គិតត្រឹមរសៀលថ្ងៃសៅរ៍ ក្លឹប Bayern Munich បានប្រកាសផ្លូវការ អំពីការបង្ហាញវត្តមានកីឡាករចំណូលថ្មី Harry Kane រួចតាមរបាយការណ៍ពី Sky Sports ឯណោះបង្ហើបថា វាអាចទៅរួចដែលកីឡាករចុះឈ្មោះទាន់ពេលវេលាក្នុងការប្រកួតដណ្តើមពានរង្វាន់នៅរាត្រីនេះ។
ជាការពិតនៅវេលាម៉ោង ០១:៤៥ នាទីទៀបភ្លឺ ឈានចូលថ្ងៃអាទិត្យ ទី ១៣ សីហា CTS SPORTS ក៏នឹងមានការផ្សាយបន្តផ្ទាល់ជំនួបដណ្តើមពានរង្វាន់ DFL-Supercup ជាការជួបរវាងម្ចាស់ជើងឯក Bundesliga គឺ Bayern Munich ទល់ DFB-Pokal រដូវកាលចាស់ RB Leipzig ដូច្នេះក៏កុំភ្លេចចុច Follow ទំព័រមួយនេះឲ្យហើយទៅ ដើម្បីទទួលបានលីងទស្សនាឆាប់រហ័សជុំគ្នា។
ប្រសិនណាដូចការគ្រោងទុកដែលខ្សែប្រយុទ្ធវ័យ ៣០ ឆ្នាំ អាចចូលរួមការប្រកួតឲ្យក្លឹបដឹកនាំដោយលោក Thomas Tuchel នៅពេលប៉ុន្មានម៉ោងបន្ទាប់ នោះលទ្ធភាពក្នុងការឈ្នះពានរង្វាន់លើកដំបូងបង្អស់នៅអាជីពជាកីឡាករ ក៏មានភាគរយខ្ពស់នឹងអាចកើតឡើងទៅបានដូចគ្នា ដ្បិតអីប្រវត្តិជួប Leipzig កម្រ Bayern ស្គាល់បរាជ័យណាស់ ជាពិសេសនៅវគ្គដណ្តើមពាននេះតែម្តង។
យើងសារថយក្រោយត្រលប់ទៅខែមករា ឆ្នាំ ២០១១ ពេលដែលកីឡាករជំនាញជើងស្តាំ ទទួលបានឱកាសវិវត្តខ្លួនមកចូលរួមនៅឈុតធំ មិនប្រាថ្នាឡើយពានធំ នេះកុំថាពានតូច ក៏ Kane មិនទាន់ស្គាល់ជាតិនឹងគេផង ត្រង់ក្លឹបខ្លះដូចគីឡូ Leicester នៅចេះស្គាល់ជាតិ Premier League ស្គាល់ FA Cup មុនធ្លាក់ទៅកាន់លីគលំដាប់ពីរ។
ដល់តែ Kane ឈរជើងឲ្យមាន់ខ្នាយមាស Spurs បង្កើតទាំងកំណត់ត្រាអ្នកស៊ុតច្រើនបំផុតប្រចាំក្លឹប ក៏កើតតួលេខខ្ពស់ដាច់គេលំដាប់ទីពីរ ប្រចាំប្រវត្តិសាស្រ្តក្របខ័ណ្ឌ Premier League មាន ២១៣ គ្រាប់ ក៏ទីបញ្ចប់ស្ពាយត្រឹមកេរ្តិ៍ឈ្មោះបុគ្គល មិនបានកត់ត្រាក្នុងបញ្ជីពានរង្វាន់ មុនចាកចេញផ្ទេរមកក្លឹបថ្មីនៅដីអាល្លឺម៉ង់។
ដូច្នេះបើយប់នេះ ប្រធានក្រុមជម្រើសជាតិអង់គ្លេសអាចចូលរួមប្រកួត អាចឈ្នះពានដូចគ្រោងទុក នោះមានន័យថា គេបានចាយពេលត្រឹម ២៤ ម៉ោងឲ្យគត់ ក្រោយចាកចេញពីក្លឹបអង់គ្លេស ដើម្បីមកស្គាល់ជ័យជម្នះកាន់ពានផ្លូវការ តែគោលដៅធំបំផុតមួយទៀតគឺជាពាន UEFA Champions League ឯណោះ។
រំឭកជុំវិញកិច្ចព្រមព្រៀងនានាបន្តិច បន្ទាប់តែ Harry Kane បានបង្ហោះវីដេអូនិយាយពាក្យ ‘លា’ ទៅកាន់អ្នកគាំទ្រក្លឹបកាន់ឆ្នាំនៅមុននេះ ក្រឡេកទៅមើលតម្លៃផ្ទេរចេញ តាម Fabrizio Romano រាយការណ៍កន្លងមកគឺ ១០០ លានអឺរ៉ូ បូកប្រាក់ឧបត្ថម្ភផ្សេងៗ ២០ លានពីលើ ជាមួយសុពលភាពកុងត្រារយៈពេល ៤ ឆ្នាំពេញ។
ចំណែកទំហំប្រាក់ឈ្នួលសម្រាប់អតីតក្មេងតូច Arsenal ធ្លាប់បោះបង់ ខាងក្លឹប Bayern ចាត់ចែងផ្តល់ឲ្យ ៥៥៥ ០០០ អឺរ៉ូ ខ្ពស់ជាងហួសមួយជាពីរ ធៀបនឹងកាលនៅ Spurs ទទួលបានត្រឹម ២៣០ ០០០ អឺរ៉ូ។ ចុងក្រោយឆ្លៀតបង្ហើយព័ត៌មានអ្នកត្រូវមកជំនួស Kane បន្តិច គឺប្រធានក្លឹបលោក Daniel Levy បាននាំចូលរួចរាល់ ជាសមាជិកវ័យក្មេងបណ្តោះអាសន្ន Alejo Veliz សញ្ជាតិអាហ្សង់ទីន ក្លឹបចាយអស់ ១៥ លានអឺរ៉ូ ថ្ពក់ចេញពី Rosario Central៕
ប្រភព៖ បរទេស