សព្វថ្ងៃបើនិយាយអំពីបាល់ទាត់ប្រចាំទ្វីបអាស៊ី នៅ FIFA Ranking ជម្រើសជាតិជប៉ុនឈរលេខរៀងទី ១ សម្រាប់ឈុតបុរស ហើយលេខ ២ សម្រាប់ឈុតនារី មានន័យថាការប្រកួតក្នុងតំបន់គឺពួកគេមានប្រៀបជាងបណ្តាប្រទេសនៅអាស៊ីដទៃ តែបើលើឆាកលំដាប់ពិភពលោក មើលមិនឃើញថាមិនត្រូវ ជាពិសេសពេលប៉ះគីឡូធ្ងន់មកពីតំបន់អឺរ៉ុប។
ក៏ប៉ុន្តែសារថយក្រោយចាប់តាំងព្រឹត្តិការណ៍ FIFA World Cup បុរសនៅចុងឆ្នាំទៅ ហៀរចូលមកដល់ផ្នែកនារី ដែលកំពុងតែដំណើរការដល់វគ្គ ១៦ ក្រុម ឃើញថាក្រុមសាំម៉ូរ៉ៃខៀវពិតជាបានបង្កើតភាពភាពភ្ញាក់ផ្អើល ធំបំផុតនោះ គឺទល់ជម្រើសជាតិគោជល់អេស្ប៉ាញ។
និយាយអំពីចំណាត់ថ្នាក់ជារួម ជម្រើសជាតិមកពីអឺរ៉ុបខាងលើ មាន Ranking ល្អជាងជប៉ុនដល់ទៅ ១០ លេខលើផ្នែកបុរស ហើយ ៥ លេខលើផ្នែកនារី។ ក្រៅតែពីចំណាត់ថ្នាក់ បើយើងមើលធនធានគុណភាពកីឡាករក៏ខុសគ្នាច្រើនដែរ តែដល់លទ្ធផលចេញមក បែរខុសពីការរំពឹងទុកយ៉ាងផ្ទុយស្រឡះ។
មិនដឹងថាឡាក់ឆុង ឬកុងគ្នាបែបណា ឲ្យតែថាអេស្ប៉ាញប៉ះជប៉ុន គឺដឹងតែត្រូវព្រនុងបរាជ័យជាបន្តបន្ទាប់ រួចបើទៅមើលស្ថិតិ ក៏នឹងកាន់តែធ្វើឲ្យអ្នកគាំទ្រគោក្រហមមកពីអឺរ៉ុបឆ្អែតចិត្តមិនស្ទើរឡើយ។
ដូចកាលនៅវគ្គចែកពូល World Cup បុរសចុងឆ្នាំ ២០២២ ក្នុងពូល E ដែលជប៉ុន បានយកឈ្នះ ២-១ ទៅលើអេស្ប៉ាញ ត្រង់សាច់បាល់ប៉ះទៅមកខាងក្រុមដឹកនាំដោយលោក Luis Enrique ពេលនោះដូចបត់តារាងលេង គ្រប់គ្រង ៨៣ ភាគរយ បញ្ជូន ១ ០៥៨ លើក អត្រាបញ្ជូនជោគជ័យមានដល់ ៩១ ភាគរយ ស៊ុត ១២ លើកចំគោលដៅ ៥ លើក តែរកបានមួយគ្រាប់គត់ចេញពី Alvaro Morata។
ដល់តែខាងក្រុមអាស៊ីយើងឯណេះ មានបាល់លេងស្តួចស្តើង ប៉ះបានតែ ២២៨ លើក ក្នុងចំណែកគ្រប់គ្រង ១៧ ភាគរយ ហើយអត្រាបញ្ជូនបាល់ជោគជ័យក៏មានទាបត្រឹម ៦៧ ភាគរយ ជាមួយការស៊ុត ៦ លើក ចំគោលដៅ ៣ លើក តែបែរអាចយក ៣ ពិន្ទុពីអេស្ប៉ាញតាមរយៈគ្រាប់បាល់របស់កីឡាករ Ritsu Doan និង Ao Tanaka នៅចន្លោះពេល ៣ នាទីជាប់។ បញ្ចប់ការប្រកួតជប៉ុនឡើងឈរលេខ ១ ក្នុងពូល ខណៈអេស្ប៉ាញបានកៅអីឡើងទៅវគ្គបន្ទាប់ទាំងប្រផុតប្រផើយដ្បិតស្មើពិន្ទុទល់អាល្លឺម៉ង់។
ឥឡូវយើងបន្តមកមើលឈុតនារីប៉ះនារី ដែលទើបតែបិទពូល C ថ្ងៃម្សិលមិញ ក៏ជប៉ុនដឹកដៃអេស្ប៉ាញឡើងទៅកាន់វគ្គបន្តដូចគ្នា គ្រាន់ថាលទ្ធផលទទួលបាន គឺផ្ទុយស្រឡះទៀតហើយ។ នេះជប៉ុនលេងលុតអេស្ប៉ាញដល់ទៅ ៤-០ ជាមួយស្ថិតិគ្រប់គ្រងបាល់ត្រឹម ២២ ភាគរយ ប៉ះបាន ២៦៥ លើក ជោគជ័យការបញ្ជូនតែ ៥៩ ភាគរយ ស៊ុត ៧ លើក ចំគោលដៅ ៥។
ដល់តែខាងអេស្ប៉ាញគ្រប់គ្រងបាល់ប៉ះទៅមកដល់ ៨៩៤ លើកល្អនោះល្អ ស្មើនឹង ៧៨ ភាគរយជារួម ហើយមានឱកាសស៊ុត ១០ លើក ក៏ប៉ុន្តែអត់អាចរកបានគ្រាប់បាល់សូម្បីមួយ។ សរុបមកវិញ នៅ ៣ ប្រកួតក្នុងពូល ខាងឈុតនារីជប៉ុន ឈ្នះទាំង ៣ ឥតស្គាល់ចាញ់ ហើយរកបាន ១១ គ្រាប់ របូត ០ គ្រាប់។ បន្តទៅប្រកួតវគ្គបន្ទាប់ ពួកគេត្រូវប៉ះន័រវេស ក៏ជាក្រុមខ្លាំងមួយដែរ តែប្រវត្តិជួបគ្នាខាងអាស៊ីយើងហាក់មានប្រៀបជាង។
គួររំឭកដែរថា ជម្រើសជាតិនារីជប៉ុន ប្រវត្តិនៅ World Cup ក៏ធ្លាប់បានឈ្នះជើងឯកម្តងដែរ កាលឆ្នាំ ២០១១ ហើយជើងឯករងនៅរំលងសម័យកាលបន្ទាប់។ ខណៈកាល ២០១៩ ពួកគេឡើងបានត្រឹមវគ្គ ១៦ ក្រុម បន្ទាប់ចាញ់ហូឡង់ ២-១៕
ប្រភព៖ បរទេស