កាលពីខែមករា ឆ្នាំ ២០២២ Mason Greenwood ត្រូវបានក្លឹបអាណាព្យាបាល Manchester United ប្រកាសព្យួរឈ្មោះ ក្រោមហេតុផលដែលកីឡាកររងការចោទប្រកាន់ពាក់ព័ន្ធបទល្មើសប៉ុនប៉ងរំលោភ ប្រើហិង្សា និងបង្ខិតបង្ខំបំពានទៅលើស្រ្តីជាសង្សារ រួចរំលងប៉ុន្មានខែបន្ទាប់ទល់ចុងឆ្នាំ ទើបត្រូវបានតុលាការដោះលែងឲ្យនៅក្រៅឃុំ តែគ្រប់យ៉ាងគឺនៅបន្តបើកការស៊ើបអង្កេតដដែល។
រួចចូលមកដល់ដើមឆ្នាំ ២០២៣ ក្លឹបបិសាចក្រហម ក៏ព្យាយាមរកវិធីដោះស្រាយ និងសិក្សាពីឱកាសនាំយកយុវជនពោរពេញដោយទេពកោសល្យលើទីលាន ត្រលប់មកឈរជើងជួយក្លឹបជាថ្មី តែគ្រប់យ៉ាងវាមិនដូចការរំពឹងទុកឡើយ។ ជាការពិតថ្នាក់លើក្លឹបព្យាយាមចង់ឲ្យអតីតយុវជនថ្នាលរូបនេះ អាចបង្ហាញមុខជាថ្មី ដល់ព្រមអនុញ្ញាតឲ្យគេមកហ្វឹកហាត់ម្តងទៀត តែតាមការស្ទាបស្ទង់ស្ថានការណ៍ចុងក្រោយ វាមិនអាចទៅរួច ស្របពេលដែលមានការប្រឆាំងដាច់អហង្ការចេញពីមតិមួយក្រុមធំលើប្រព័ន្ធផ្សព្វផ្សាយ ដល់ក្លឹបសម្រេចផ្តាច់កុងត្រា ចែកផ្លូវរវាងកីឡាករ ក្នុងលក្ខខណ្ឌព្រមព្រៀងទាំងសងខាង។
មកទល់ពេលនេះ មិនទាន់មានការប្រកាសផ្លូវការដែលថា Greenwood ក្លាយជា Free Agent លើទីផ្សារដោះដូរនោះទេ តែវាប្រៀបដូចជាសញ្ញាឲ្យតម្រុយដឹងមុនរួចទៅហើយ ពោលជាការជូនដំណឹងទៅបណ្តាភាគីក្លឹបចង់បាន ចាប់អារម្មណ៍មកលើខ្សែប្រយុទ្ធវ័យ ២១ ឆ្នាំ។ សូម្បីតែ Fabrizio Romano ជាទំព័រគួរឲ្យទុកចិត្ត ក៏បានទទួលស្គាល់ពាក់ព័ន្ធរឿងនេះដែរ។
ទោះជាយ៉ាងណា បើសួរថា តើទ្រនំបន្ទាប់របស់ Greenwood គឺជាក្លឹបណា? ចម្លើយពិតជាពិបាកនឹងឆ្លើយ ត្រង់បណ្តាក្លឹបធំៗទាំងអស់ហាក់រាថយ ព្រោះខ្លាចបំផុតគឺការអាប់អោនកិត្តិយសក្លឹប ខ្លាចទទួលរងសម្ពាធពីអ្នកគាំទ្រ ដូចគ្នានឹងអាចឲ្យមិត្តរួមទ្រនំថ្មីរបស់ Greenwood រងសម្ពាធពីសំឡេងខាងក្រៅ ក្រោមហេតុផលជ្រើសយកកីឡាករជាប់បទល្មើសមកប្រើប្រាស់ ពិសេសគឺអ្នកគាំទ្រជានារីៗផ្ទាល់តែម្តង។
បង្វែរទៅការយល់ឃើញរបស់ Chris Sutton ជាអតីតកីឡាករនៅក្លឹប Blackburn Rovers និង Chelsea បន្តិច ដោយលោកបានសង្កត់ធ្ងន់ ថាស្លាបប្រយុទ្ធជំនាញជើងសងខាង គ្មានផ្លូវនឹងអាចជាន់ដីក្លឹបនៅអង់គ្លេសជាថ្មីម្តងទៀតបានទេ តែបើក្លឹបនៅក្រៅតំបន់ ដូចខាងអារ៉ាប៊ីសាអូឌីត នោះប្រហែលជាអាច។
ប្រាប់ទៅ Daily Mail៖ “Manchester United មានតែមធ្យោបាយសម្រេចចិត្តមួយហ្នឹងប៉ុណ្ណោះ ហើយដល់ទីបំផុតពួកគេក៏ធ្វើវា នេះជាការសម្រេចចិត្តដ៏សមហេតុសមផល តែយ៉ាងណាវានឹងមិនអាចទៅរួចឡើយ ដែល Greenwood អាច Restart អាជីពរបស់គេនៅអង់គ្លេស ត្រង់វាជាសម្ពាធទៅលើមិត្តរួមក្រុម នៅគ្រប់បណ្តាក្លឹបទាំងអស់ដែលគេទៅចូលរួម”។
លោកបន្តថា៖ “Greenwood គេចាំបាច់ត្រូវតែផ្លាស់ចេញទៅក្រៅប្រទេស និងព្យាយាមស្រោចស្រង់អាជីពរបស់ខ្លួនត្រលប់មកវិញ គេជាក្មេងប្រុសពោរពេញដោយទេពកោសល្យ គ្រាន់វង្វេងខ្លួនឯង ជ្រុលបង្កកំហុសដ៏ធំមួយ តែយ៉ាងណាគេអាចបត់វាត្រលប់មកវិញ គ្រាន់មិនអាចធ្វើនៅក្នុងប្រទេសមួយនេះបាន ចំពោះខ្ញុំបើមើលពីខាងក្រៅទៅ គឺគេអាចទៅចូលរួមនៅអារ៉ាប៊ីសាអូឌីត”។
យើងមិនច្បាស់ថាការចរចាខាងក្រៅបែបណាទេ ដឹងត្រឹមចចាមអារ៉ាមដែលល្ហិចល្ហៀង Al-Ettifaq ចង់បាន Greenwood គឺត្រូវបានអ្នកចាត់ការលោក Steven Gerrard ចេញមកបញ្ជាក់ច្បាស់ៗ ថាជាព័ត៌មានមិនពិត។ ស្របពេលដែលការផ្ទេរទៅ AS Roma ជួបអតីតគ្រូចាស់ Jose Mourinho ក៏ត្រូវបានមនុស្សជំនិតមួយក្រុម អះអាងថាគ្រូសញ្ជាតិព័រទុយហ្គាល់មិនមានចិត្តចង់រួបរួមនឹងអតីតសិស្សដូចជាគេម្តងទៀតឡើយ៕
ប្រភព៖ បរទេស