Barcelona អាចនឹងត្រូវលក់ខ្សែប្រយុទ្ធ Ansu Fati នៅរដូវក្ដៅនេះ ប្រសិនបើពួកគេត្រូវការសាច់ប្រាក់ដើម្បីចុះបញ្ជីកីឡាករថ្មីរបស់ពួកគេ។
មកទល់ពេលនេះ Barca មានភាពឆ្លាតវៃជាមួយនឹងការចំណាយរបស់ពួកគេនៅរដូវក្តៅនេះ។ ពួកគេបានចុះហត្ថលេខាលើ Ilkay Gundogan ពី Manchester City និង Inigo Martinez ពី Athletic Bilbao លើការផ្ទេរដោយគ្មានតម្លៃខ្លួន។
Barca ត្រូវតែធ្វើឱ្យសកម្មនូវកម្រិតសេដ្ឋកិច្ចជាច្រើនដើម្បីចុះហត្ថលេខា និងចុះឈ្មោះតារាដូចជា Robert Lewandowski, Raphinha និង Jules Kounde។ រដូវកាលនេះ ពួកគេប្រមូលប្រាក់ដើម្បីចុះឈ្មោះកីឡាករថ្មីរបស់ពួកគេដោយការផ្ទេរកីឡាករចេញ។
ទោះបីជាយ៉ាងណាក៏ដោយ យោងទៅតាម El Nacional បានឲ្យដឹងថា Barca កំពុងតែជួបការលំបាកក្នុងការបញ្ចេញកីឡាករ ដែលអាចបន្ថយចំណាយ បានលឿនតាមដែលពួកគេចង់បាន។ ប្រសិនបើនៅក្នុងថ្ងៃចុងក្រោយនៃទីផ្សារដោះដូរកីឡាករ ពួកគេមិនមានថវិកាដើម្បីចុះឈ្មោះកីឡាករមកដល់ថ្មី របស់ពួកគេ នោះ Fati អាចនឹងត្រូវបានគេលក់ចេញ។
ខ្សែបម្រើស្លាបសញ្ជាតិអេស្ប៉ាញត្រូវបានក្លឹប Barca ដាក់តម្លៃ ៦០លានអឺរ៉ូ ជាតួលេខដែលពួកគេត្រូវការដើម្បីចុះឈ្មោះកីឡាករមកដល់ថ្មីរបស់ពួកគេ។ ពួកគេក៏សង្ឃឹមថានឹងប្រមូលថវិកាសម្រាប់ការចុះហត្ថលេខាបន្ថែមទៀត ដោយអ្នកចាត់ការ Xavi Hernandez ចង់ចុះហត្ថលេខាលើខ្សែការពារស្តាំ និងខ្សែបម្រើដែលមានគុណភាព៕