Al-Nassr ជាក្លឹបភ្ញៀវ បានចូលលុតក្លឹបម្ចាស់ផ្ទះ Al Fateh កាលពីយប់មិញយ៉ាងចាស់ដៃ ដល់លទ្ធផល ៥-០។ នេះជាជ័យជម្នះដំបូងសម្រាប់ពួកគេនៅរដូវកាលថ្មី Saudi Pro League ដ្បិត ៣ ជុំ ទើបស្គាល់ឈ្នះ ១ កន្លងមកចាញ់ដល់ទៅ ២។
យ៉ាងណាចាប់អារម្មណ៍ជារឿងអស់សំណើចនៅមុនការប្រកួត កំឡុងពេលកីឡាករតម្រង់ជួរចាប់ដៃគ្នាទៅវិញទៅមក ហួសចិត្តបំផុតត្រង់ចំណាប់អារម្មណ៍ទឹកមុខរបស់ Sadio Mane ប្រៀបដូចជាខ្មោចលង ព្រោះគេមិនធ្លាប់ដឹង ក៏មិនចង់ជឿ ស្មានតែសមាជិកខាងក្រុមខ្លួន ថ្ងៃនេះអត់មានឈ្មោះលេង ហើយបែរទៅចូលរួមនៅខាងក្រុមគេមួយរំពេច។
នោះគឺរវាងបងប្អូនភ្លោះ Ali Lajami សមាជិកខាងក្លឹប Al Nassr និង Qassem Lajami សមាជិកខាងក្លឹប Al Fateh។ ម្ចាស់អាវលេខ ៧៨ លេងតំណែងការពារ Ali ប្រកួតយប់មិញ មិនមានឈ្មោះក្នុងបញ្ជីនោះទេ កុំថាឡើយសូម្បីកៅអីបម្រុង ដល់តែហើយបែរលេចមុខកីឡាករម្នាក់ទៀត មានមុខមាត់ដូចបេះដាក់ទៅនឹង Ali តែពាក់ឈុតរបស់ក្លឹប Al Fateh ដើរមកចាប់ដៃខាងគូប្រជែង Al-Nassr។
មួយស្របក់ដែលខ្សែប្រយុទ្ធវ័យ ៣១ ឆ្នាំ បានឃើញភ្លាម គេហាក់ភ្ញាក់ផ្អើលភ្លែត ព្រោះអត់ធ្លាប់ដឹងទេថា Ali គេមានបងប្អូនភ្លោះរួមអាជីពនៅ Saudi Pro League ក៏នឹកស្មានតែ Ali ទៅឈរជើងខាងក្រុមគូប្រជែងទេតើ។ ដល់ហើយទើបដឹងថា នោះជាបងប្អូនភ្លោះរបស់គេស្មោះ រួចក៏ជាខ្សែការពារដូចគ្នា ហើយពាក់អាវលេខបញ្ច្រាសនឹង Ali ពី ៧៨ មកជា ៨៧ ឈរជើងពេញតង់យប់មិញ។
យើងមើលទឹកមុខរបស់ Mane ពេលនោះ ពិតជាគួរឲ្យអស់សំណើចត្រង់គេឆ្លៀតងាកមកលួចមើលម្តងទៀត ដោយអារម្មណ៍ងឿងឆ្ងល់មិនអស់ចិត្ត។ ដល់ថ្នាក់មានអ្នកគាំទ្រខ្លះ បញ្ចេញមតិបែបលេងសើចថា បើអត់ប្រាប់ នៅពេលប្រកួត សង្ស័យ Mane ច្រឡំទាំងប៉ះបាល់ឲ្យ Qassem ច្រឡំថាជា Ali ផងមិនដឹង។
Al Fateh's Qassem Lajami has a twin brother, Ali, who is Sadio Mane's teammate at @AlNassrFC_EN…
Watch his reaction when he shakes hands with his twin! 😂#yallaRSL #RoshnSaudiLeague pic.twitter.com/oTsW9ZnPFF
— Roshn Saudi League (@SPL_EN) August 25, 2023
គួរឲ្យដឹងដែរថា បងប្អូនភ្លោះ Ali និង Qassem Lajami ពីររូបនេះ កើតនៅថ្ងៃតែមួយ ២៤ មេសា ឆ្នាំ ១៩៩៦ មានអាយុ ២៧ ឆ្នាំដូចគ្នា។ កម្ពស់ក៏ប៉ុនគ្នា ១,៧៨ ម៉ែត្រ ជាកីឡាករសញ្ជាតិអារ៉ាប៊ីសាអូឌីត ដើមឡើយនោះលេងឲ្យក្លឹបតែមួយផង កាលនៅ Al-Khaleej និង Al-Fateh ទើបតែពេលចុងក្រោយដែល Ali ជ្រើសការផ្ទេរមក Al-Nassr ដោយឯកឯង។
ចុងក្រោយផ្សារភ្ជាប់ទៅរឿងរ៉ាវដ៏អស្ចារ្យយប់មិញនេះបន្តិច កីឡាករសេណេហ្គាល់និងតារាឆ្នើមព័រទុយហ្គាល់ Cristiano Ronaldo ត្រូវបានគេដាក់រហស្សនាមជា ដាវញីឈ្មោល ពេញលេញហើយនៅ Al-Nassr បន្ទាប់តែខាង Mane រកបាន ២ គ្រាប់ ខាង CR7 រកបាន Hat-trick ឬ ៣ គ្រាប់ ក៏ឆ្ងាញ់បំផុតត្រង់ការប៉ែងជើងក្រោយ Assist ឲ្យបុរសបេះដូងមាសល្អនោះល្អ។
ស្ថិតិជារួមរដូវកាលនេះ Mane បង្ហាញខ្លួន ៤ ប្រកួត រកបាន ៣ គ្រាប់ ស្របពេល Ronaldo ៣ ប្រកួត ៣ គ្រាប់ ២ Assist។ បេសកកម្មបន្ទាប់របស់ពួកគេ គឺត្រូវជួប Al-Shabab នៅ SPL ក៏នឹងមានផ្សាយបន្តផ្ទាល់លើទំព័រ CTS SPORTS ផងដែរ៕
ប្រភព៖ បរទេស
