ខ្សែប្រយុទ្ធក្រុម Manchester United កីឡាករ Antony កំពុងស្ថិតនៅក្រោមការស៊ើបអង្កេតដោយប៉ូលីសទាំងនៅទីក្រុង Manchester និង Sao Paulo បន្ទាប់ពី Cavallin អះអាងថាត្រូវបានវាយប្រហារដោយ Antony ជាច្រើនដង ដែលកើតឡើងតាំងពីឆ្នាំ ២០២២។
Antony ត្រូវបានគេទម្លាក់ចេញពីក្រុមជម្រើសជាតិប្រេស៊ីលដោយសារតែលទ្ធផលនៃការស៊ើបអង្កេត ដែលឥឡូវនេះលោកបានអះអាងថា វាជាការប៉ុនប៉ងបំផ្លាញអាជីពរបស់គាត់។
គាត់បានប្រាប់ Fofocalizando ថា៖
“ខ្ញុំប្រាកដ ១០០% ថាខ្ញុំមិនដែលបានប៉ះពាល់ស្ត្រីទេ។ ហើយខ្ញុំនឹងមកជាមួយភស្តុតាង មនុស្សគ្រប់គ្នានឹងឃើញការពិត។
ខ្ញុំមិនដែលប្រើអំពើហិង្សា ហើយខ្ញុំនឹងមិនប្រើអំពើហិង្សានោះទេ។ ខ្ញុំប្រាកដណាស់ ខ្ញុំមិនដែលប្រព្រឹត្តអំពើហឹង្សាលើរាងកាយ ហឹង្សាដោយពាក្យសំដី… ខ្ញុំបានធ្វើឲ្យនាងអាក់អន់ចិត្ត ហើយនាងក៏បានធ្វើឲ្យខ្ញុំអាក់អន់ចិត្ត។ វាមានទាំងសងខាង។ អំពើហិង្សាផ្លូវកាយ មិនដែលទេ។
អ្វីដែលខ្ញុំចង់បានបំផុតគឺចង់បង្ហាញមនុស្សថាខ្ញុំជានរណា ខ្ញុំចង់សម្រេចបានអ្វីៗជាច្រើន ខ្ញុំមានគោលដៅច្រើន និងសុបិនជាច្រើន ខ្ញុំចង់បង្ហាញថាខ្ញុំពិតជានរណា ខ្ញុំសុបិនចង់វិលចូលជម្រើសជាតិវិញ។ ខ្ញុំចង់បង្ហាញថា Antony គឺគ្មានកំហុសក្នុងរឿងទាំងនេះទេ។”
នៅពេលសួរថាតើគាត់ខ្លាចកិច្ចសន្យារបស់គាត់ជាមួយ United អាចត្រូវបានបញ្ចប់ដោយសារការចោទប្រកាន់ឬអត់នោះ Antony បានបន្ថែមថា៖
“វាជារឿងដែលមិននឹកស្មានដល់របស់ខ្ញុំ។ ខ្ញុំដឹងការពិត ហើយវានឹងចេញមក។ ខ្ញុំដឹងថាមនុស្សជាច្រើនកំពុងបំផ្លាញខ្ញុំ ប៉ុន្តែការពិតតែងតែចេញមក។ United គឺស្ថិតនៅលើការស៊ើបអង្កេតអ្វីគ្រប់យ៉ាង។ ពួកគេកំពុងតាមដាន ហើយនឹងបន្តតាមដាន”៕
