បើតាមរបាយការណ៍ពី Fabrizio Romano រាយការណ៍មក ដំណើរផ្ទេរ Neymar ចេញពីក្លឹប Paris Saint-Germain ទៅកាន់ក្លឹបនៅមជ្ឈិមបូព៌ា Al-Hilal គឺឈានដល់ការសម្រេចហើយ គ្រប់យ៉ាងក៏ស៊ីញ៉េរួចរាល់ នេះរង់ចាំតែពេលវេលាសមស្របក្នុងការប្រកាស ទំនងធ្វើឡើងយូរបំផុតនៅចុងសប្តាហ៍ខាងមុខ។
តាមថាទៅកន្លងមក ក្លឹបដែលទើបបរាជ័យក្រោមថ្វីជើង Al Nassr នៅវគ្គផ្តាច់ព្រ័ត្រ Arab Club Champions Cup មួយនេះ ក៏ធ្លាប់បានចែចូវ Lionel Messi ម្តងហើយដែរ សារនោះសន្យាផ្តល់ឲ្យប្រាក់ឈ្នួល ៤៣៤ លានផោន/ឆ្នាំ តែកីឡាករអាហ្សង់ទីនមិនព្រម រួចជ្រើសយកទ្រនំថ្មី ជាក្លឹបនៅទឹកដីអាមេរិក។
ដល់តែងាកមកតារាឆ្នើមប្រេស៊ីល ជាជើងញាក់មួយរូប ក៏រាប់បានជាកីឡាករមានប្រជាប្រិយភាពបំផុតលំដាប់ទីបី បន្ទាប់ពី GOAT ទាំងពីរ ត្រូវបានក្លឹប Al-Hilal ដដែល អូសទាញចិត្តបានសម្រេច ជាមួយប្រាក់ឈ្នួល ១២៩,៤ លានផោន ឬចូលជាង ១៥០ លានអឺរ៉ូ/ឆ្នាំ។ បើយើងបែងចែកទៅ មួយខែរកបាន ១០,៨ លានផោន, មួយអាទិត្យរកបាន ២,៥ លានផោន, មួយថ្ងៃរកបានជាង ៣៥០ ០០០ ផោន ហើយតួលេខតូចបំផុតគឺមួយវិនាទី អាចរកបាន ៤,១០ ផោន ឬគិតជាលុយខ្មែរ ចូលជាង ២០ ០០០ រៀល។
តួលេខនេះបើធៀបនឹងកីឡាករល្បីៗនៅអឺរ៉ុប សឹងថាមួយថ្ងៃរបស់ Neymar ស្មើមួយសប្តាហ៍នៃចំណូលរបស់ពួកគេ តែបើធៀបនឹងកីឡាកររួមក្របខ័ណ្ឌតែមួយ ជាតួលេខទាបជាង Cristiano Ronaldo និង Karim Benzema។
ក៏ប៉ុន្តែអ្នករាល់គ្នា ប្រហែលមិនទាន់បានដឹងនោះទេ ថាកីឡាករវ័យ ៣១ ឆ្នាំ មិនចេះតែទទួលងាយៗឡើយ នេះក៏មានប្រយោជន៍ក្រៅផ្លូវការមួយចំនួនផ្សេងទៀត ដែលគេអាចកើបបានពីរដ្ឋាភិបាលនៅប្រទេសអ្នកមានអារ៉ាប៊ីសាអូឌីត។
បើតាមសារព័ត៌មាន Footmercato ចុះផ្សាយ មានប្រយោជន៍ធំ ៥ ពីលើប្រាក់ឈ្នួលអស់នោះ ទើបឈានដល់ការសម្រេចរវាងភាគី Neymar និង Al-Hilal ត្រង់៖
ទី ១) កីឡាករអាចទទួលបានការផ្តល់ឲ្យ នូវយន្តហោះឯកជនផ្ទាល់ខ្លួនមួយគ្រឿង សម្រាប់ការធ្វើដំណើរ។ យើងមិនច្បាស់អំពីតម្លៃនៃយន្តហោះឯកជននោះទេ ត្រង់មួយគ្រឿងគេមានក្នុងដៃសព្វថ្ងៃ ម៉ូដែល Embraer Legacy 450 ថ្លៃ ១០,៨ លានផោន អ៊ីចឹងមួយគ្រឿងថ្មីខាងមុខ ក៏អាចប្រហាក់ប្រហែលនោះ។
ទី ២) សិទ្ធពិសេសដូច Ronaldo ត្រង់ការរស់នៅជាមួយដៃគូស្នេហា ទាំងមិនទាន់រៀបការ។ ជាការពិតច្បាប់សាសនានៅអារ៉ាប៊ីសាអ៊ូឌីតមិនអនុញ្ញាតឲ្យគូស្នេហ៍ណាដែលមិនទាន់រៀបអាពាហ៍ពិពាហ៍ រួមរស់ជាមួយគ្នាបានឡើយ តែវាបានលើកលែងកន្លងមកសម្រាប់ CR7 ហើយសម្រាប់ Neymar និង Bruna Biancardi ជាមិត្តស្រី ត្រៀមសម្រាលកូនដំបូងថ្ងៃខាងមុខ ក៏អនុវត្តដូចគ្នា។
ទី ៣) ផ្តល់ឲ្យផ្ទះធំទ្រនំខ្ពស់ អមដោយបុគ្គលិកបម្រើការយ៉ាងយកចិត្តទុកដាក់
ទី ៤) ប្រាក់ចូលហោប៉ៅផ្សេងទៀត រៀងរាល់ Al-Hilal ឈ្នះម្តង ទទួលបាន ៨៧ ០០០ ដុល្លារ
ទី ៥) បង្ហោះរូបថតមួយសន្លឹកបានប្រាក់ចូលហោប៉ៅផ្សេងជិត ៥៥ មុឺនដុល្លារពីរដ្ឋាភិបាលអារ៉ាប៊ីសាអូឌីត។ វាជាកញ្ចប់ចំណាយ លើគោលដៅផ្សព្វផ្សាយទេសចរណ៍អំពីប្រទេស ហើយគ្រប់ការបង្ហោះចេញពីគណនីមាន ២១២ លាន Followers របស់តារាបាល់ទាត់ខាងលើ ពាក់ព័ន្ធរូបភាពនៅអារ៉ាប៊ីសាអូឌីត គេនឹងទទួលបានប្រាក់ឧបត្ថម្ភនោះបន្ថែម៕
ប្រភព៖ បរទេស