ខ្សែប្រយុទ្ធវ័យ ៣១ ឆ្នាំ Neymar Jr បានសម្រេចការផ្ទេរដ៏ភ្ញាក់ផ្អើល ទៅកាន់ក្លឹប Al-Hilal ក្នុងតម្លៃខ្លួន ៩០ លានអឺរ៉ូ ជាមួយប្រាក់ឈ្នួលខ្ទង់រយលាន ហើយវាក៏ជាតួលេខអតីតក្លឹបអាណាព្យាបាល Paris Saint-Germain ពេញចិត្តនឹងទទួលយកខ្លាំងណាស់ដែរ ដ្បិតបើធៀបនឹងហាងឆេងការផ្តល់ឲ្យពីបណ្តាក្លឹបដទៃនៅលីគកំពូល ប្រហែលមិនបានខ្ពស់បែបហ្នឹងទេ។
ដោយឡែកងាកទៅអតីតជើងចាស់របស់ក្លឹប Bayern Munich លោក Paul Breitner ឯណោះ ក៏ហាក់សប្បាយរីករាយខ្លាំងដូចគ្នា ដ្បិតជឿថា ការផ្ទេរ Neymar ឥតខុសពីការដកបន្លាដែលពោរពេញដោយកលល្បិចចេញពីដីអឺរ៉ុបបាន ១០០ ភាគរយ។
Legend លេងតំណែងបម្រើធ្លាប់ឈរជើងឲ្យ Real Madrid និង Bayern និយាយ៖ “ពិតជាអរគុណធំៗ ខាងអារ៉ាប៊ីសាអូឌីតដែលបានទិញយក Mr Neymar ជាកីឡាករដែលពោរពេញដោយការសម្តែង ពុតត្បុត ពូកែធ្វើដួល ជាងនរណាៗទាំងអស់ក្នុងលោកនៅរយៈកាលប៉ុន្មានឆ្នាំចុងក្រោយ”។
“សម្រាប់ខ្ញុំ គេត្រឹមជាកីឡាករល្អបំផុតមួយរូប ដែលពូកែសម្តែង ពូកែបន្លំយកត្រូវលើទីលានតែប៉ុណ្ណោះឯង អត្តចរិតពោរពេញដោយល្បិច ដូច្នេះខ្ញុំមានតែពាក្យថា អរគុណ អរគុណធំៗ ព្រោះបាល់ទាត់អឺរ៉ុបរបស់យើងមិនត្រូវការវត្តមាន Neymar បន្តទៅទៀតឡើយ”។
គួរឲ្យដឹងដែរថា កំឡុងឈរជើងនៅ PSG ជាង ៦ ឆ្នាំមកនេះ Neymar បង្ហាញខ្លួនសរុប ១៧៣ ប្រកួត រកបាន ១១៨ គ្រាប់និង Assist ៧៧ លើក តែបេសកកម្មធំទាំងសម្រាប់ក្លឹបដូចពាន Champions League និងទាំងសម្រាប់ខ្លួនឯងដូច Ballon d’Or គេមិនទាន់ធ្លាប់សម្រេចវាបាននោះឡើយ។
ងាកមកកុងត្រាថ្មីឈរជើងនៅ Al-Hilal ២ ឆ្នាំទៅមុខ ខាងក្លឹបខាតតាំងពីក្បាលទី នេះត្រូវអវត្តមានស្លាបប្រយុទ្ធប្រេស៊ីលជិតមួយខែ ដោយសារបញ្ហារបួសញាំញីសល់ពីក្លឹបចាស់ រួចទំនងដល់ប្រកួតទល់ក្លឹបអ៊ីរ៉ង់ Perspolis នាថ្ងៃទី ១៩ កញ្ញា ក្នុងពានរង្វាន់ AFC Champions League ទើបគេអាចត្រលប់មកវិញ។
និយាយអំពីពានរង្វាន់ប្រចាំទ្វីបអាស៊ី ACL នេះដែរ ក៏ឆ្លៀតចែករំលែកជូនបងប្អូនអ្នកស្នេហាវិស័យបាល់ទាត់ឲ្យបានដឹងបន្តិច ត្រង់ច្បាប់ថ្មីនៃរដូវកាល ២០២៣/២៤ គេអនុញ្ញាតឲ្យបណ្តាក្លឹបចូលរួមទាំងអស់ អាចប្រើប្រាស់កីឡាករក្រៅតំបន់អាស៊ីត្រឹម ៥ នាក់/ក្រុមប៉ុណ្ណោះ វាជាតួលេខកើនឡើងធៀបនឹងឆ្នាំទៅប្រើបានត្រឹម ៤ រូប។
ចំពោះ Al-Hilal ផ្ទាល់ អាចរាងស្មុគស្មាញជាងបណ្តាក្លឹបដទៃបន្តិច ព្រោះពួកគេបានចុះហត្ថលេខានាំចូលចំណូលថ្មី ជាកីឡាករបរទេសជាប់សញ្ជាតិក្រៅទ្វីបអាស៊ី មានតាំងពី Neymar, Malcom, Ruben Neves, Aleksandar Mitrovic, Sergej Milinkovic-Savic, Kalidou Koulibaly, Bono រាប់ទៅចូល ៧ រូបបាត់ ដូច្នេះប្រាកដទាមទារឲ្យមានការចម្រាញ់ខ្ពស់ ក្នុងការក្រសោបយកតែ ៥ រូបទៅចូលរួមពានធំខាងលើ។ សង្កត់ធ្ងន់ដែរថា AFC Champions League ជាពានដែលក្លឹបទាំងអស់នៅទ្វីបអាស៊ីត្រូវចូលរួមប្រកួតប្រជែងរៀងរាល់រដូវកាល ដូច UEFA Champions League ក្នុងតំបន់អឺរ៉ុបយ៉ាងដូច្នោះ៕
ប្រភព៖ បរទេស
