ចាប់ពីពាក់កណ្តាលខែសីហានេះតទៅ ដូច CTS SPORTS បានលើកឡើងកន្លងមក គឺជាពេលវេលាមមាញឹកនៃពិភពបាល់ទាត់អន្តរជាតិ ហើយក្តៅគគុកបំផុតគឺនៅក្របខ័ណ្ឌអង់គ្លេស Premier League ទើបតែបញ្ចប់លទ្ធផលជុំទី ១ រួចរាល់។
បង្ហាញត្រួសៗ ក្លឹប Top 5 កំពុងនាំមុខនៅតារាង មានដូចជា Newcastle លេខ ១, Brighton លេខ ២, Man City លេខ ៣, Arsenal លេខ ៤ និង Crystal Palace លេខ ៥ ពួកគេទទួលបាន ៣ ពិន្ទុស្មើ គ្រាន់ខុសគ្រាប់បាល់ចំណេញ ដែលសេះសមុទ្រដឹកនាំដោយលោក Eddie Howe រកបានច្រើនគ្រាប់នាំមុខគេ។
ទោះជាយ៉ាងណា ការយល់ឃើញរបស់លោក Sir Alex Ferguson ជាអតីតគ្រូកាន់ឆ្នាំរបស់ Man United ក៏ជាអ្នកវិភាគមួយរូបនៅពេលបច្ចុប្បន្ន បែរជាចាប់អារម្មណ៍ទៅលើក្លឹប Aston Villa ឯណោះ ដែលថាទាក់ចិត្តលោកជាងបណ្តាក្លឹបណាៗទាំងអស់។ នេះវាពិតជាភ្ញាក់ផ្អើលត្រង់ ក្លឹបដឹកនាំដោយអ្នកចាត់ការលោក Unai Emery រងបរាជ័យស្ពឹកមុខ ៥-១ ក្រោមថ្វីជើងម្ចាស់ផ្ទះ Newcastle រុញឲ្យពួកគេឈរនៅបាតតារាង លេខ ២០ បណ្តោះអាសន្ន។
ហេតុផលគឺត្រង់ អតីតគ្រូតាសញ្ជាតិស្កុតឡែន មើលឃើញថា តោកំណាចលឿង ពួកគេចេះបង្កើតទំនុកលេង គ្រប់គ្រងសាច់បាល់លើទីលានបានល្អខ្លាំង ជាស្ថិតិមិនគួរឲ្យជឿ គ្រាន់តែមិនមានសំណាងតែប៉ុណ្ណោះឯង បើធៀបនឹងកម្រិតលេង គីឡូក្លឹបកំពុងឡើងជើងម្ចាស់ដី Newcastle។
យើងសារថយក្រោយទៅមើលស្ថិតិប្រកួតនោះបន្តិច មុនស្តាប់សម្រង់សម្តី Sir Alex ដោយខាងម្ចាស់ផ្ទះរកបានគ្រាប់បាល់ដោយ Sandro Tonali, Callum Wilson, Harvey Barnes និង Alexander Isak ពីរគ្រាប់ម្នាក់ឯង រួចខាងភ្ញៀវ ធ្វើបានដោយ Moussa Diaby។
ក៏ប៉ុន្តែយើងទៅមើលស្ថិតិសឹងតែប្រហាក់ប្រហែលគ្នា ជាក់ស្តែង Newcastle គ្រប់គ្រងបាល់ ៥៣ ភាគរយ បញ្ជូន ៥០២ ប៉ះ អត្រាបញ្ជូនជោគជ័យ ៨៥ ភាគរយ ស៊ុត ១៧ លើក ចំគោលដៅ ១៣ លើក មានឱកាសស៊ុតបាល់ជ្រុង ៦ ដង។ ដល់តែក្រឡេកទៅខាង Aston គ្រប់គ្រងបាល់ ៤៧ ភាគរយ បញ្ជូន ៤៤៧ ប៉ះ មានអត្រាបញ្ជូនជោគជ័យដូចគ្នា ៨៥ ភាគរយ គ្រាន់ស៊ុតតិចជាងបន្តិច ១៦ លើក ហើយចំគោលដៅត្រឹម ៦ លើក ខណៈការទាត់បាល់ជ្រុងមាន ៥ ដង។
និយាយទៅ NBC Sports៖ “ស្មោះត្រង់ទៅ ខ្ញុំមើល Aston Villa លេងទល់ Newcastle ថ្ងៃមុន ខ្ញុំអត់ជឿថាកើតគ្រាប់បាល់ប៉ុណ្ណឹងរួចទេ ក៏ដោយសារអី ដោយសារត្រង់ថា Aston Villa ពួកគេលេងបានអស្ចារ្យខ្លាំងណាស់ នេះរបូតគ្រាប់បាល់ស៊យតែប៉ុណ្ណោះឯង”។
លោកបន្ត៖ “នេះ Newcastle ប៊ិះតែនឹងពិបាកយកឈ្នះផងក្នុងដីខ្លួនឯង តែយ៉ាងណាអ្នកចាត់ការ [Eddie Howe] គាត់ធ្វើបានល្អ វាជាប្រកួតដ៏ភ្ញាក់ផ្អើលមួយ ខ្ញុំចង់មានន័យថា Aston Villa មកលេងក្រៅដីបានប៉ុណ្ណឹង វាពិតជាល្អខ្លាំង គ្រាន់តែមិនអាចរកបានគ្រាប់បាល់”។
គួរឲ្យដឹងដែរថា Sir Alex ជាគ្រូមានបទពិសោធន៍កាន់ឆ្នាំ គ្រប់ពាក្យសម្តីរបស់គាត់គឺ និយាយមកមុត និងមានភាពជឿជាក់ មើលមិនងាយខុស ថាទៅត្រូវមិនងាយខកឡើយ។ នេះយើងចាំមើលប្រកួតបន្ទាប់ទៀតរបស់ ក្លឹបមានអាយុកាល ១៤៩ ឆ្នាំ ទល់ Everton នាវេលាម៉ោង ០៨:០០ នាទីយប់ ថ្ងៃអាទិត្យ ទី ២០ សីហាខាងមុខ ក៏នឹងមានផ្សាយបន្តផ្ទាល់លើទំព័រ CTS SPORTS ផងដែរ៕
ប្រភព៖ បរទេស