កំឡុងទីផ្សារដោះដូររដូវក្តៅកំពុងបើកទ្វារឆ្នាំ ២០២៣ នេះ មើលទៅទំនងត្រូវប៉ាន់មកលើកីឡាករអាស៊ីច្រើន ជាពិសេសគឺសមាជិកក្រុមសាំម៉ូរ៉ៃខៀវជប៉ុន ដែលពេលចុងក្រោយ មាន ២ រូប ស្ថិតក្រោមរ៉ាដាចង់បានពីសំណាក់ក្លឹបហង្សក្រហម Liverpool និងបិសាចក្រហម Manchester United៖
២) ខ្សែប្រយុទ្ធ Keito Nakamura
ក្រោមការដឹកនាំរបស់អ្នកចាត់ការ Jurgen Klopp ហង្សបានដាក់គោលដៅមកលើកីឡាករវ័យ ២២ ឆ្នាំរបស់ក្លឹបអូទ្រីស LASK។ នោះគឺខ្សែប្រយុទ្ធសញ្ជាតិជប៉ុន Nakamura អាចលេងបានទាំងស្លាប ឆាបចូលក្នុងប្រអប់ក៏ទៅរួច ហើយសេសសល់កុងត្រាដល់ចុងខែមិថុនា ឆ្នាំ ២០២៥ ជាមួយក្លឹបអាណាព្យាបាល។
យ៉ាងណាក្លឹបម្ចាស់ដី Anfield បានដាក់សំណើទៅរួចរាល់ ជាមួយតម្លៃផ្ទេរ ៧ លានអឺរ៉ូ ដល់ហើយចម្លើយក៏មកថ្មីៗនេះដែរ ត្រង់ក្លឹប LASK បានច្រានចោល មិនទទួលយក។ នេះបើតាមសារព័ត៌មាន Foot Mercato បានចុះផ្សាយ។
ក្លឹបហាក់ចង់រំអុកតម្លៃ Nakamura យកខ្ពស់ជាងនេះ ដ្បិតអីក៏មានក្លឹបដទៃចង់បានគេដែរ តួយ៉ាង Frankfurt ហ៊ានឲ្យដល់ ១១ លានអឺរ៉ូ រួមទាំង Burnley និង Aston Villa ក៏ជាភាគីចង់ចូលចែចូវផ្សេងទៀតដែរ។
រំឭកស្ថិតិនៅរដូវកាលមុន កីឡាករជំនាញជើងស្តាំទទួលបានឱកាសជាប់លាប់ ត្រង់បង្ហាញខ្លួន ៣៦ ប្រកួត រកបាន ១៧ គ្រាប់និង Assits ៨ លើក ឈរជើងគិតជានាទីសរុប ២ ៩១០ នាទី។ ផ្សារភ្ជាប់ទៅកាន់ហង្សបន្តិច លើកចុងក្រោយពួកគេយកបានកីឡាករអាស៊ីគឺជាមួយ Takumi Minamino យកមក ៨ លានកន្លះ លក់ទៅវិញបាន ១៥ លានអឺរ៉ូ។
១) អ្នកចាំទី Zion Suzuki
ជាមួយកីឡាករកូនកាត់អាមេរិក-ជប៉ុនរូបនេះវិញ តាំងពីបើកក្បាលអាជីពមកទល់សព្វថ្ងៃឈរជើងឲ្យក្លឹបកំណើតមួយគត់គឺ Urawa Reds។ យ៉ាងណាលេចលឺថាបិសាចក្រហមក៏មិនមែនទើបតែចាប់អារម្មណ៍ដែរ ពោលសម្លឹងឃើញទេពកោសល្យកីឡាករខាងលើ តាំងគេស្ថិតនៅអាយុ ១៤ ឆ្នាំ កាលនៅឈុតថ្នាល។
មកទល់ដើមខែកក្កដា ក្លឹបម្ចាស់ដី Old Trafford ក៏បានដាក់សំណើជាថ្មី នៅតម្លៃ ៥ លានផោន សមល្មមនឹងឲ្យគេក្លាយជាកីឡាករផ្ទេរចេញពី J-League ថ្លៃបំផុត នេះចម្លើយពីក្លឹបមេ យល់ព្រមហើយ ដល់តែចម្លើយចេញពីសាមីខ្លួន បែរបដិសេធមិនទៅចូលរួម។
ត្រង់ហេតុផលអ្នកចាំទីវ័យ ២០ ឆ្នាំ ចង់ទទួលបានឱកាសបង្ហាញខ្លួនជាប់លាប់បន្តទៀត ដើម្បីស្រមៃឈោងយកឱកាសនៅព្រឹត្តិការណ៍កីឡាអូឡាំពិកជាមួយប្រទេសជប៉ុន ក្នុងឆ្នាំ ២០២៤ ខាងមុខ។ ជាការពិតគេជឿថា បើផ្ទេរទៅ United នោះពេលវេលាឈរជើងនឹងធ្លាក់ចុះ អ៊ីចឹងការរំពឹងជាប់ឈ្មោះនៅជម្រើសជាតិក៏មានភាគរយទាបយ៉ាងដូច្នោះ។ ការលេងរបស់ Suzuki នៅ ២៩ ប្រកួត របូតតែ ២៥ គ្រាប់ និង Cleansheet ដល់ ១២ ប្រកួត។
រំឭកទៅស្ថានភាពតំណែងចាំទីនៅបិសាចបន្តិច ពួកគេទើបតែយកបាន Andre Onana ដែលជាដៃទីមួយបន្តពី David de Gea ខណៈ Dean Henderson ដៃទីពីរមិនទាន់ប្រាកដអំពីអនាគត ថាត្រូវចាកចេញឬបន្តនៅ៕
ប្រភព៖ បរទេស
