កីឡាករសញ្ជាតិព័រទុយហ្គាល់ Joao Cancelo និង Joao Felix បានសម្រេចព្រមព្រៀងការខ្ចីជើងពេញមួយរដូវកាលជាមួយក្រុមជើងឯកអេស្ប៉ាញ នៅថ្ងៃចុងក្រោយនៃទីផ្សារដោះដូរកីឡាករ។
របាយការណ៍របស់ SPORT ថា Cancelo និង Felix ត្រូវបានចុះឈ្មោះជាមួយ La Liga ទាន់ពេល ដើម្បីបង្ហាញខ្លួនលើកដំបូងនៅទឹកដី Osasuna នៅថ្ងៃអាទិត្យ។ ពួកគេទាំងពីរត្រូវបានគេបញ្ចូលឈ្មោះនៅក្នុងក្រុមដើម្បីធ្វើដំណើរទៅកាន់ Pamplona។
អ្នកទាំងពីរនឹងត្រូវបានវាយតម្លៃដោយ Xavi នៅវគ្គហ្វឹកហាត់ចុងក្រោយរបស់ Barcelona នៅថ្ងៃសៅរ៍ មុនពេលការសម្រេចចិត្តត្រូវបានធ្វើឡើងលើការចូលរួមរបស់ពួកគេ។
ពួកគេក៏បានទៅដល់កាតាឡាន់យឺតពេល ដោយសារទទួលការធ្វើតេស្តសុខភាពរៀងៗខ្លួននៅកន្លែងផ្សេងគ្នា។ ការចុះហត្ថលេខារបស់ Cancelo ត្រូវបានបញ្ចប់នៅក្នុងប្រទេសអង់គ្លេស មុនពេលការផ្ទេរពី Manchester City ខណៈពេលដែលការផ្លាស់ប្តូររបស់ Felix ពី Atletico Madrid ត្រូវបានធ្វើជាផ្លូវការនៅក្នុងរដ្ឋធានីរបស់អេស្ប៉ាញ។
ប្រសិនបើពួកគេមិនបង្ហាញទម្រង់លេងទល់នឹង Osasuna នោះឱកាសបន្ទាប់របស់ពួកគេក្នុងការលេងនឹងមកដល់នៅថ្ងៃទី១៦ ខែកញ្ញានៅក្នុងដីទល់នឹង Real Betis៕