កីឡាករធ្លាប់បម្រើអាជីពឲ្យក្លឹបសំពៅមាស Manchester City គឺ David Silva ថ្មីៗនេះ បានចេញមកបញ្ចេញមតិ ពាក់ព័ន្ធការដណ្តើមពានរង្វាន់ Premier League រដូវកាល ២០២៣/២៤ ដោយជឿថា ក្លឹបចាស់របស់ខ្លួននៅតែមានប្រៀប ហើយធៀបនឹងគុណភាពក្លឹបដទៃក៏មានដែរ តែមិនច្រើន ពោលមានតែមួយគត់ក្នុងការយល់ឃើញ។
នោះគឺកាំភ្លើងធំ Arsenal ក្រោមការដឹកនាំរបស់លោក Mikel Arteta ជាអតីតដៃស្តាំគ្រូធំ Pep Guardiola នោះឯង។ យើងទៅមើលរដូវកាលមុនបន្តិច ពួកគេបញ្ចប់ចំណាត់ថ្នាក់ ឈរលេខ ២ បន្ទាប់ដេញនាំមុខពីដើមដល់ពាក់កណ្តាល លុះចុងរដូវកាលក៏របូតភ្លាត់ចាញ់ City ដល់ទៅ ៥ ពិន្ទុវិញ។
នេះឆ្លងមករដូវកាលថ្មី ទើបចាប់ផ្តើមបាន ៤ ជុំ ក៏ម្ចាស់ដី Etihad Stadium ដដែល ឈរបណ្តែតឈ្មោះនៅកំពូលតារាង មាន ១២ ពិន្ទុពេញ នាំមុខទៅលើ Tottenham, Liverpool, West Ham និង Arsenal ជាក្លឹបមាន ១០ ពិន្ទុរៀងគ្នា ឈរចំណាត់ថ្នាក់បន្ទាប់។
យ៉ាងណាអតីតខ្សែបម្រើសញ្ជាតិអេស្ប៉ាញ ដែលទើបប្រកាសចូលនិវត្តកាលចុងខែកក្កដា ពុំបានមើលឃើញលទ្ធភាពនៃក្លឹប Spurs ឬ Liverpool ជាដើមឡើយ ផ្ទុយទៅវិញសម្លឹងឃើញ Arsenal មួយគត់។ និយាយប្រាប់សារព័ត៌មាន The Mirror៖ “នេះ City ពួកគេមានក្រុមដ៏អស្ចារ្យ ជាមួយកីឡាករមួយចំនួនដែលពិតជាល្អខ្លាំង វាជារដូវកាលទី ៨ ហើយរបស់ Pep ដឹកនាំក្លឹប ត្រង់ឆ្នាំដំបូង លោកហាក់សម្របខ្លួនបាត់ទៅហើយជាមួយ Premier League រហូតមកទល់ពេលនេះ សឹងតែថាជាក្លឹបគ្មាននរណាអាចបញ្ឈប់”។
លោកបន្ត៖ “ក៏ប៉ុន្តែ Arsenal រាប់ជាក្លឹបមួយដែលអាចទៅរួច ខ្ញុំមើលឃើញតែពួកគេមួយគត់ ប្រហែលថាអាចប្រជែងពានរង្វាន់នឹង City ចំណែកបណ្តាក្លឹបដទៃ ខ្ញុំគិតថា អត់អាចទៅរួចនោះឡើយ ចំពោះរដូវកាលមុនការលេងរបស់ក្លឹបនៅ Champions League ពួកគេធ្វើបានល្អ គ្រាន់ខ្ញុំស្តាយត្រង់ពេលខ្ញុំនៅ យើងមិនអាចឈ្នះ”។
“ពួកគេសក្តិសមនឹងទទួលបានសមិទ្ធផលអស់នេះ ដូចគ្នាទាំងសម្រាប់អ្នកគាំទ្រ ក្នុងការឈ្នះ Premier League, Champions League រួមទាំង FA Cup វាជាការសម្រេចដ៏ធំធេងបំផុត”។
គួរឲ្យដឹងដែរថា កាលវិភាគប្រកួតរបស់ក្លឹបការពារតំណែងជើងឯក នឹងត្រូវត្រលប់មកវិញក្រោយចប់ International Break នាវេលាម៉ោង ០៩:០០ នាទីយប់ ថ្ងៃសៅរ៍ ទី ១៦ កញ្ញា ជាការជួបម្ចាស់ផ្ទះ West Ham នៅជុំទី ៥ Premier League។ ក្រោយនោះ ៤ ថ្ងៃពួកគេក៏ទទួលភារកិច្ចធំ ក្នុងក្របខ័ណ្ឌ UEFA Champions League ជុំដំបូងវគ្គចែកពូល ទល់ក្លឹប Crvena Zvezda ក្នុងពូល G សុទ្ធសឹងមានការផ្សាយបន្តផ្ទាល់លើទំព័រ CTS SPORTS។
ចុងក្រោយយើងឆ្លៀតច្បិចចូលពាក់ព័ន្ធអនាគតអ្នកចាត់ការកាន់ឆ្នាំលោក Pep Guardiola បន្តិច ត្រង់ថ្មីៗមានចចាមអារ៉ាមផ្សារភ្ជាប់ឈ្មោះរបស់លោក ទៅកាន់ជម្រើសជាតិតោកំណាចអង់គ្លេស។ មានការលើកឡើងថា Gareth Southgate ជាគ្រូសព្វថ្ងៃ នឹងចុះចេញក្រោយចប់ EURO 2024 ចំការបិទបញ្ចប់រដូវកាលនេះ ដែលមុនការផុតកុងត្រាមួយឆ្នាំរបស់គ្រូសញ្ជាតិអេស្ប៉ាញ នៅ City។
ហេតុផលគ្រប់គ្នាចង់ឃើញ Guardiola ទៅដឹកនាំ ក៏ដោយសារជឿជាក់លើយុទ្ធវិធីដឹកនាំរបស់ Pep សិក្សាយល់ច្បាស់អំពីកីឡាករអង់គ្លេស ជាហេតុមានភាគរយអាចជួយពួកគេកាន់ពាន FIFA World Cup 2026 ជាថ្មី បន្ទាប់ខកខានតាំងឆ្នាំ ១៩៦៦៕
ប្រភព៖ បរទេស