ម្ចាស់ពាក្យផ្ទុះការគាំទ្រ ‘Here we go!’ ដែលមានឈ្មោះ Fabrizio Romano ជាការពិតត្រូវបានអ្នកគាំទ្រទទួលស្គាល់ជាស្តេចរាយការណ៍ព័ត៌មានដោះដូរកីឡាករដ៏គួរឲ្យទុកចិត្តបំផុត ជារួមឲ្យតែព័ត៌មានបុគ្គលម្នាក់នេះចុះផ្សាយ សឹងតែ ៩០ ភាគរយឡើងហើយនឹងក្លាយជាការពិត លើកលែងតែមានបញ្ហារាំងស្ទះអ្វីមួយពាក់កណ្តាលទីនៃការចរចា។
មួយថ្ងៃៗអង្គុយតែជាមួយទូរស័ព្ទ ជាមួយកុំព្យូទ័រ ប្រមែប្រមូលព័ត៌មានពីប្រភពអាថ៌កំបាំងនានាមកចែកជូនបងប្អូនអ្នកគាំទ្រលើបណ្តាញសង្គម សរុបចូលជាង ៣៤ លាន Followers គិតទាំងលើ Instagram ទាំងលើ Twitter រួមទាំង YouTube មាន ១,៩ លាន Subscribers ផ្សេងទៀត។
ចុះអ្នកធ្លាប់ឆ្ងល់ទេថា ទំព័រ Fabrizio Romano ដែលមិនមែនជា Fan Page ផ្អៀងទៅខាងណាមួយ តើនៅពីក្រោយនោះ ចាក់ឲ្យជ្រៅចូលទៅក្នុងដួងចិត្តលោកផ្ទាល់ស្រលាញ់គាំទ្រ វាជាក្លឹបបាល់ទាត់ណាមួយទៅ? បើអ្នកស្រាវជ្រាវមើលប្រវត្តិបុរសវ័យ ៣០ ឆ្នាំរូបនេះ ដែលដឹងថាលោកកើតក្នុងទីក្រុង Naples ប្រទេសអ៊ីតាលី ប្រហែលជាអ្នកសន្មតឥតស្ទាក់ស្ទើរ ថា Romano គាំទ្រក្លឹប Napoli នៅក្របខ័ណ្ឌ Serie A។
តែចម្លើយ គឺមិនត្រឹមត្រូវឡើយ ផ្ទុយទៅវិញគឺជាក្លឹបនៅប្រទេសអង់គ្លេសឯណោះ។ ចាប់ចេះប្រលូកក្នុងអាជីពជាអ្នកសារព័ត៌មានបាល់ទាត់ តាំងអាយុ ១៨ ឆ្នាំ មកទល់ពេលនេះ Romano ឥតផ្លាស់ប្ដូរចិត្ត គឺស្រលាញ់ស្ម័គ្រស្មោះជាមួយក្លឹប Watford F.C. សព្វថ្ងៃស្ថិតនៅក្របខ័ណ្ឌលំដាប់ពីរអង់គ្លេស Championship។
ទំព័រផ្លូវការរបស់ Romano ធ្លាប់បានសរសេររៀបរាប់៖ “ស្មោះត្រង់ទៅ ខ្ញុំគឺជាអ្នកគាំទ្រ Watford ពួកគេតែងតែជាក្លឹបដែលខ្ញុំជ្រើសយកមកកម្សាន្តលេងនៅលើហ្គេម FIFA និង Football Manager តាំងខ្ញុំអាយុ ១៥ ឆ្នាំម្ល៉េះ ហើយហេតុផលពីក្រោយនោះធំមួយទៀត គឺ Watford ជាក្លឹបគ្រប់គ្រងដោយម្ចាស់ជាជនជាតិអ៊ីតាលីផ្ទាល់តែម្តង”។
គួរឲ្យដឹងដែរថា ក្លឹប Watford ត្រូវបានទិញយកដោយត្រកូលគ្រួសារអ្នកជំនួញល្បីឈ្មោះអ៊ីតាលី Pozzo រួចសព្វថ្ងៃមានឈ្មោះជាម្ចាស់ភាគហ៊ុនធំលោក Gino Pozzo។ កន្លងមកនៅរដូវកាល ២០២១/២២ ក៏ក្លឹបម្ចាស់ដី Vicarage Road Stadium ធ្លាប់បានឡើងមកក្របខ័ណ្ឌលំដាប់មួយ Premier League តែកាត់ឈ្មោះធ្លាក់ចេញទៅវិញ ក្រោយបញ្ចប់រដូវកាលឈរនៅលេខរៀងទី ១៩។
សមិទ្ធផលរសើបធំបំផុតគឺនៅពាន FA Cup រដូវកាល ២០១៨/១៩ ពួកគេឆ្លងមកទល់វគ្គផ្តាច់ព្រ័ត្រជាលើកទីពីរក្នុងប្រវត្តិសាស្រ្ត តែបរាជ័យក្រោមថ្វីជើង Man City ស្ពឹកមុខ កាលនោះ ០-៦។
និយាយអំពីទំនាក់ទំនងរវាង Romano បន្តិច ភាគីសងខាងក៏តែងតែបញ្ចេញមតិសាទរគ្នាទៅមកលើបណ្តាញសង្គម ហើយនៅខាងក្រៅក៏អ្នករាយការណ៍ខាងលើផ្ទាល់ ធ្លាប់ទៅទស្សនាដល់កីឡដ្ឋានផ្ទាល់ ៤ លើកផងដែរ រួចកីឡាករអ៊ីតាលីមួយចំនួន Romano ធ្លាប់ស្រលាញ់គាំទ្រជាសមាជិក Watford ផ្ទាល់ មានដូច Diego Fabbrini, Marco Motta, Marco Cassetti, Fernando Forestieri ជាដើម៕
ប្រភព៖ បរទេស