ក្រៅតែពីគុណភាព ទេពកោសល្យ បាល់ទាត់ជួនខ្លះក៏ទាមទារសំណាងមួយផ្នែកដែរ តែងាកមក Michael Ballack (ម៉ាយឃឺល បាឡាក់) ទេវតាហាក់មិនប្រទានរឿងល្អសម្រាប់គេទាល់តែសោះ។ នេះអតីតជើងចាស់សញ្ជាតិអាល្លឺម៉ង់ បានត្រឹមដើរជាន់ដានចាស់ ប៉ះរឿងស៊យម្តងហើយម្តងទៀត សមល្មមនឹងអ្នកគាំទ្រអាចដាក់រហស្សនាមឲ្យលោកជា “ស្តេចស៊យក្នុងពិភពបាល់ទាត់ប្រចាំសតវត្សទី ២១”។
ងាកថយក្រោយទៅក្នុងអាជីពរបស់អតីតខ្សែបម្រើខាងលើបន្តិច សព្វថ្ងៃស្ថិតនៅអាយុ ៤៦ ឆ្នាំ តែលោកបានប្រកាសចូលនិវត្តនៅឆ្នាំ ២០១២ ជាមួយក្លឹបចុងក្រោយគឺ Bayer Leverkusen។ នេះបន្ទាប់តែធ្លាប់ហែលកាត់ការលេងឲ្យក្លឹបធំៗឯទៀត ដូច Bayern Munich និង Chelsea។ សរុបការបង្ហាញខ្លួនក្លឹបបូកជម្រើសជាតិជាង ៧០០ ប្រកួត រកបានគ្រាប់បាល់និង Assist ជិត ៣០០ គ្រាប់។ CTS Sports បង្ហាញរឿងធ្លាប់កើតឡើងដ៏អាក្រក់ផុតលេខមកលើ Ballack នៅឆ្នាំ ២០០២ និង ២០០៨:
ត្រលប់ទៅ ២១ ឆ្នាំមុន គ្រាឈរជើងឲ្យ Leverkusen លោកបានរបូតពាន ៤ ក្នុងឆ្នាំតែមួយ នេះបើថាធ្លាក់តាំងពីវគ្គដំបូង មិនឈឺទេ តែវាធ្ងន់ត្រង់ចាញ់ផ្ទួនគ្នាក្នុងជុំចុងក្រោយ ឬវគ្គផ្តាច់ព្រ័ត្រ។ យើងទៅមើលការប្រកួតប្រជែងក្នុងក្របខ័ណ្ឌ Bundesliga ក្លឹបរបស់លោកបានចាញ់ Borussia Dortmund ត្រឹម ១ ពិន្ទុគត់ ពោលគឺកាត់សេចក្តីក្លឹបឈ្នះពាននៅជុំទី ៣៤ នោះឯង។
ក្នុងឆ្នាំដដែល នាថ្ងៃទី ១១ ឧសភា ក្លឹប Leverkusen ដែលមានវត្តមាន Ballack ឈរជើងក៏បានចាញ់នៅវគ្គផ្តាច់ព្រ័ត្រ ទល់ Schalke 04 (ហ្សាល់កេ ០៤) ក្រោមលទ្ធផល ៤-២ នាំឲ្យរបូតពាន DFB Pokal (ឌីអេហ្វប៊ី ប៉ូកាល់) មួយគ្រឿងផ្សេងទៀត។ នាឆ្នាំនោះ វាក៏ជាលើកដំបូងដែល Leverkusen ឡើងទៅកាន់វគ្គផ្តាច់ព្រ័ត្រ Champions League ក្នុងប្រវត្តិសាស្រ្ត ដល់ហើយបែរចាញ់ ១-២ បន្តរបូតពានអឺរ៉ុប ជាពានសំខាន់ប្រចាំរដូវកាល។
អត់ទាន់ចប់ទេ រឿងអាក្រក់នៅឆ្នាំ ២០០២ ដ៏សែនឈឺចាប់ គឺមកតាមលោង Ballack ជាថ្មី ពេលលេងឲ្យជម្រើសជាតិនៅរំលងជាងមួយខែបន្ទាប់។ តើអ្នកចាំទេ គ្រាកូរ៉េខាងត្បូងនិងជប៉ុនចាប់ដៃគ្នាធ្វើម្ចាស់ផ្ទះ World Cup វគ្គផ្តាច់ព្រ័ត្រសារនោះ គឺប្រេស៊ីលបានយកឈ្នះ ២-០ ទៅលើឥន្រ្ទីយ៍ដែកអាល្លឺម៉ង់ សម្រេចឲ្យ Ballack បានត្រឹមជើងឯករង។
បើកើតតែមួយលើក យើងក៏មិនយកមកនិយាយដែរ តែនេះសារទៅ ៦ ឆ្នាំក្រោយ ចំឆ្នាំ ២០០៨ គឺជាឆ្នាំស៊យម្តងទៀតហើយ។ វាជាពេលដែលគេឈរជើងឲ្យ Chelsea ចាំថាពេលនោះ Arsenal បានផ្តាច់ចង្វាក់លើកពាន FA Cup របស់ក្លឹបដែល Ballack ឈរជើង ហើយបន្តទៅប៉ុន្មានថ្ងៃក្រោយនៅជុំទី ៣៨ កាត់សេចក្តីយកក្លឹបឈ្នះពាន Premier League ក៏ Chelsea ត្រឹមឈរលេខ ២ មាន ៨៥ ពិន្ទុ ចាញ់ជើងឯក Man United មាន ៨៧ ពិន្ទុ។
ភាពតានតឹងបន្តកើតមាននៅក្រោយនោះប៉ុន្មានថ្ងៃក្នុងពានរង្វាន់ Champions League ដែលស្មើលទ្ធផលវគ្គផ្តាច់ព្រ័ត្រ ១-១ រវាងបិសាចក្រហម ទល់តោខៀវ តែក្រោយថែមម៉ោងស៊ុតប៉េណាល់ទី គឺ ក្រុមរបស់ Ballack ជាអ្នកចាញ់។
ក្រឡាអត់ពានធំលើកបន្តឥតល្ហែ ធ្វើទុក្ខបុកម្នេញដល់ Ballack ចូលនិវត្តក៏គ្មានសល់កេរ្តិ៍ឈ្មោះអ្វីទាំងអស់។ នេះប៊ិះតែត្រូវបានលើកពាន Euro លំដាប់ទ្វីបអឺរ៉ុបជាមួយអាល្លឺម៉ង់នៅឆ្នាំ ២០០៨ នោះហើយ ក៏បែរជាទៅចាញ់អេស្ប៉ាញ ១-០ នៅវគ្គផ្តាច់ព្រ័ត្រថែមទៀត អ៊ីចឹងសង្ខេបមកពានធំ UCL ក៏អត់ World Cup ក៏អត់ រួចចុងក្រោយ Euro នេះក៏អត់ដែរ៕
ប្រភព៖ បរទេស