វិលត្រលប់ទៅជិត ៥ ឆ្នាំមុន កីឡាករបារាំង Benjamin Mendy បានឈោងដៃកាន់ពានរង្វាន់ ដែលមនុស្សជាច្រើនប្រាថ្នាចង់ប៉ះគឺ FIFA World Cup ក៏ជាកាដូដ៏មានន័យមុនតែប៉ុន្មានថ្ងៃ ចូលខួបកំណើតអាយុ ២៤ ឆ្នាំ។ គេបានវិវត្តខ្លួនក្លាយជាតារាបាល់ទាត់ដ៏ជោគជ័យ មានទ្រព្យរាប់សិបលាន លុះក្រោយមកជីវិតបែរធ្លាក់ចុះមួយរំពេច ក៏ដោយសារតែការជ្រុលជ្រួសសប្បាយហួសប្រមាណ នឹងភាពល្បីល្បាញដែលខ្លួនមាន។
CTS Sports រៀបរាប់តាំងពីដំណើរដើមទងមុនចាប់ផ្តើមអាជីព ផ្លែផ្កាសម្រេចបាននៅពាក់កណ្តាលអាជីព និងចុងក្រោយមុនដាក់ចិត្តត្រលប់មកប្រលូកអាជីពបាល់ទាត់ជាថ្មី ក្រោយរួចផុតទោសពៃរ៍ពីបទចោទប្រកាន់នៅតុលាការ។
កូនពៅក្នុងចំណោមបងប្អូន ៥ នាក់ ដែលមានឪពុកម្ដាយជាជនភៀសខ្លួនពីសេណេហ្គាល់ មករស់នៅប្រទេសបារាំង ក៏រាប់ថាមិនមានជីវភាពធូរធារអ្វីនោះដែរ តែដោយសារ Mendy មានឆន្ទៈស្រលាញ់បាល់ទាត់ គេបានចាប់ផ្ដើមទទួលឱកាសចូលហ្វឹកហាត់បាល់នៅឈុតថ្នាលនាអាយុ ១២ ឆ្នាំ ហើយមួយឆ្នាំបន្ទាប់ គេស៊ូចាកចេញពីផ្ទះ ដើម្បីទៅរស់នៅក្នុងជំរំហ្វឹកហាត់មួយកន្លែងនៅភាគខាងជើងប្រទេស។ ការខិតខំ ការដាក់ឆន្ទៈរបស់ Mendy បានសម្រេចកើតជាផ្លែផ្កានាដំណាក់កាលដំបូង តាមរយៈការចុះហត្ថលេខាទៅចូលរួមជាមួយក្លឹប Le Havre នៅលីគលំដាប់ទីពីរ Ligue 2 របស់បារាំង។
មើលឃើញខ្លួនឯងធ្វើបានល្អ នៅតំណែងការពារ ហើយបន្តបន្ទាប់ជាប់លាប់ការលេងនៅឈុតធំ រហូតផ្លោះកម្រិតទៅចូលរួមនៅក្លឹប Marseille មុនផ្ទេរទៅ AS Monaco រួចពេលវេលាឡើងទ្រើង គឺក្លាយជាខ្សែការពារមានតម្លៃផ្ទេរខ្ពស់បំផុត ល្បាក់ឆ្នាំ ២០១៧ ទៅចុះចូលនៅ Manchester City តម្លៃ ៥៧,៥ លានអឺរ៉ូ។ ពេលនោះហើយ Mendy បានប៉ះប៉ូវផ្តល់កាដូជីវិតលើកទឹកចិត្តខ្លួនឯង តាមរយៈការផ្លាស់ពីរស់នៅផ្ទះល្វែងជួល មកទិញភូមិគ្រឹះតម្លៃ ៦ លានដុល្លារ មានរថយន្តទំនើបជិះ មានលុយដើរចាយសប្បាយយប់ថ្ងៃ ក៏ប៉ុន្តែបញ្ហាទាស់ត្រង់ គេសប្បាយជ្រុល។
ចាប់តាំងចេះខូច បុរសមាឌឌាំងកម្ពស់ ១,៨៥ ម៉ែត្រ អះអាងថា ធ្លាប់ឡើងគ្រែនឹងនារី ១០ ០០០ នាក់ សឹងរៀងរាល់យប់ ដែលគេទៅបារ ទៅកន្លែងកម្សាន្ត ហើយគេទទួលអារម្មណ៍ថា ធ្វើរឿងអស់នោះវាសប្បាយ វាធ្វើឲ្យគេលែងខ្វល់ខ្វាយនឹងបញ្ហាអ្វីទាំងអស់។
ជីវិតចាប់ផ្តើមធ្លាក់ក្រោយឈ្នះពាន World Cup ជាមួយមាន់គកបារាំងតែប៉ុន្មានខែ Mendy ជួបបញ្ហារបួស លែងសូវបានឱកាសបង្ហាញខ្លួនលើទីលាន លុះមួយឆ្នាំបន្ទាប់ក៏ផ្តើមជួបរឿងអាស្រូវ ដល់រងការចោទប្រកាន់ពីបទរំលោភសេពសន្ថវៈផង ក៏នាំឲ្យ City សម្រេចផ្តាច់កុងត្រា លែងទូទាត់ប្រាក់ឈ្នួល ១០០ ០០០ ផោន/សប្តាហ៍ឲ្យគេបន្តទៅទៀត។
ពេលនោះជីវិតរបស់គេធ្លាក់ដល់បាត ក៏លែងមានចំណូលចូលហោប៉ៅ ហើយ Mendy ធ្លាប់បាននិយាយជាសាធារណៈនៅក្នុងតុលាការយ៉ាងដូច្នោះ៖ “ខ្ញុំពេលបន្ទាប់មករកបានតែ ៤ ផោន (ឬជាង ៥ ដុល្លារ) រៀងរាល់ថ្ងៃ ក៏ដើម្បីទុកទិញអាហារហូបតែប៉ុណ្ណោះឯង រួចបានគិតត្រលប់ទៅក្រោយវិញ នឹកដល់ពេលខ្ញុំធ្លាប់សប្បាយចេញទៅខាងក្រៅ សប្បាយនឹងការគេងជាមួយនារីច្រើននាក់”។
គេបានជាប់ឃុំរយៈពេល ៤ ខែ ចន្លោះខែសីហា ឆ្នាំ ២០២២ ដល់ខែមករា ឆ្នាំ ២០២៣ រួចទើបតែមកដល់ខែកក្កដានេះ Mendy បានឡើងតុលាការ ហើយឈ្នះក្តីពីបទចោទប្រកាន់ទាំងឡាយ សម្រេចក្លាយជាជនមានសេរីភាពដូចដើម។
កន្លងមកប្រភពសារព័ត៌មានធំៗជាច្រើនចុះផ្សាយ ថាបុរសវ័យ ២៩ ឆ្នាំ កំពុងមានចិត្តចង់ត្រលប់មកទីលានជាថ្មី ហើយក្លឹបនៅអារ៉ាប៊ីសាអូឌីតទំនងនឹងស្រោចស្រង់ជីវភាពរបស់គេត្រលប់មកវិញបាន ដល់ចុះឡើងបែរកីឡាករប្រកាសផ្ទេរទៅ FC Lorient ជាមួយកុងត្រា ២ ឆ្នាំ ខណៈទំហំប្រាក់ឈ្នួលជឿថា មួយអាទិត្យនឹងមិនក្រោម ៥ មុឺនដុល្លារឡើយ៕
ប្រភព៖ បរទេស
