បងប្អូនអ្នកស្នេហាវិស័យកីឡាបាល់ទាត់ ខ្លះប្រហែលញញឹមបិទមាត់មិនជិត តែក៏មានមួយភាគធំ សម្ងំគេងទាំងក្នុងចិត្តរវើរវាយ ជាមួយលទ្ធផល ២-១, ៣-២ របស់ Arsenal និង Man United បរាជ័យក្រោមថ្វីជើងគូប្រជែង។ ទោះយ៉ាងណាក៏កុំភ្លេច Follow ផេកនេះទុក ដើម្បីត្រៀមទស្សនាជំនួបពិសេសច្រើនគូទៀត ដូចគូធំ Newcastle ទល់ PSG នៅ UCL វេលាទៀបភ្លឺ។
អត្ថបទនេះ CTS SPORTS លើកជ្រុង ៣ ពាក់ព័ន្ធស្ថិតិនិងរឿងគួរឲ្យចាប់អារម្មណ៍ ក្រោយ United ចាញ់ Galatasaray ដែលជាជ័យជម្នះរបស់ក្លឹបតួកគី មកលើក្លឹបអង់គ្លេសនៅពានអឺរ៉ុបដំបូងបង្អស់ក្នុងប្រវត្តិសាស្ត្រ៖
៣) តួលេខកាតក្រហមដ៏ភ្ញាក់ផ្អើលរបស់ Casemiro
ខ្សែបម្រើការពារវ័យ ៣១ ឆ្នាំ សញ្ជាតិប្រេស៊ីល មកចូលរួមនៅ United និយាយអំពីទម្រង់មិនជាធ្លាក់ខ្លាំងទេ តែនិយាយអំពីការបង្កកំហុសដល់កើតការពិន័យកាត មើលទៅតួលេខពិតជា Surprise ធៀបនឹងកាលនៅ Real Madrid។
នេះសរុប ៦១ ប្រកួត រកបាន ១១ គ្រាប់ Assist ៧ លើក តែចំនួនកាតក្រហមសរុបគឺដល់ទៅ ៣ លើក ធៀបនឹងកាលនៅអធិរាជស Real Madrid ចាយពេល ៣៣៦ ប្រកួត ទទួលពិន័យកាតក្រហមត្រឹម ២ លើកប៉ុណ្ណោះ។
កាតចុងក្រោយកើតឡើងនៅយប់មិញ ដែលជាការពិន័យកាតលឿង ២ លើកស្មើនឹងកាតក្រហមមួយ តែវាក៏ជាចំណែកនៃកំហុសដ៏ធំរបស់អ្នកចាំទី Andre Onana។ ពីដំបូងក្នុងការប្រកួតនៅតង់ទីមួយ កីឡាករទទួលបានកាតលឿងមួយហើយ ដល់តែនាទី ៧៧ អ្នកចាំទីសញ្ជាតិកាមេរូន បញ្ជូនបាល់ចេញពីជើងមិនបានល្អ ក៏ Casemiro សម្រេចប្តូរជើងយកទៅស្លាយក្នុងប្រអប់ ហើយអាជ្ញាកណ្តាលផ្លុំកញ្ចែលើកកាតលឿងទីពីរឥតស្ទាក់ស្ទើរ។ នេះមានន័យថា Casemiro ត្រូវអវត្តមានប្រកួតបន្ទាប់ទល់ Copenhagen ជាជុំទី ៣ វគ្គចែកពូល UCL នៅ Old Trafford។
២) អតីតកីឡាករមកលង Man United ជាថ្មី
Wilfried Zahaខ្សែប្រយុទ្ធដែលមិនជោគជ័យកាលនៅ Man United សរុបឈរជើងឲ្យឈុតធំ ៤ ប្រកួតមុនចាកចេញ ឥតរកបានមួយគ្រាប់។ ដល់តែផ្លាស់មកទ្រនំថ្មីបន្តបន្ទាប់ បែរកើតគ្រាប់ទល់អតីតក្លឹប ញឹកមិនគួរឲ្យជឿ។
នេះស្លាបប្រយុទ្ធសញ្ជាតិកូឌីវ័រ ក៏ជាអ្នករកបានគ្រាប់តាមស្មើឲ្យ Galatasaray កាលពីយប់មិញ ដែលវាជាគ្រាប់បាល់ទី ៤ ទល់ Man United ក្នុងការប្រកួតទាំង ៥ រាប់កាលនៅ Crystal Palace ផង កត់ត្រាទុកតាំងឆ្នាំ ២០២០។
១) Hojlund ជា Superhero ក្រៅផ្លូវការ
Rasmus Hojlund យប់មិញជាកីឡាករ Man United ទទួលបានពិន្ទុខ្ពស់ដាច់គេ ក៏ជាអ្នកឈរពេញម៉ោង ៩០ នាទី ហើយតាមថាប៊ិះនឹងកើតគ្រាប់បាល់ Hat-trick ផង ត្រង់ការកិបស៊ុតក្នុងប្រអប់ នាទី ៥៨ បែរអាជ្ញាកណ្តាលលើកទង់ជាបាល់ Offside។
យ៉ាងណា ២ គ្រាប់ប្រកួតនេះ បូកទាំងប្រកួតមុនចូលគ្រាប់ទី ៣ ត្រឹមការបង្ហាញខ្លួន ១៧១ នាទីនៅ UCL វាសមល្មមនឹងរុញឲ្យកីឡាករដាណឺម៉ាកឡើងជា Superhero របស់ក្លឹបដឹកនាំដោយលោក Erik ten Hag បានបាត់ទៅហើយ ប្រសិនណាពួកគេទទួលជ័យជម្នះ តែស្តាយគ្រប់យ៉ាងបែរស្ងាត់សូន្យឈឹង បន្ទាប់ ២ ប្រកួត United យកបាន ០ ពិន្ទុ។
ការសរសើរក្រៅផ្លូវការ មិនពេញលក្ខណៈក៏កើតមានដែរ ជាកម្លាំងចិត្តមួយផ្នែកដល់ Hojlund ថាគេជាសមាជិកបិសាចតែម្នាក់គត់ ដែលអាចដើរចេញពីទីលានទាំងងើបមុខឡើង ខណៈអ្នកផ្សេងទៀត សមតែឱនក្បាលចុះ ព្រោះបង្ហាញទម្រង់មិនបានល្អ ជាពិសេសគឺតំបន់ការពារក្រោម៕
ប្រភព៖ បរទេស