Manny Pacquiao នឹងត្រូវឡើងការពារខ្សែក្រវាត់ WBA របស់ខ្លួនទល់កីឡាសករ Broner នាថ្ងៃទី១៩ខែមករាឆ្នាំ ២០១៩ខាងមុខនេះ នៅទីក្រុង Las Vegas សហរដ្ឋអាមេរិក។
Pacquiao ធ្លាប់មានដំណឹងថានឹងឡើងសង្វៀនដើម្បីប្រកួតជាមួយ Floyd ម្ដងទៀត ប៉ុន្តែចុងក្រោយបែរជាមិនអាចមានការប្រកួតនោះទៅវិញ។ ដោយឡែកនៅថ្ងៃនេះ ក៏មានដំណឹងផ្លូវការថាកីឡាករហ្វីលីពីនវ័យ៣៩ឆ្នាំនឹងឡើងសង្វៀនជាថ្មី ប៉ុន្តែប៉ះជាមួយ Broner ឯណោះ។ Broner នេះដែរ វ័យ២៩ឆ្នាំ ក៏ជាអ្នកខ្លាំងម្នាក់ដែរ ដោយការប្រកួតរបស់គេ ឈ្នះ៣៣ដង ស្មើ១ដង និងចាញ់៣ដងប៉ុណ្ណោះ។
Pacman បាននិយាយចំពោះការប្រកួតខាងលើនេះថា៖ “ខ្ញុំគ្រាន់តែចង់បង្ហាញអ្នករាល់គ្នាថា អាជីពប្រដាល់របស់ខ្ញុំមិនទាន់ចប់ទេ ខ្ញុំចង់ឱ្យអ្នកគាំទ្រសប្បាយចិត្តនឹងការមើលខ្ញុំវាយបន្ដទៀត ជាពិសេសនៅថ្ងៃទី១៩ខែមករាខាងមុខ។ យើងកំពុងតែហ្វឹកហាត់យ៉ាងខ្លាំង សម្រាប់ការប្រកួតនេះ ដើម្បីឱ្យអ្នកគាំទ្រសប្បាយក្នុងការទស្សនា”៕ប្រភពDailyMail