Ajax Amsterdam ក្លឹបស្ថិតនៅលីគកំពូលហូឡង់សារថយក្រោយទៅ ៤-៥ ឆ្នាំមុន ហាក់ឡើងកូដមួយរំពេច ជាពិសេសការគាស់កំណត់ត្រាក្រោយខកខានជិត ២ ទសវត្ស អាចឡើងមកកាន់វគ្គពាក់កណ្តាលផ្តាច់ព្រ័ត្រពានអឺរ៉ុប UCL បរាជ័យក្រោមថ្វីជើង Spurs នៅឆ្នាំ ២០១៩។
វាជាការចងចាំដ៏ល្អមួយ ដ្បិតអីមកទល់សព្វថ្ងៃឈុត ១១ រូប ប្រើប្រាស់ក្នុងការប្រកួតចុងក្រោយនោះ ត្រូវបានចែកចាយទៅឲ្យក្លឹបដទៃទាំងអស់ មិនថាតែអ្នកចាត់ការ ក៏មានឈ្មោះដឹកនាំក្លឹបដទៃផ្សេងទៀតផងដែរ ជារួម Ajax បានផ្លាស់ប្ដូរទាំងប្រព័ន្ធ ទាំងយុទ្ធសាស្ត្រ ទាំងធនធានដែលមាន ១៨០ ដឺក្រេ។ CTS Sports បង្ហាញបច្ចុប្បន្នកាលអ្នកទាំងអស់នោះ៖
អ្នកចាំទី Andre Onana – បន្តឈរជើងឲ្យ Ajax ដល់ឆ្នាំ ២០២២ មុនជ្រើសការផ្ទេរនៅលក្ខខណ្ឌឥតតម្លៃខ្លួនទៅកាន់ Inter Milan ហើយថ្មីៗក៏ល្ហិចល្ហៀងត្រៀមនឹងផ្ទេរទៅក្លឹបផ្សេងបន្តទៀត គឺ Manchester United។
ខ្សែការពារស្លាបឆ្វេង Nicolas Tagliafico – ដូចគ្នានឹង Onana គេក៏បានចាកចេញនៅល្បាក់ឆ្នាំតែមួយ ទៅចុះចូលនៅក្លឹបបារាំង Lyon ក៏ប៉ុន្តែមានតម្លៃខ្លួន ៤,២០ លានអឺរ៉ូ ចូលមកកាន់ហោប៉ៅក្លឹបអាណាព្យាបាល។
ខ្សែការពារកណ្តាល Daley Blind – នេះទើបតែបានផ្ទេរកាលដើមឆ្នាំ ក្រោមលក្ខខណ្ឌឥតតម្លៃខ្លួនទៅកាន់ក្លឹប Bayern Munich តែឈរជើងនៅទីនោះត្រឹមពាក់កណ្តាលរដូវកាល ក៏បន្តផ្លាស់ទៅក្លឹបថ្មីនៅដីអេស្ប៉ាញគឺ Girona FC។
ខ្សែការពារកណ្តាល Matthijs de Ligt – កាលនៅ Ajax ជញ្ជាំងយក្សមាឌឌាំង សញ្ជាតិហូឡង់ធ្វើបានល្អណាស់ មិនចាញ់កម្រិត Virgil van Dijk ប៉ុន្មានទេ ជាហេតុនាំឲ្យគេត្រូវថ្លៃឡើងដល់ ៨៥,៥ លានដែល Juventus ទិញយកកាលឆ្នាំ ២០១៩។ លុះបន្ទាប់មកក៏ Bayern Munich ថ្ពក់យកបន្ត នៅតម្លៃរាងកល់ដដែល ៦៧ លាន។
ខ្សែការពារស្លាបស្តាំ Noussair Mazraoui – អភិវឌ្ឍខ្លួនតាំងនៅឈុតថ្នាល នេះពាក់កណ្តាលអាជីពរបស់គេបានរួមរស់ជាមួយក្លឹប Ajax។ ទើបតែរដូក្តៅ ឆ្នាំ ២០២២ សម្រេចផ្ទេរមក Bayern Munich ខណៈក្លឹបអាល្លឺម៉ង់ មិនបានចាយលុយសូម្បីមួយរៀល។
ខ្សែបម្រើកណ្តាល Frenkie de Jong – នេះគឺជាកីឡាករដែល Ajax លក់បានលុយចូលហោប៉ៅច្រើនបំផុត ពោល ៨៦ លានអឺរ៉ូ ទៅឲ្យ Barcelona តាំងឆ្នាំ ២០១៩ និងបន្តឈរជើងទល់សព្វថ្ងៃ។
ខ្សែបម្រើកណ្តាល Lasse Schone -នៅពេលវេលាតែមួយនឹង De Jong គេក៏បានផ្ទេរចេញទៅ Girona ហើយស្ថានភាពបន្តបន្ទាប់មិនសូវល្អ ផ្លាស់ប្តូរក្លឹប ២-៣ ចុងក្រោយវិលមកហូឡង់ចុះចូលនៅក្លឹប NEC Nijmegen។
ខ្សែបម្រើ Donny van de Beek – ជោគជ័យដំណាលគ្នានឹង De Jong និង De Ligt តែ de Beek នៅអាជីពបន្ទាប់ ហាក់ស្រឡះសូន្យឈឹង។ គេកំពុងឈរជើងឲ្យក្លឹប Man United តែត្រឹមជាស្រមោល សឹងរកឱកាសបង្ហាញខ្លួនគ្មាន។
ខ្សែប្រយុទ្ធស្លាបស្តាំ Hakim Ziyech – កំពុងឈរជើងឲ្យក្លឹបតោខៀវ Chelsea ហើយពេលចុងក្រោយលេចលឺប៊ិះនឹងផ្លាស់ទៅ PSG ទៅ Al Nassr តែបរាជ័យការតេស្តសុខភាពពីរលើកផ្ទួនគ្នា។
ខ្សែប្រយុទ្ធស្លាបឆ្វេង Dusan Tadic – បើនិយាយចំណោមឈុត ១១ រូប គឺកីឡាករស៊ែប៊ីឈរជើងបានយូរជាងគេឲ្យ Ajax នេះទើបចែកផ្លូវ ហើយរកឃើញទ្រនំថ្មីក្លឹបនៅទួរគី Fenerbahce។
ខ្សែប្រយុទ្ធកណ្តាល David Neres – គ្រប់គ្នាធ្លាប់ហៅម្នាក់នេះ ថាបុរសភ្នែកច្រឹម រួចសព្វថ្ងៃប្រហែលលែងសូវមានអ្នកចាប់អារម្មណ៍ ស្របពេលកំពុងឈរជើងឲ្យក្លឹបនៅព័រទុយហ្គាល់ Benfica ឯណោះ។
អ្នកចាត់ការ Erik ten Hag – កំពុងដឹកនាំក្លឹប Man United ជាមួយប្រព័ន្ធកីឡាករកាន់តែមុតស្រួចជាងនៅក្លឹបចាស់ ហើយក៏រំពឹងកៀកនឹងការរួបរួមជាថ្មី រវាងកូនក្រុមចាស់ Onana៕
ប្រភព៖ បរទេស