ប៉ុន្មានសប្ដាហ៍ចុងក្រោយនេះយើងច្រើនជួបគ្នាតែគូមិត្តភាព ហើយឆ្លៀតមួយៗនៅបាល់ទាត់នារីក្នុងព្រឹត្តិការណ៍ FIFA Women’s World Cup តែចាប់ពីយប់ស្អែកនេះទៅ គូពិសេស ការប្រកួតផ្លូវការពានធំៗ គឺវិលជុំមកដល់វិញហើយ ដូច្នេះក៏កុំភ្លេចចុច Follow ទំព័រ CTS SPORTS មួយនេះ ដើម្បីត្រៀមទទួលយកលីងទស្សនាដ៏ឆាប់រហ័សបំផុត។
៤) ដណ្តើមពាន FA Community Shield
រៀងរាល់កៀកបើករដូវកាលថ្មី ក្នុងទឹកដីអង់គ្លេសតែងមានការជួបគ្នារវាងក្លឹបឈ្នះជើងឯកលីគកំពូល និងជើងឯក FA Cup រដូវកាលចាស់។ សារនេះកំណត់ឲ្យ Manchester City ត្រូវប៉ះ Arsenal នាវេលាម៉ោង ១០:០០ នាទីយប់ ថ្ងៃសៅរ៍ ទី ០៦ សីហាស្អែកនេះ នៅដីកណ្តាលនៃកីឡដ្ឋាន Wembley Stadium។
បន្តពីយប់ស្អែកទៅ រំលងមួយសប្តាហ៍បន្ទាប់ទៀត គ្រប់លីគកំពូលធំៗតំបន់អឺរ៉ុបដូច Premier League, LaLiga, Ligue 1 និង Eredivisie ក៏សម្រេចចាប់ផ្តើមប្រកួតជុំទី ១ រដូវកាល ២០២៣/២៤។ ជាការពិតចាប់អារម្មណ៍ខ្លាំងបំផុតគឺលីគកំពូលអង់គ្លេសផ្ទាល់តែម្តង ព្រោះទាំងគីឡូក្លឹបតូចក្លឹបធំ ល្អមើលជក់ចិត្តដិតអារម្មណ៍សឹងគ្រប់ការផ្សាយផ្ទាល់។
៣) ដណ្តើមពាន DFL-Supercup
បែរទៅប្រទេសអាល្លឺម៉ង់ ក៏ស្រដៀងនឹងក្របខ័ណ្ឌកំពូលអង់គ្លេសដែរ ត្រង់មុនបើករដូវកាលថ្មី ពួកគេក៏ត្រូវសម្ភោធម្ចាស់ពាន DFL-Supercup សារនេះជាការជួបរវាងជើងឯក Bundesliga រដូវកាលចាស់ Bayern Munich ប៉ះជើងឯក DFB-Pokal រដូវកាលចាស់គឺ RB Leipzig។ ការប្រកួតធ្វើឡើងនាវេលាម៉ោង ០១:៤៥ នាទីទាបភ្លឺ ឈានចូលថ្ងៃអាទិត្យ ទី ១៣ សីហា។
នៅពានរង្វាន់នេះ Bayern ឆ្លងបទពិសោធន៍ក្រាស់ក្រែល ឈ្នះជើងឯកដល់ទៅ ១០ លើក ខណៈ Leipzig ឡើងមកជាលើកទី ២ ដ្បិតលើកទីមួយឆ្នាំទៅ ចាញ់ Bayern ៥-៣ ម្តងរួចមកហើយ។
២) ដណ្តើមពាន UEFA Supercup
ពានលំដាប់ទ្វីប សម្រាប់ក្លឹបដែលតែងតែសម្ភោធរកម្ចាស់ជើងឯកមុនបើករដូវកាល គឺហៅថា Supercup របស់សមាគមបាល់ទាត់អឺរ៉ុប UEFA។ សារនេះជើងឯក Champions League រដូវកាលចាស់ Man City ត្រូវមកប៉ះជើងឯកដាំខ្ទឹម Europa League គឺ Sevilla នៅវេលាម៉ោង ០២:០០ នាទីទៀបភ្លឺ ឈានចូលថ្ងៃព្រហស្បតិ៍ ទី ១៨ សីហា ក៏នឹងមានផ្សាយបន្តផ្ទាល់លើទំព័រ CTS SPORT ផងដែរ។
ពាន UEFA Super Cup សម្រាប់ក្លឹបនៅអេស្ប៉ាញស្គាល់ជាតិឈ្នះជើងឯកម្តងហើយកាលឆ្នាំ ២០០៧ តែ City អត់ធ្លាប់ទាល់តែសោះឡើយ។
១) ពាន FIFA Women’s World Cup
ចន្លោះថ្ងៃ ១៩/២០ គឺជាពេលវេលាបើករដូវកាលថ្មីនៃក្របខ័ណ្ឌ Bundesliga និង Serie A ដល់រំលងនោះតែប៉ុន្មានម៉ោង នៅរសៀលម៉ោង ០៥:០០ នាទីល្ងាច ថ្ងៃទី ២០ សីហា ក៏នឹងមានការប្រកួតសំខាន់បំផុតក្នុងពិភពបាល់ទាត់នារី ជាវគ្គផ្តាច់ព្រ័ត្រពានលំដាប់ពិភពលោក World Cup។
មកទល់រសៀលថ្ងៃសៅរ៍នេះ យើងទើបតែរកឃើញអេស្ប៉ាញ ជាជម្រើសជាតិឡើងមកវគ្គ ៨ ក្រុម ដោយឡែកនៅរង់ចាំគីឡូធ្ងន់ផ្សេងទៀត ដ្បិតអីខាងប៉ែកអាស៊ីយើង សេសសល់ជប៉ុនមួយគត់ ដែលអាចចាំអ៊ុតមើល។ រំឭកថា បេក្ខភាពសង្ឃឹមខ្ពស់ក្នុងការឈ្នះពានរង្វាន់ តួយ៉ាងដូច អង់គ្លេស បារាំង និងសហរដ្ឋអាមេរិកជាដើម។
អត់ទាន់ចប់ទេបងប្អូន ទស្សនីយភាពប្លែកភ្នែកថ្មីរដូវកាលនេះ CTS SPORTS ក៏នឹងមានផ្សាយផ្ទាល់គូពិសេសៗនៅ MLS ផងដែរ ជាពិសេសគឺប្រកួតនៃក្លឹប Inter Miami មានវត្តមាន Lionel Messi។ វាពិសេសត្រង់ថា សឹងតែទាំងអស់នៃគូនៅលីគអាមេរិក ម៉ោងផ្សាយផ្ទាល់នៅកម្ពុជាគឺចូលវេលាពេលព្រឹកល្បាក់ម៉ោង ០៧ ទៅ ០៩ ព្រឹក អ៊ីចឹងមានន័យថា ព្រឹកពេញភ្នែកនឹងបាល់អាមេរិក រសៀលឆ្លៀតមើលបាល់នារីគូសំខាន់ ដល់តែយប់កាលណា យើងជុំគ្នាមើលបាល់អឺរ៉ុបវិញម្តង៕
