កន្លងទៅថ្មីៗនេះមានរូបភាពប៉ុន្មានសន្លឹកនៃសត្វឆ្កែពណ៌សូកូឡា អង្គុយលើកៅអីពណ៌មាសរបស់ក្លឹប Arsenal ដោយសូម្បីតែទំព័រផ្លូវការ UEFA Champions League ក៏យកទៅបង្ហោះបន្ត មានការចុចពេញចិត្ត និងបានឃើញពីសំណាក់អ្នកគាំទ្ររាប់លាននាក់ទូទាំងសកលលោក។
ជឿថា មានបងប្អូនយើងតិចណាស់ដែលបានដឹងរឿងរ៉ាវនៅពីក្រោយសត្វសុនកដ៏គួរឲ្យស្រលាញ់មួយនេះ ដ្បិតអីវារាប់ជាសមាជិកក្រុមគ្រួសារថ្មីមួយ ក្លឹប Arsenal ទើបប្រកាសនាំយកមករួមរស់កាលពីជាង ៤ ខែមុន។
ដើមចមគឺផ្តើមឡើងពីអ្នកចាត់ការលោក Mikel Arteta ត្រង់លោកបាននាំយកប្រភេទពូជឆ្កែអង់គ្លេស Labrador មួយនេះ មកកាន់ទីលានហ្វឹកហាត់ London Colney ហើយសម្រេចដាក់ឈ្មោះឲ្យវាថា “Win” ឬមានន័យថា “ឈ្នះ” រាប់ជាសមាជិកផ្លូវការរបស់ក្លឹបកាំភ្លើងធំ តាំងខែមេសា។ បើតាមសារព័ត៌មាន The Times ចុះផ្សាយ គ្រូសញ្ជាតិអេស្ប៉ាញនាំយកសុនកញីនេះមក គឺដើម្បីលើកកម្ពស់ភាពយកចិត្តទុកដាក់ចំពោះគ្នាទៅវិញទៅមក និងចំណងសីលធម៌ក្នុងរបៀបប្រាស្រ័យទាក់ទងរវាងកីឡាករ បុគ្គលិកគ្រប់ជាន់ថ្នាក់។
សុនកនេះ នឹងរស់នៅទីលានហ្វឹកហាត់របស់ក្លឹប Arsenal ហើយដើរទៅមក ទទួលបានការយកចិត្តទុកដាក់ ការស្រលាញ់មើលថែជារួមពីបណ្តាសមាជិក ដែលរបៀបនេះ Arteta ជឿថា វានឹងអាចបង្កើតភាពប្រាស្រ័យទាក់ទងល្អ ទំនាក់ទំនងស៊ីជម្រៅបន្ថែមទៀតទាំងរវាងកីឡាករនិងកីឡាករ ដូចគ្នានឹងសមាជិកគ្រួសារនៃក្លឹបទាំងមូល។
លោក Arteta សង្កត់ធ្ងន់៖ “ខ្ញុំជ្រើសរើសដោយយកចិត្តទុកដាក់នូវសុនកមួយនេះ ហើយវាជាភាពតំណាងដ៏ល្អឥតខ្ចោះអំពីយើងនៅពេលបច្ចុប្បន្ន Win នាងត្រូវការ ក្តីស្រលាញ់ពីអ្នករាល់គ្នា ហើយក្តីស្រលាញ់ចំពោះ Win គឺជាថាមពលនៃជ័យជម្នះ ភាពស្រស់ស្អាតរបស់ក្លឹប គឺពិតជាសំខាន់ខ្លាំងណាស់”។
ចាប់អារម្មណ៍នូវវីដេអូជាច្រើន ដែលបង្ហាញអំពីភាពរួសរាយរបស់ Win ទៅកាន់កីឡាករ ហើយពិសេសបំផុតជាមួយអ្នកមានបេះដូងស្រលាញ់សត្វចិញ្ចឹម ឬ សត្វឆ្កែស្រាប់ ដូចខ្សែប្រយុទ្ធចំណូលថ្មី Kai Havertz គេមានឆ្កែជាច្រើននៅឯផ្ទះ ឈ្មោះ Pooch, Summer និង Balou កន្លងមកបង្ហោះរូបឲ្យស្លៀកឈុត Arsenal យ៉ាងឡូយ ហើយអះអាងថានឹងចង់នាំយកសត្វឆ្កែទាំងអស់នោះ មកលេងជាមួយ Win នៅទីលានហ្វឹកហាត់ថ្ងៃណាមួយទៀតផង។
រំឭកដែរថា នៅក្លឹប Arsenal មិនត្រឹមតែមាន Win ប៉ុណ្ណោះទេ ទៀតសោតក៏មានសត្វឆ្មាដ៏គួរឲ្យស្រលាញ់មួយក្បាលផ្សេងទៀត ហៅថា ‘Bob’ ដែលត្រូវបានក្លឹបរើសយកមកចិញ្ចឹមច្រើនឆ្នាំហើយ ក្រោយម្ចាស់ដើមរបស់វាទទួលមរណភាព។
ដោយឡែកអត្តសញ្ញាណដ៏សំខាន់មួយផ្សេងទៀតនៅទីនោះ គឺដើមអូលីវ ដែលវាមានអាយុកាលចំណាស់ជាងមួយសតវត្ស។ Arteta និយាយ៖ “ដើមឈើរបស់ពួកយើង វាត្រូវការ ការថែទាំពីយើងរាល់គ្នា វាជាដើមអូលីវ អាយុជាង ១៥០ ឆ្នាំ ស្រដៀងនឹងអាយុកាលនៃក្លឹបយើងដែរ យើងត្រូវប្រាកដថាវាទទួលបានការមើលថែល្អ ស្ថិតក្នុងស្ថានភាពសមស្របជាងរៀងរាល់ថ្ងៃ”៕
ប្រភព៖ បរទេស