បើទោះបីកំពុងបង្ហាញទម្រង់លេងយ៉ាងល្អ នេះបន្តរកបានគ្រាប់បាល់ជាប់ប្រកួតតាំងពីពានតូចពានធំ តែ Lionel Messi បែរមកត្រូវជួបបញ្ហាធ្លាប់ប្រទះ សារនេះកើតឡើងនៅទឹកដីសហរដ្ឋអាមេរិក។ នោះគឺការប្រើប្រាស់ភាសាអង់គ្លេស ដែលជាភាសាផ្លូវការនៅទ្រនំថ្មីនៃក្លឹប Inter Miami ក៏ដូចជាមធ្យោបាយប្រាស្រ័យទាក់ទងទូទៅ ក្នុងប្រទេសទាំងមូល។
រឿងហេតុយើងសារថយក្រោយ ទៅការប្រកួតក្នុងក្របខ័ណ្ឌ Major League Soccer កាលពីថ្ងៃមុន ដែលក្លឹបបាតតារាង Miami បានយកឈ្នះ New York Red Bulls ជាមួយលទ្ធផល ២-០ ក៏មានគ្រាប់បាល់របស់ស្តេចពពែអាហ្សង់ទីនមួយផងដែរ។
ក្រោយមកបន្ទាប់តែចប់ការប្រកួត Messi បែរបំពានលើច្បាប់កំណត់នៃក្របខ័ណ្ឌបាល់ទាត់អាមេរិក តាំងពីជុំដំបូងទៅហើយ គឺត្រង់ថា លោកពុំបានបង្ហាញខ្លួននៅសន្និសីទសារព័ត៌មាន ឬផ្តល់ពេលវេលាសម្រាប់អ្នករាយការណ៍មកសួរនាំ នៅពេលបន្ទាប់នោះ។
ជាការពិតច្បាប់បាល់ទាត់នៅសហរដ្ឋអាមេរិក កីឡាករទាំងអស់កំណត់ត្រូវមានពេលជជែក ឆ្លើយតបទៅកាន់អ្នកសារព័ត៌មាន ក្រោយចប់ការប្រកួត ហើយចំណុចនេះក៏អនុញ្ញាតក្នុងលក្ខខណ្ឌពិសេស សម្រាប់អ្នកកាសែតអស់នោះ ឲ្យចូលទៅក្នុងបន្ទប់ផ្លាស់សំលៀកបំពាក់សម្ភាសន៍ផ្ទាល់នឹងកីឡាករទៀតផង។
បើតាមការឲ្យដឹងពីអនុប្រធានប្រតិបត្តិផ្នែកទំនាក់ទំនងរបស់ MLS លោក Dan Courtemanche បានសង្កត់ធ្ងន់ថា មិនមានការលើកលែងសម្រាប់កីឡាករណាម្នាក់ទេ រួមបញ្ចូលទាំង Messi ក្នុងការអនុវត្ត គោរពលើច្បាប់បានចែង តែយ៉ាងណាបែរមិនឃើញមានវត្តមានរបស់អតីតសមាជិក Barcelona ទៅវិញ។
ជាការឆ្លើយតបអ្នកនាំពាក្យក្លឹប Miami អ្នកស្រី Molly Dreskaបានប្រាប់ទៅអ្នកកាសែតច្បាស់ៗថា ដោយសារ Messi មិនអាចប្រើប្រាស់ភាសាអង់គ្លេសបានល្អ ទើបជាហេតុនាំឲ្យអវត្តមាន។ យើងមិនច្បាស់ថាតទៅមុខ ប្រធានក្លឹបលោក David Beckham នឹងដោះស្រាយបញ្ហានេះ ជាមួយ MLS ដោយវិធីណាទេ ក៏មិនទាន់ប្រាកដថា Messi ត្រូវជាប់ពិន័យណាមួយឬក៏អត់។
ចែករំលែកទៅកាន់បងប្អូនអ្នកគាំទ្រឲ្យបានដឹង ខ្សែប្រយុទ្ធ វ័យ ៣៦ ឆ្នាំ តាំងពីដើមមកម្ល៉េះ ត្រូវបានសាធារណៈជនខាងក្រៅទទួលស្គាល់ ថាលោកមិនស្ទាត់ជំនាញក្នុងការប្រើប្រាស់ភាសាអង់គ្លេសដើម្បីប្រាស្រ័យទាក់ទងឡើយ។ ដូចគ្នានឹងកាលនៅក្លឹបចាស់ Paris Saint-Germain ក៏មិនបានផ្តោតទៅរៀនភាសាបារាំងអីនោះដែរ ជារួមលោកស្ទាត់តែការប្រើប្រាស់ភាសា ២ ប៉ុណ្ណោះក្នុងអាជីព រួមមាន ភាសាអេស្ប៉ាញ និងភាសាកាតាឡាន់។
បញ្ជាក់បន្តិច ភាសាអេស្ប៉ាញ និងកាតាឡាន់ មិនមែនជាភាសាតែមួយឡើយ ដោយទាំងសម្លេង វេយ្យាករណ៍ មានលក្ខណៈពីរដាច់ដោយឡែក។ ត្រង់ថាដើមឡើយ Messi កើតនៅទីក្រុង Rosario ប្រទេសអាហ្សង់ទីន ដែលភាសាផ្លូវការគេប្រើប្រាស់នៅទីនោះ គឺអេស្ប៉ាញ អ៊ីចឹងលោកចេះនិយាយអេស្ប៉ាញតាំងពីកំណើតមកម្ល៉េះ។
រហូតដល់អាយុ ១៣ ឆ្នាំ ពេលទៅរស់នៅក្នុងតំបន់កាតាឡូញ៉ា ជាមួយក្លឹប FC Barcelona វាជាពេលផ្លាស់ប្តូរការប្រើប្រាស់ភាសាថ្មី ទៅតាមបរិបទកាតាឡាន់វិញម្តង។ ចំពោះភាសាអង់គ្លេស ម្តងម្កាលបើចាំបាច់ខ្លាំង លោកត្រូវមានអ្នកបកប្រែចាំជំនួយ ឬជួនខ្លះ ពឹងឲ្យភរិយាអ្នកស្រី Antonella Rocuzzo ដែលគេដឹងថា នាងអាចនិយាយ អាចស្តាប់អង់គ្លេសបានយល់ល្អជាង Messi ជាប្តី៕
ប្រភព៖ បរទេស