បណ្តាកីឡាករ អ្នកចាត់ការក្នុងពិភពបាល់ទាត់ប្រហែលសម្លឹងមើលទៅរបស់មួយចំនួន ត្រឹមជារបស់សាមញ្ញធម្មតាៗ តែនៅក្រសែភ្នែកអ្នកគាំទ្រខាងក្រៅ ប្រហែលមើលឃើញវាជាកំណប់មហាសាលក៏មាន។ របស់ប្រើប្រាស់ របស់ជាប់ខ្លួនមានពាក់ព័ន្ធនឹងវីរបុរស ៣ រូប ដែល CTS SPORTS យកមកបង្ហាញ វាត្រូវបានគេយកមកដាក់ដេញថ្លៃ ខ្លះក៏បង្វែរទៅជាសាច់ប្រាក់ចូលរួមការងារសប្បុរសធម៌ ខ្លះទៀតក៏ចូលហោប៉ៅឯកជន រាប់ជារបស់សំណាងសម្រាប់ពួកគេ៖
៣) បំណែកស្មៅលើទីលាន Messi ប្រកួត
សារថយក្រោយទៅប៉ុន្មានខែមុនក្នុងប្រទេសចិន មានវត្តមានតារាឆ្នើមក៏ជាម្ចាស់ជើងឯក World Cup គឺ Lionel Messi មកចូលរួមជាមួយជម្រើសជាតិ ប្រកួតទល់អូស្រ្តាលី យកឈ្នះ ២-០។ ក្រោយចប់ការប្រកួតនោះ គណៈរៀបចំកីឡដ្ឋានលោក Zhonghe Gongti ក៏បានជីកយកបំណែកស្មៅមកដាក់លក់ក្នុងតម្លៃ ៤៩៩ យន់ ឬប្រហែល ៧០ ដុល្លារ/បំណែក។
ពុំមានការបញ្ជាក់ច្បាស់អំពីវិមាត្រនៃស្មៅមួយបំណែកៗនោះទេ ដឹងត្រឹមគេបានជីកវា ចេញពី ៣ ផ្នែកលើទីលាន ត្រង់ ១) ក្នុងទីតាំងដែលម្ចាស់អាវលេខ ១០ ប្រើជើងឆ្វេងបញ្ចប់ទីរកបានគ្រាប់បាល់ នៅវិនាទីទី ៨១ រាប់ជាគ្រាប់បាល់លឿនបំផុតក្នុងអាជីព ទី ២) ត្រង់ទីតាំងដែល Messi បណ្តើរបាល់ផុតខ្សែការពារដល់ទៅ ៣ រូប និងទី ៣) ទីតាំងដែល Messi ថ្មើរជើងកំឡុង ៩០ នាទីលើទីលាន។
ស្មៅទាំងអស់នោះ ត្រូវបានគេកាត់ចំនួន ២ ០២៣ បំណែក ស្មើនឹងតម្លៃសរុបជិត ១៥០ ០០០ ដុល្លារ មានទាំងចែកជូនអ្នកគាំទ្រសំណាងដែលបានឈ្នះក្នុងការចាប់ឆ្នោត និងសេសសល់ប៉ុន្មានដាក់លក់ជាសាធារណៈ។
២) ស្លាកប្រធានក្រុម Ronaldo គប់ចោល
នៅការប្រកួតវគ្គជម្រុះបឋម World Cup ឆ្នាំ ២០២១ ពេលស្មើ ២-២ ទល់ស៊ែប៊ី ពេលនោះប្រធានក្រុមជម្រើសជាតិព័រទុយហ្គាល់ ហាក់មានការខឹងសម្បាចិត្តជាខ្លាំង អំពីចំណាត់ការអាជ្ញាកណ្តាល រួចក៏បានដើរចេញពីទីលាន ជាមួយការគប់ចោលស្លាកប្រធានក្រុម។
ទោះជាយ៉ាងណា បែរជាមានអ្នករើសយកវាទុក ហើយដាក់ដេញថ្លៃ បានដល់តម្លៃ ៧៥ ០០០ ដុល្លារ ហើយបង្វែរប្រាក់ទាំងអស់ទៅជួយសង្គ្រោះជីវិតក្មេងប្រុសអាយុ ៦ ឆ្នាំ ដែលត្រូវការប្រាក់បន្ទាន់សម្រាប់ព្យាបាលជំងឺ។
១) ស្ករកៅស៊ូ Sir Alex ខ្ជាក់ចោលលើទីលាន
នៅប្រកួតដឹកនាំចុងក្រោយ ក្រោមចំណាត់ការលោក Sir Alex Ferguson នៅថ្ងៃទី ១៣ ឧសភា ឆ្នាំ ២០១៣ ទល់ក្លឹបWest Bromwich Albion ពេលនោះ គ្រូតាសញ្ជាតិស្កុតឡែន បានខ្ជាក់ចោលស្ករកៅស៊ូដែលទំពាចេញពីមាត់ដូចសព្វមួយដងមកលើទីលាន។
យ៉ាងណាបែរត្រូវបានអ្នកគាំទ្រ Man United មួយរូប មើលឃើញវាជារបស់មានតម្លៃ ហើយយកទៅដាក់លក់លើគេហទំព័រ eBay ដល់តម្លៃជិតកន្លះលានដុល្លារអាមេរិក។ នេះមានន័យថា ត្រឹមតែស្ករកៅស៊ូ Sir Alex ខ្ជាក់ចោលមួយដុំសោះ អាចកាត់កងស្មើតម្លៃផ្ទះដ៏ធំទំនើបមួយទីតាំង៕
ប្រភព៖ បរទេស
