល់ខ្លះដែលធ្លាប់តែស្រែកចំអក ស្រែករិះគន់ Ronaldo ក៏បែរជាប្តូរចិត្តមកស្រលាញ់គាំទ្រ និងគោរពចំពោះស្តេចបាល់ទាត់ព័រទុយហ្គាល់វិញទៀតផង៕
ប្រភព៖ បរទេស