នាយកផ្នែកកីឡារបស់ក្លឹប Barcelona លោក Alemany បានបញ្ជាក់ច្បាស់ថា កិច្ចព្រមព្រៀងផ្ទេរ Ousmane Dembele ទៅកាន់ក្លឹប Paris Saint-Germain គឺគ្រប់យ៉ាងសម្រេចទៅរួចរាល់អស់ហើយ នេះរង់ចាំតែថ្ងៃប្រកាសផ្លូវការតែប៉ុណ្ណោះឯង។ យ៉ាងណាងាកទៅប្រកួតដណ្តើមពានរង្វាន់ Joan Gamper Trophy កាលពីយប់មិញ ក៏ស្រាប់តែអ្នកគាំទ្របានទទួលស្គាល់គ្រប់ៗគ្នា និងហ៊ានអះអាងថា អ្នកមានបុណ្យមិនបាច់ទៅក្រវែលអ្នកថ្មីឯណាឆ្ងាយ នេះក្លឹបអាចរកឃើញហើយ អ្នកត្រូវមកស្នងតំណែងខ្សែប្រយុទ្ធបារាំងខាងលើ។
នោះគឺយុវជនវ័យ ១៦ ឆ្នាំ សញ្ជាតិអេស្ប៉ាញ លេងតំណែងប្រយុទ្ធស្លាបស្តាំ Lamine Yamal ដែលនៅនាទី ៨០ គេត្រូវបានអ្នកចាត់ការលោក Xavi Hernandez ប្តូរចូលជំនួស Eric Garcia ពោលមកបន្ថែមកម្លាំងប្រយុទ្ធ ក្រោយពេលដែលក្លឹប Spurs បើកការនាំមុខ ២-១។ ត្រឹមចន្លោះពេលជាង ១០ នាទីមុនចប់ការប្រកួត រឿងភ្ញាក់ផ្អើលបានកើតឡើង ហើយវាបាននាំជ័យជម្នះត្រលប់មកវិញដល់ក្លឹបម្ចាស់ផ្ទះ តែគួរអរគុណជាពិសេសដល់ឥទ្ធិពលតារាឆ្នើមវ័យក្មេងកូនកាត់សញ្ជាតិអេក្វាទ័រហ្គីណេ។
នេះគ្រាប់ពេជ្រគាស់ចេញពីថ្នាល La Masia គ្រាន់តែប្តូរចូលភ្លាម រំលងតែជាងមួយនាទី គេក៏បានអូសបាល់ឆ្លងចូលប្រអប់ផ្នែកខាងស្តាំ បញ្ជូនកើតជាការ Assist ដ៏ល្អ ទៅកាន់មិត្តរួមក្រុម Ferran Torres បញ្ចប់ទីបានសម្រេច នាំឲ្យលទ្ធផលស្មើ ២-២។
អត់ទាន់ចប់ត្រឹមប៉ុណ្ណឹងទេ កីឡាករជំនាញជើងឆ្វេងល្អមួយចប់ ទាំងបច្ចេកទេសបណ្តើរបាល់ ញាក់បាល់ឆ្វេងស្តាំ ដូចគ្នានឹងចង្កេះបង្វិលបាន ៣៦០ ដឺក្រេ ជាក់ស្តែងត្រង់កន្លែងនេះ កីឡាករបានប្រើក្បាច់បញ្ឆោតដាច់ចង្កេះ Sergio Reguilon បញ្ជូនកូនមាន់ត្រលប់ទៅអង់គ្លេស មុនស្កាត់មួយជើងមកឲ្យ Torres រួចបន្តឲ្យ Ansu Fati អូសយកមកស៊ុតបើកការនាំមុខវិញទៅលើ Spurs។
ថាប៉ុណ្ណឹងវាអស្ចារ្យណាស់ទៅហើយ ដល់តែនាទី ៩៤ មានចំណែក Yamal មកជាថ្មីម្តងទៀត សារនេះគេអូសបាល់ញាក់ផុតកូនមាន់ខ្នាយមាសមួយរូបទៀតនៅផ្នែកខាងស្តាំ ហើយឆ្លងមកលើ ដល់កើតគ្រាប់បាល់ទីបួន សម្រេចបានដោយយុវជន Abede Ezzalzouli មុនអាជ្ញាកណ្តាលផ្លុំកញ្ចែបញ្ចប់ការប្រកួត។ សរុបមកមានន័យថា ទាំងគ្រាប់បាល់ទី ២ ទី ៣ និងទី ៤ របស់អ្នកមានបុណ្យ សុទ្ធជាចំណែករបស់យុវជនខាងលើតែទាំងអស់ហ្នឹង។
នេះពេលវេលាត្រឹមជាង ១០ នាទី បានធ្វើឲ្យពិភពលោកស្គាល់ Lamine Yamal កាន់តែច្បាស់ ដឹងកាន់តែមុតអំពីទេពកោសល្យកីឡាករកម្ពស់ ១,៨០ ម៉ែត្រ ហើយមតិរបស់អ្នកគាំទ្រលើបណ្តាញសង្គមជាច្រើន ហៅគេថាជា “គ្រាប់ពេជ្រ La Masia” ដែល Barcelona មិនចាំបាច់ចាយលុយធំ យកមកបំពេញកន្លែង Dembele នោះឯង។
សព្វថ្ងៃគេមានឈ្មោះនៅឈុត Barca U19 មិនទាន់ទទួលបានកុងត្រានៅឈុតធំនៅឡើយ តែតាមភាពល្បីល្បាញប៉ុណ្ណេះហើយ ជឿថា អត់យូរទៀតទេ គេនឹងទទួលបានកាដូប៉ះប៉ូវដូចជំនាន់ Ansu Fati, Pedri និង Gavi ងើបមកឈុតធំយ៉ាងដូច្នោះដែរ។
បន្ទាប់ការលើកពានមុនបើករដូវកាល បន្តទៅជំនួបបន្ទាប់ ក្លឹបម្ចាស់ដី Camp Nou ត្រូវវិលចូលរដូវកាលនៃក្របខ័ណ្ឌ La Liga ខណៈជុំទី ១ ត្រូវជួប Getafe នាវេលាម៉ោង ០២:៣០ នាទីទៀបភ្លឺ ឈានចូលថ្ងៃចន្ទ ទី ១៤ សីហា ក៏នឹងមានផ្សាយបន្តផ្ទាល់លើទំព័រ CTS SPORTS៕
ប្រភព៖ បរទេស