៨-២, ៧-០ គិតត្រឹមរសៀលថ្ងៃនេះ គឺរាងស្ងប់ស្ងាត់ហើយ នៅឡើយតែលទ្ធផលថ្មី ដែលអ្នកគាំទ្រលើបណ្តាញសង្គម ផ្តុំគ្នាលើកមកជជែកគឺ ៣ ទល់នឹង ១។ ថយក្រោយទៅយប់មិញ មុនបន្តទស្សនាការប្រកួតសំខាន់លើទំព័រ CTS SPORTS នៅយប់នេះ យើងសង្ខេបលទ្ធផលខ្លីៗដូចតទៅ៖
Wolves ចាញ់ Liverpool ១-៣, Aston Villa ឈ្នះ Crystal Palace ៣-១, West Ham ចាញ់ Man City ១-៣, Juventus ឈ្នះ Lazio ៣-១, Koln ចាញ់ Hoffenheim ១-៣, Mainz 05 ចាញ់ Stuttgart ១-៣, Al Raed ចាញ់ Al Nassr ១-៣, Abha ចាញ់ Al-Ettifaq ១-៣ និងគូគួរឲ្យចាប់អារម្មណ៍ចុងក្រោយ ជាប្រធានបទរសើបត្រូវលើកមកជជែក គឺកំពូលក្លឹប Manchester United បរាជ័យក្រោមថ្វីជើងក្លឹបភ្ញៀវ Brighton ១-៣។
ពេលនេះអ្នកគាំទ្រ Man United ទាំងក្នុងនិងក្រៅស្រុក កំពុងឡើងតុមូល វែកញែករកមើល ថាតើអ្វីទៅជាបញ្ហាពិតប្រាកដ នាំឲ្យក្លឹបចាញ់ ១-៣ ម្តងហើយម្តងទៀត ទាំងដែលប្រកួតបន្ទាប់ត្រូវប៉ះគីឡូធ្ងន់លំដាប់ពាន UEFA Champions League ផងនោះ។
តាមពិតទៅមុនការចាញ់ Brighton យប់មិញ ថយក្រោយពីរសប្តាហ៍មុន ទល់ម្ចាស់ផ្ទះ Arsenal នៅ Emirate Stadium ក៏ក្លឹបដឹកនាំដោយអ្នកចាត់ការលោក Erik ten Hag បានចាញ់ ១-៣ រួចហើយដែរ។ ៧-០ យើងផ្អាកលើកមកនិយាយ ឥឡូវគ្រប់គ្នាបត់មកដោះស្រាយបញ្ហាថ្មី ដូចបង្ហាញម្តងហើយម្តងទៀតពីខាងលើ។ កត្តាដែលកាន់តែព្រួយបារម្ភបំផុត គឺឆ្លងតែ ៤ ថ្ងៃទៀត ចូលពាក់កណ្តាលសប្តាហ៍ក្រោយ វេលាម៉ោង ០២:០០ នាទីទៀបភ្លឺ ឈានចូលថ្ងៃព្រហស្បតិ៍ ទី ២១ កញ្ញា ជាប្រកួតបើកឆាកពានអឺរ៉ុប UCL ហើយ United ត្រូវហោះទៅជួបម្ចាស់ដី Bayern Munich នៅប្រទេសអាល្លឺម៉ង់ រាប់ជាគូធំប្រចាំសប្តាហ៍។
យើងងាកទៅមើលមតិរបស់អ្នកគាំទ្រ បានឆ្លើយឆ្លងស្រដៀងគ្នាថា Ten Hag កំពុងមើលឃើញពីតម្លៃនៃការបាត់បង់ Cristiano Ronaldo និង David de Gea ជាបណ្តើរៗហើយ ដូចគ្នានឹងលើករណី Jadon Sancho គ្រូសញ្ជាតិហូឡង់ ហាក់រៀបចំមិនបានល្អទាល់តែសោះ ជារួមបញ្ហាផ្ទៃក្នុងទំនងកំពុងកើតមាននៅ Old Trafford។
ដល់ទៅមើលអ្នកចាំទីថ្មី Andre Onana ដែល United ចាយលុយជាងកន្លះរយលានអឺរ៉ូ ថ្ពក់យកពីក្លឹប Inter Milan នេះ ៥ ប្រកួត របូតដល់ទៅ ១០ គ្រាប់ ខណៈតួលេខ Clean sheet ធ្វើបាន ១ គត់ ខុសពីកាលនៅក្លឹបចាស់អ៊ីតាលី គេស្អិតដូចពីងពាងដៃឯក មិនងាយឲ្យរបូតមួយគ្រាប់ៗឡើយ។
អ្វីដែលជាចម្ងល់មួយទៀតនោះ យប់មិញ Bruno Fernandes បែរធ្លាក់ពីតំណែងបម្រើប្រយុទ្ធ មកលេងការពារស្លាបស្តាំ នេះមិនមែនទើបតែលើកដំបូងទេ ដោយកាលប្រកួតចាញ់ Arsenal ៣-១ ក៏កីឡាករព័រទុយហ្គាល់រំលេចខ្លួនមកបន្ទាត់ការពារផ្នែកខាងស្តាំរាងញឹកញាប់ដែរ។ មិនច្បាស់ថា អ្នកចាត់ការលោក Erik ten Hag កំពុងរៀបយុទ្ធសាស្រ្តអ្វីឲ្យប្រាកដ។
បែរទៅការលើកឡើងរបស់ Ten Hag ផ្ទាល់ លើកឡើងក្រោយចាញ់យប់មិញ៖ “យើងពិតជាមានការខកចិត្តខ្លាំង នេះយើងនឹងប្រែស្ថានការណ៍ត្រលប់ទៅល្អប្រសើរវិញ គ្រាន់ថាបែបម៉េចយើងទាមទារការឈ្នះចាំបាច់ ទម្រង់លេងទាំងមូលកំពុងធ្វើឲ្យខ្ញុំមានការស្មុគស្មាញចិត្ត តែខ្ញុំក៏កំពុងសិក្សាមើលពីរបៀបណាល្អ របៀបណាជាភាពរឹងមាំរបស់ក្រុម”។
ខណៈអ្នកចាត់ការខាងគូប្រជែងលោក Roberto de Zerbi បានលើកឡើង៖ “ខ្ញុំអត់ច្បាស់ថា Man United មានបញ្ហាអីទេ តែបើពន្យល់ពីក្រុមរបស់ខ្ញុំ គឺយើងលេងដែលមានភាពជឿជាក់ នៅ ១៥ ឬ ២០ នាទីដំបូង យើងជួបការលំបាកច្រើន ព្រោះ Man United លេងខុសពីរបៀបដែលយើងត្រៀមខ្លួនទុក តែក្រោយមកយើងប្រែជាល្អវិញ ពេលយើងមានបាល់នៅនឹងជើងច្រើន”៕
ប្រភព៖ បរទេស
