បើទោះបីសព្វថ្ងៃ Saudi Pro League មានបណ្តុំកីឡាករលំដាប់កំពូលច្រើនរូបហើយក៏ដោយ តែផែនការណ៍អនាគតហាក់មិនទាន់បញ្ចប់ត្រឹមតែប៉ុណ្ណេះទេ ដោយចក្ខុវិស័យខ្នាតយក្ស នៅតែសម្លឹងឆ្ងាយ កាយឲ្យជ្រៅបន្ថែមទៀត ដើម្បីបង្កើនសក្ដានុពលប្រជាប្រិយភាពកាន់តែធំធេងឡើង។
ជាក់ស្តែងតាមការបញ្ជាក់ពីប្រធានជាន់ខ្ពស់ក្របខ័ណ្ឌកំពូលអារ៉ាប៊ីសាអ៊ូឌីត លោក Michael Emenalo ក៏ជាអតីតនាយកចាត់ការផ្នែកបច្ចេកទេសនៅក្លឹប Chelsea ចន្លោះឆ្នាំ ២០១១ និង ២០១៧ បានអះអាងអំពីមហិច្ឆតា ចង់បានកីឡាករលំដាប់ World class ៤ រូបបន្ថែម ក៏រួមទាំងឈ្មោះស្តេចពពែអាហ្សង់ទីន Lionel Messi។
ប្រាប់ទៅប៉ុស្តិ៍ Sky Sports៖ “កីឡាករដូចជា Mohamed Salah, Lionel Messi, Karim Benzema, Cristiano Ronaldo ក៏ដូចជា Kevin de Bruyne ឲ្យតែពួកគេទំនេរ យើងពិតជាចាប់អារម្មណ៍ស្តាប់សំណើទាំងឡាយ យ៉ាងណាយើងក៏យល់អំពីស្ថានភាព Salah ដែលគេកំពុងរីករាយនៅ Liverpool យើងក៏គោរពចំពោះស្ថានភាពនេះដែរ ពោលមិនចង់ដើរហួសខ្សែបន្ទាត់ ដាក់សម្ពាធទៅដល់គេឡើយ”។
លោកបន្ត៖ “តែយ៉ាងណាបើមានឱកាស Mo Salah គឺពិតជាកីឡាករដែលយើងចង់បានមកចូលរួមនៅលីគនេះ ឆន្ទៈរបស់យើងគឺច្បាស់ ហើយកីឡាករទាំងអស់ក៏ដឹងច្បាស់ថាពួកយើងសព្វថ្ងៃស្ថិតនៅកម្រិតណា ដូចគ្នាទៅថ្ងៃអនាគតយើងក៏មិនច្រានចោលឱកាសនាំយក Kylian Mbappe នោះដែរ”។
ក្រឡេកទៅមើលអនាគតអ្នកទាំង ៤ បន្តិច ដូច Salah គេសេសសល់កុងត្រារយៈពេលយូរ ដល់ចុងខែមិថុនា ឆ្នាំ ២០២៥ ខណៈលទ្ធភាពផ្ទេរចេញនៅខែមករាខាងមុខ គឺមានទាប ហើយបើចែកផ្លូវមែននោះ Liverpool ក៏មិនបណ្តោយឲ្យរបូតក្រោមតម្លៃខ្លួន ១០០ លានអឺរ៉ូជាដាច់ខាត។ រីឯទំហំប្រាក់ឈ្នួលអាចទទួលបាន ធានាឲ្យមិនក្រោមកម្រិត Karim Benzema ឬអាចចូលប្រហាក់ប្រហែលនឹង Cristiano Ronaldo។
ងាកទៅគ្រូគណិត KDB អនាគតក៏មិនប្រាកដប្រជាជាមួយ Man City ដោយចចាមអារ៉ាមសព្វមួយដងល្ហៀងៗ Al-Nassr និង Al-Ittihad ពិតជាចង់ថ្ពក់យក។ កត្តារបួសញាំញី កត្តាអាយុកាន់តែជ្រេ ក៏ជឿថា កីឡាករបែលហ្សិកអាចនឹងឈានដល់ផ្លូវបែកនៅភាគរយខ្ពស់។
អំពីស្ថានភាព Messi វិញ បើអាចផ្ទេរមក Saudi Pro League ក៏ពិតជាកក្រើក ត្រង់មានន័យ GOAT ទាំងពីរ រួមគ្នានៅលីគកំពូលតែមួយ តែមើលទៅទំនាក់ទំនងសព្វថ្ងៃរវាងតារាឆ្នើមអាហ្សង់ទីន និងក្លឹបអាមេរិក Inter Miami គឺពិតជាពិបាកនឹងបំបែក។
ចុងក្រោយកូនអណ្តើកតូចបារាំង Mbappe មើលមិនឃើញថាមិនត្រូវ ដ្បិតសល់កុងត្រាត្រឹមបញ្ចប់រដូវកាលខាងមុខជាមួយ PSG ហើយជាការពិតក្លឹបកំពូលធំៗនៅអឺរ៉ុប មិនបានបោះបង់ឱកាសសារនេះទេ។ តែយ៉ាងណានៅទីបញ្ចប់ លុយពិតជាអាចផ្លាស់ប្ដូរអ្វីៗគ្រប់យ៉ាង រួមទាំងឆន្ទៈកីឡាករវ័យក្មេងពោរពេញដោយទេពកោសល្យមួយចំនួនផងដែរ៕
ប្រភព៖ បរទេស