បន្ទាប់ខកខានជាន់ទីលានបាល់ទាត់ ១៨ ខែ Mason Greenwood ក៏ទទួលបានពេលវេលាអភិវឌ្ឍខ្លួនជាថ្មី ហើយការខិតខំរបស់គេ ពិតជាឆ្លើយតបលទ្ធផលមកវិញសមប្រកបដូចចិត្តចង់បាន តែមិនមែនជាមួយក្លឹបអាណាព្យាបាល Manchester United ផ្ទុយទៅវិញ គួរតែអរគុណក្លឹបខ្ចីជើង Getafe នៅឯប្រទេសអេស្ប៉ាញដែលផ្តល់ឱកាស។
ជាការពិតថយក្រោយទៅជិត ២ ឆ្នាំមុន បណ្តាក្លឹបតូចធំទាំងអស់ ពិតជាញញើតនឹងទៅចរចារវាងកីឡាករអង់គ្លេស ក្រោយពាក់ព័ន្ធរឿងអាស្រូវហិង្សាលើមិត្តស្រី តែងាកមកថ្ងៃនេះ គេបែរក្លាយជាកីឡាករដែលគ្រប់ក្លឹបធំតូចចង់បាន ហើយ Getafe ក៏នឹងទទួលផលចំណេញពីការផ្ទេរខាងមុខដែរ។
ខ្សែប្រយុទ្ធស្លាបស្តាំ ស្ថិតក្នុងសុពលភាពលក្ខខណ្ឌខ្ចីជើងឲ្យក្លឹបនៅ La Liga រយៈពេលមួយរដូវកាលពេញ ខណៈ ១៣ ប្រកួតបង្ហាញខ្លួនកន្លងមក គេចូលរួមចំណែករកបាន ៤ គ្រាប់ Assist ៣ ហៅជាសមិទ្ធផលធំមួយហើយ សម្រាប់កីឡាករខកខានចូលទីលានរាប់ខែនោះ។ ខណៈនេះ Getafe ក៏រំកិលពិន្ទុមកឈរចំណាត់ថ្នាក់ទី ៩ នៅតារាងលីគកំពូលអេស្ប៉ាញ។
បើតាមរបាយការណ៍ talkSPORT ចុះផ្សាយ ក្លឹបរួមលីគតែមួយ Barcelona, Atletico Madrid, Valencia, Real Sociedad ក៏មានទាំងក្លឹបក្រៅតំបន់នៅឯអ៊ីតាលី Lazio ហើយក្លឹបធំតូចមួយចំនួនផ្សេងទៀតនៅ Premier League សុទ្ធបានបញ្ជូនភ្នាក់ងារឃ្លាំមើល ឲ្យមកសិក្សាលម្អិតអំពីលទ្ធភាពនាំយកកីឡាករវ័យ ២២ ឆ្នាំ។ ទោះជាយ៉ាងណា គេជឿថា គ្រប់យ៉ាងវានឹងមិនអាចសម្រេចទៅបាននៅខែមករា ទីផ្សារដោះដូររដូវរងាខាងមុខឡើយ តែបើបញ្ចប់រដូវកាល ចូលរដូវក្តៅ ឆ្នាំ ២០២៤ នោះទើបអាច។
ចម្លើយរបស់សាមីខ្លួន ក៏មានការចុះផ្សាយថា Greenwood មិនគិតការត្រលប់ទៅក្លឹបម្ចាស់ដី Old Trafford វិញទេ បើទោះបីសល់កុងត្រាដល់ចុងខែមិថុនា ឆ្នាំ ២០២៥ ផ្ទុយស្រឡះមកវិញ កីឡាករនឹងរំអុកក្លឹបសុំយកផ្លូវបែក ក្នុងលក្ខខណ្ឌអចិន្ត្រៃយ៍ ទៅផ្តើមជីវិតថ្មី នៅទ្រនំបន្ទាប់តែម្តង បើមិន Getafe ដដែល ក៏ជាក្លឹបដទៃផ្សេងទៀត។
ដល់ងាកទៅក្លឹបមេរបស់ Greenwood ឯណោះ តាមដំណឹងល្ហិចល្ហៀងបានដាក់តម្លៃខ្លួនកីឡាករចន្លោះ ២០ ទៅ ២៥ លានអឺរ៉ូ ឬប្រហាក់ប្រហែល ១៨ ទៅ ២១ លានផោន។ យ៉ាងណា ជោគជ័យការលក់ចេញទាំងឡាយនៅវេលាខាងមុខ ដូចក្នុងខសន្យាគឺ Man United ត្រូវផ្តល់ភាគលាភ ២០ ភាគរយ ជូនទៅកាន់ Getafe ជាថ្នូរនៃការមើលថែ អភិវឌ្ឍ ដុសខាត់យុវជនជំនាញជើងសងខាង មិនថាការផ្ទេរទៅក្លឹបណាក៏ដោយ។
ដូច្នេះមានន័យបើ Getafe ទិញយក ក៏ត្រូវចាយត្រឹម ៨០ ភាគរយនៃតម្លៃខ្លួន Greenwood តែបើអត់ទេ ហើយរបូតទៅឲ្យក្លឹបដទៃ ក៏បានចំណូល ២០ ភាគរយយ៉ាងធូរចូលហោប៉ៅ ស្មើនឹងផលចំណេញការលក់ចេញ កីឡាករលំដាប់មួយរូបរបស់ខ្លួនទៅហើយ។
ថ្លែងចេញពីភាគីខាងក្លឹបស្ថិតក្នុងទីក្រុង Madrid អះអាងថា សុំមិនទាន់សម្រេចអ្វីទាំងអស់ ព្រោះពេលនេះ មើលទៅលឿនពេកក្នុងការដាក់តម្លៃស្នើ ណាមួយក៏រង់ចាំមើលចំណាត់ការចាត់តាំងថ្នាក់ដឹកនាំថ្មីរបស់ក្លឹប Man United សិនផងដែរ៕
ប្រភព៖ បរទេស