រឿងរ៉ាវការផ្ទេរចេញ Kylian Mbappe ពីក្លឹបបារាំង Paris Saint-Germain នៅពេលចុងក្រោយកាន់តែក្តៅគគុកខ្លាំងឡើង តែវាមិនមែនជាដំណឹងល្អទៅវិញ សម្រាប់អ្នកគាំទ្រក្លឹបអធិរាជស Real Madrid។ យើងសង្ខេបដើមទងពីដំបូងបន្តិច ត្រង់ក្លឹបយក្សអេស្ប៉ាញចង់បាន Mbappe ហើយ Mbappe ក៏ដាក់ចិត្តចង់ទៅចូលរួមនៅទីនោះ ខណៈ PSG ក៏យល់ព្រមដែរ តែត្រូវទិញក្នុងលក្ខខណ្ឌមានតម្លៃខ្លួនល្បាក់ ១៥០ ទៅ ១៨០ លានអឺរ៉ូ ស្របពេលក្លឹបចង់បាន ព្យាយាមចង់អូសបន្លាយដល់កីឡាករអស់តម្លៃនៅឆ្នាំបន្ទាប់ ២០២៤។
លុះតែបន្តមកដល់ស្ថានភាពថ្មីថ្មោងនេះ គឺមានអ្នកទី ៣ ទី ៤ ទី ៥ ពោលក្លឹបធំតូចហូរហែ បានលូកដៃចូលចរចាកាត់មុខក្លឹបដឹកនាំដោយប្រធានលោក Florentino Perez នេះមានតាំងពី Barcelona, Chelsea, Arsenal, Man United, Inter Milan និង Tottenham Hotspur តែញាក់សាច់បំផុតនោះ គឺក្លឹបនៅអារ៉ាប៊ីសាអូឌីត Al-Hilal។
ដូចបងប្អូនដឹងស្រាប់ហើយ បើកាលណាក្លឹបនៅមជ្ឈិមបូព៌ា ដាក់ចិត្តសម្លឹងយក គឺពួកគេនឹងមិនចេះចាយលុយតូចដូចក្លឹបដទៃឡើយ ឲ្យតែហាមាត់ចង់បាន ក៏ដឹងតែជាសំណើធំមហាសាល។ សារនេះ Al-Hilal ចង់បាន Mbappe ទាំងលើតម្លៃផ្ទេរបំបែកកំណត់ត្រា ដូចគ្នាទាំងប្រាក់ឈ្នួលក៏ផ្តល់ជូនគុណជា ២ ជា ៣ ធៀបនឹងអ្វីដែល Karim Benzema ឬ Cristiano Ronaldo ទទួលបាន។
យើងទៅនិយាយអំពីតម្លៃផ្ទេរចេញបន្តិច បើទោះបីសេសសល់កុងត្រាត្រឹមចុងខែមិថុនា ឆ្នាំ ២០២៤ ក៏ប៉ុន្តែខ្សែប្រយុទ្ធឆ្នើមរបស់ជម្រើសជាតិមាន់គក ទទួលបានការផ្តល់ឲ្យពីភាគីក្លឹបនៅ Saudi Pro League ដល់ទៅ ៣០០ លានអឺរ៉ូ។ នេះវាលើសតែពីតួលេខ PSG ចង់បានពី Real Madrid ទៅទៀត ហើយក៏សមល្មមនឹងអាចបំបែកកំណត់ត្រាការផ្ទេរថ្លៃបំផុតក្នុងប្រវត្តិសាស្រ្តបាល់ទាត់ ធ្លាប់កើតមានកាលឆ្នាំ ២០១៧ ដំណើរ Neymar Jr ផ្ទេរចេញពី Barcelona ក្នុងតម្លៃ ២២២ លាន។
បើតាមកាសែត Sky Sports ចុះផ្សាយ ខាងក្លឹបមានម្ចាស់ជាជនជាតិកាតា បានយល់ព្រមសំណើខាងក្លឹបរួមឧបទ្វីបអារ៉ាប់បាត់ទៅហើយ នេះរង់ចាំតែការសម្រេចចិត្តរបស់កីឡាករតែប៉ុណ្ណោះឯង។
ឥឡូវយើងបន្តទៅមើលសំណើផ្តល់ជូនពី Al-Hilal នៅលក្ខខណ្ឌផ្ទាល់ខ្លួនរវាង Mbappe គឺកំណត់ត្រាប្រាក់ឈ្នួលថ្លៃបំផុតមិនធ្លាប់មានក្នុងលោក នេះមិនមែនតែច្រើនជាងកីឡាករបាល់ទាត់ទាំងអស់នោះទេ បើធៀបនឹងអត្តពលិកទូទាំងសកលលោក ក៏យុវជនវ័យ ២៤ ឆ្នាំ អាចវ៉ាដាច់គេផងដែរ។ ត្រង់មួយឆ្នាំ ខាងក្លឹបចង់បាន ហ៊ានឲ្យកីឡាករខាងលើ ដល់ ៧០០ លានអឺរ៉ូឯណោះ ឥឡូវយើងធ្វើការគុណចែកគឺស្មើនឹង៖
ជាង ៥៨ លានអឺរ៉ូ/ខែ
ជាង ១,៩ លានអឺរ៉ូ/ថ្ងៃ
ជិត ៨០ ០០០ អឺរ៉ូ/ម៉ោង
១ ៣៣១ អឺរ៉ូ/នាទី
២២ អឺរ៉ូ/វិនាទី
មានន័យថា បើយើងគិតជាលុយខ្មែរ ១ វិនាទីនៅ Al-Hilal អតីតសមាជិកក្លឹប AS Monaco អាចរកបានដល់ ១០០ ០០០ រៀល ហើយបើចំណូលក្នុង ១ នាទីរបស់គេវិញ ល្មមគ្រប់នឹងទិញបានឈុត iPhone 14 Pro Max បូកកាស AirPods សេរ៊ីចុងក្រោយមួយកញ្ចប់ថែមទៀតផង។
យើងនឹងរង់ចាំមើលទាំងអស់គ្នា តើ Mbappe ជ្រើសយកផ្លូវមួយណា ត្រង់ស្ថានភាពពេលនេះ មាន ៣ ទី ១) ចុះហត្ថលេខាបន្តកុងត្រាថ្មីនៅ PSG ទី ២) រង់ចាំដល់អស់កុងត្រាជាមួយក្លឹប ហើយស៊ូអង្គុយបម្រុងពេញមួយរដូវកាល ទី ៣) ជ្រើសយកសំណើទៅចូលរួមនៅក្លឹបថ្មី អាចជា Al-Hilal៕
ប្រភព៖ បរទេស
