មិនដឹងមានបញ្ហាអ្វីឲ្យប្រាកដ បើថាស្ថានភាពលុយកាក់ក៏ Liverpool មិនជាខ្វះខាតខ្លាំង បើថាទម្រង់លេងក៏ពួកគេនៅកម្រិតល្អជាងទាំង Chelsea ទៅទៀត។ តែជាបន្តបន្ទាប់កីឡាករគោលដៅដែលក្លឹបដឹកនាំដោយ អ្នកចាត់ការលោក Jurgen Klopp សម្លឹងចង់បាន ទោះចរចាតម្លៃត្រូវគ្នាហើយរវាងភាគីក្លឹបអាណាព្យាបាល ចុងក្រោយក៏បែរបរាជ័យ ក្រោយតែសាមីខ្លួនកីឡាករផ្ទាល់ ឆ្លើយតបពាក្យ “No” មិនព្រមទៅចុះចូល។
យើងសារថយក្រោយទៅខែឧសភា មុនបញ្ចប់រដូវកាល ក្លឹបម្ចាស់ដី Anfield ធ្លាប់បានបង្កើតលទ្ធផលភ្ញាក់ផ្អើលតាមរយៈការយកឈ្នះ ៧-០ ទៅលើ Man United ដល់តែសារមក ៣ ខែក្រោយថ្មីថ្មោងនេះ ពួកគេបែរចាញ់យុទ្ធសាស្រ្តចរចា របូតគោលដៅធំដល់តែ ៧ រូបទៅវិញ ឲ្យបណ្តាក្លឹបនានា៖
៧) Jude Bellingham
មិនមែនហង្សមិនចង់បានកីឡាករអង់គ្លេសខាងលើទេ ថាទៅចូលចែចូវរវាងភាគីក្លឹបអាណាព្យាបាលចាស់ Dortmund មុនទាំង Real Madrid ទៅទៀត។ ពេលនោះកត្តាតម្លៃខ្លួនក៏ល្ហៀងៗថាត្រូវរ៉ូវគ្នាអស់ហើយដែរ តែចម្លើយចុងក្រោយរបស់ខ្សែបម្រើឆ្នើមវ័យក្មេង Bellingham បដិសេធមិនរើសយក Liverpool ក៏ដោយសារពួកគេរបូតការប្រជែងយកកៅអី Champions League ជាក់ស្តែងបញ្ចប់រដូវកាលមុន ឈរលេខ ៥ នៅតារាង Premier League។
៦) Enzo Fernandez
ងាកមកខ្សែការពារវ័យក្មេងរបស់អាហ្សង់ទីន ក៏ដូចគ្នាដែរ ត្រង់ Liverpool តាមក្រវែលមើលតាំងមុនឡើងជើងនៅ World Cup កាតារ ដល់ហើយចម្លើយជ្រើសយកចុងក្រោយរបស់កីឡាករ មើលឃើញថា Chelsea ល្អជាង។
៥) Moises Caicedo (ម៉ូយសេស កៃសេដូ)
ឈឺបំផុតគឺជាមួយករណីកីឡាករអេក្វាឌ័រនេះឯង ដោយដំបូងឡើយ Brighton ជាក្លឹបមេ បើកភ្លើងខៀវព្រមលក់ទៅឲ្យ Liverpool ហើយ ជាមួយតម្លៃកំណត់ត្រាដូចគ្នា ១១១ លានផោន។ ដល់តែចុះឡើង Caicedo បែរស្ម័គ្រស្មោះមិនបោះចោលក្តីស្រមៃទោះអត់បានលេងពានអឺរ៉ុប ហើយជ្រើសយក Chelsea ជាទ្រនំបន្ទាប់។
៤) Romeo Lavia (រ៉ូម៉េអូ ឡាវៀរ)
គិតចង់ពង្រឹងបន្ថែមប្រព័ន្ធបម្រើ ក្រោយកីឡាករមួយចំនួនចាកចេញ ដល់ហើយ Klopp ក៏មើលឃើញយុវជនវ័យ ១៩ ឆ្នាំមួយរូបផ្សេងទៀត របស់ក្លឹប Southampton។ Liverpool ហ៊ានចាយលុយ ៥៥ លានផោន ដើម្បីតែចង់បាន Lavia តែយ៉ាងណាពេលចុងក្រោយនេះ លេចលឺមកថា កីឡាករទំនងដើរតាមគន្លង Caicedo ផ្ទេរទៅតោខៀវយ៉ាងដូច្នោះដែរ។
៣) Mason Mount
ដំបូងឡើយក៏ដាក់ចិត្តដូចតែភាគីក្លឹបចង់បានដទៃ ដល់ហើយក្រោយលឺចម្លើយរបស់ Mount ថាមិនចាប់អារម្មណ៍ Liverpool ក៏ពួកគេដកចិត្តចាប់អារម្មណ៍ទៅវិញ ហើយចុងក្រោយកីឡាករសម្រេចមកក្លាយជាម្ចាស់អាវលេខ ៧ ថ្មី នៅក្លឹបក្នុងក្តីស្រមៃគឺ Man United។
២) Levil Colwill (ឡេវៀល ខូលវៀល)
ងាកមកជញ្ជាំងការពារវ័យក្មេងរបស់ឈុតថ្នាល Chelsea ទោះមិនប្រាកដប្រជាអំពីឱកាសលើទីលាននៅ Stamford Bridge ក៏ទីបំផុតគេនៅតែហ៊ានបដិសេធសំណើរបស់ក្លឹបហង្សក្រហមទាំងមិនស្តាយក្រោយ រួចទើបតែស៊ីញ៉េកុងត្រាឡើងមកឈុតធំថ្មីថ្មោងនៅខែកក្កដាកន្លងទៅ។
១) Sofyan Amrabat (សុហ្វយ៉ាន់ អាំរ៉ាបាត)
២ ទៅ ៣ លើកដែលក្លឹបមានកៅអីនៅ Europa League ចាប់អារម្មណ៍មកលើខ្សែបម្រើម៉ារ៉ុក ហើយសព្វថ្ងៃគេមិនទាន់ជ្រើសយកក្លឹបណាមួយជាទ្រនំច្បាស់ការនៅឡើយ ពោលបន្តក្រោមការកាន់កាប់របស់ Fiorentina ដដែល។ តែចម្លើយ គ្រប់គ្នាបានដឹងមុនរួចបាត់ទៅហើយ ប្រាកដណាស់ជា Man United ដែលកីឡាករបើកចំហរចិត្តទទួលយក៕
ប្រភព៖ បរទេស